Salmos 2:1-12
2 ¿Ta̱xacüca̱x nügümaxã nanue i ñoma i naanecüã̱x i duü̃xü̃gü i tama Tupanaxü̃ cua̱xgüxü̃? ¿Rü tü̱xcüü̃ i nügümaxã nagu narüxĩnüe i ta̱xacü i taxuwama mexü̃?
2 Rü ñoma i naanecüã̱x i nachixü̃anegüarü ãẽ̱xgacügü rü Tupanamaxã rü yimá ãẽ̱xgacü ya nüma yangucuchixẽẽcümaxã nanue, rü wüxigu nagu narüxĩnüe nax ñuxãcü yimáxü̃ ínata̱xüchigüxü̃.
3 Rü tagaãcü ñanagürügü: —¡Ngexrüma nax naxme̱xwa íngexmagüxü̃ rü naga ixĩnüexü̃! ¡Rü ngĩxã naxme̱xwa yigü ítanguxü̃xẽxẽ nax tama natüü̃wa ingexmagüxü̃ca̱x! —ñanagürügü.
4 Natürü nüma ya Cori ya Tupana ya daxũguxü̃ i naanewa ãẽ̱xgacü ixĩcü rü nüxü̃ nacugümare.
5 Rü ñu̱xũchi norü numaxã ínanaba̱i̱xgü rü nugaãcü nayangagü rü ñanagürü nüxü̃:
6 —Choma rü marü nüxü̃ chaxuneta ya yimá ãẽ̱xgacü ya choma chanaxwa̱xecü nax yima ma̱xpǘne ya üünene ya Chióü̃wa ãẽ̱xgacü yixĩxü̃ca̱x —ñanagürü.
7 Rü choma rü tá chanaxunagü i ngẽma Cori ya Tupana nagu rüxĩnüxü̃, rü chomaxã nüxü̃ yaxuxü̃ i ñaxü̃: —Cuma rü chaune quixĩ, rü choma rü Cunatü chixĩ i ñu̱xma.
8 ¡Rü choxna naxca̱x naca nax cuxme̱xwa chanangexmagüxẽxẽxü̃ca̱x i guxü̃ma i nachixü̃anegü i ñoma i naanewa ngẽxmagüxü̃ nax cuxrü yixĩxü̃ca̱x! Rü choma rü tá cuxna chanaxã.
9 Rü fierumena̱xãmaxã tá cunadai i ngẽma nachixü̃anegüarü ãẽ̱xgacügü. Rü tá íxraxü̃gu cunapoü̃gü ñoma buetare ya waixü̃münaxca̱x ipuxẽxẽxü̃rüxü̃ —ñanagürü choxü̃.
10 Rü ngẽmaca̱x i pemax, Pa Nachixü̃anegüarü Ãẽ̱xgacügüx, rü pemax Pa Ãẽ̱xgacügü i Ñoma i Naanewa Duü̃xü̃gümaxã Ipecua̱xgüxü̃x ¡rü iperüxĩnüe i ñaa ucu̱xẽ rü naga pexĩnüe i ñaa pemaxã nüxü̃ chixuxü̃!
11 2:11-12 ¡Rü taãxẽãcü rü nüxü̃ pengechaü̃güãcü nüxü̃ picua̱xüxü̃gü ya Cori ya Tupana! ¡Rü nüxü̃ pemuü̃eãcüma nape̱xegu pecaxã́pü̱xügü, rü naga pexĩnüe nax tama pemaxã nanuxü̃ca̱x, rü ngẽmaãcü namagu peyuexü̃ca̱x! Erü ngürüãchi tá nanu rü tá pexü̃ nadai. Natürü tataãxẽgü ya yíxema naxme̱xwa tügü ngẽxmaxẽẽgüxe.
12 Nüü̃ nadau 2:11
