Salmos 19:1-14
19 Rü ngẽma daxũwa nüxü̃ idauxü̃ rü taxca̱x nanango̱xẽxẽ i Tupanaarü pora. Rü guxü̃ma i ngẽma daxũwa ngẽxmaxü̃ tüxü̃ nüxü̃ nacua̱xẽxẽ nax namexẽchixü̃ i ngẽma nüma naxüxü̃.
2 Rü wüxichigü i ngunexü̃ rü ngẽma to i ngunexü̃xü̃ nanawe̱x i Tupanaarü pora. Rü wüxichigü i chütaxü̃ rü ngẽma to i chütaxü̃xü̃ nanawe̱x nax naporaxü̃ ya Tupana.
3 19:3-4 Rü woo taxuxü̃ma i orexü̃ taxĩnüe rü taxuxü̃ i naga taxmachixẽwa nangu, natürü ngẽma Tupanaarü pora rü guxü̃ i naanewa tüxü̃ nüxü̃ nadauxẽxẽ ñu̱xmata naane íyacuáxü̃wa nangu rü ñu̱xmata üa̱xcü íngẽxmaxü̃wa nangu.
4 Nüü̃ nadau 19:3
5 Rü nüma ya üa̱xcü rü inarügo nax ngẽmaãcü nagu yaxũxü̃ca̱x i namaxü̃, rü nataãxẽ ñoma wüxi ya yatü ya ngexwaca ingĩcürüxü̃ rü ñoma wüxi i duü̃xü̃ i ñaxãchichaü̃xü̃rüxü̃.
6 Rü nüma ya üa̱xcü rü naanearü éstewa narügo, rü nixũ ñu̱xmata norü oéstewa narüxücu. Rü taxucürüwa texé norü naiemaxü̃cha̱xwa tiña.
7 Rü Cori ya Tupanaarü ore rü aixcüma nawe̱xgu rü ngexwaca̱xü̃xü̃ i pora tüxna naxã. Rü Cori ya Tupanaarü mugü rü aixcümaxü̃ nixu rü cua̱xwa nananguxẽxẽ ya yimá yatü ya ímemarecü nax nayauxãxü̃ i ucu̱xẽgü.
8 Rü Cori ya Tupanaarü ucu̱xẽgü rü aixcüma niwe̱x, rü taãxẽ tüxna naxã. Rü Cori ya Tupanaarü mugü rü taxuwama nachixe, rü cua̱x tüxna naxã.
9 Rü name nax guxü̃gutáma Tupanaxü̃ imuü̃exü̃. Rü norü mugü rü aixcüma nawe̱xgu rü taxuwama ínatü.
10 Rü norü mugü rü úiru i ngearü ãũãchixü̃arü yexera namexẽchi. Rü berure ya naxchiãü̃wa yaxunearü yexera namaixcura.
11 Rü ngẽma curü mugü rü choxü̃ nüxü̃ nacua̱xẽxẽ naxü̃pa nax chixexü̃gu changuxü̃. Rü yíxema naga ĩnüexe i ngẽma curü mugü rü tá tanayauxgü i tümaarü ãmare.
12 ¿Rü texé ya nüxü̃ cuáxe i tümaarü chixexü̃ i tümawatama ngẽxmaxü̃? Rü ngẽmaca̱x, Pa Cori Pa Tupanax ¡choxü̃́ nüxü̃ irüngüma i ngẽma chixexü̃ i chauechitamare chaxüxü̃!
13 ¡Rü choxü̃ rüngü̃xẽxẽ nax tama chixexü̃ i nagu charüxĩnüxü̃gu changuxü̃ca̱x! ¡Rü choxü̃ naporaxẽxẽ nax tama chomaxã inacuáxü̃ca̱x i ngẽma chixexü̃! Rü curü ngü̃xẽẽmaxã taxũtáma chixexü̃ chaxü rü nawa tá íchanguxuchi i ngẽma pecadugü.
14 Rü chanaxwa̱xe i cunayaxu i ñaa chorü ore rü chorü ĩnügü, Pa Cori Pa Tupana ya chorü poxü̃ruxü̃ rü chorü nguxuchixẽẽruxü̃ nax quixĩxü̃.
