Salmos 24:1-10
24 Cori ya Tupanaarü nixĩ i guxü̃ma i ñaa naane rü guxü̃ma i nawa ngẽxmagüxü̃ rü guxü̃ma i nawa maxẽxü̃.
2 Yerü nüma nixĩ ga naxüaxü̃ ga ñoma ga naane. Rü nüma nixĩ ga naxüchicaaxü̃ ga márgü rü taxtügü nax yemaacü nangóxü̃ca̱x ga paanexü̃.
3 ¿Rü texé tame nax nawa tanguxü̃ ya yima ma̱xpǘne ya üünene ya Tupana nawa ngẽxmane? ¿Rü texé tame nax napata ya üünenewa tangexmaxü̃?
4 Rü yíxema tama chixexü̃ üxe rü tama chixexü̃gu rüxĩnüxe, rü tama tupananetachicüna̱xãgüxü̃ icua̱xüü̃güxe rü tama idoraxe, rü yíxema tixĩ ya mexẽ nax Tupanapatawa tangexmaxü̃.
5 Rü Cori ya tümaarü Tupana ya tümaarü maxẽẽruxü̃ rü tá mexü̃ tümamaxã naxuegu rü tá tüxü̃ narüngü̃xẽxẽ.
6 Rü ngẽmaãcü mexü̃wa tangexmagü ya yíxema cuga ĩnüxexe, Pa Corix, rü yíxema cuxca̱x daugüxe i cuma nax Acóbuarü Tupana quixĩxü̃.
7 ¡Rü piwãxnagü, Pa Nũxcümaü̃xü̃ i Ĩã̱xgüx! ¡Rü pengeenügü nax yaxücuxü̃ca̱x ya yimá guxãarü Ãẽ̱xgacü ya üünecü ya poracü!
8 ¿Rü texé nixĩ ya yimá üünecü ya Ãẽ̱xgacü? Rü nüma ya Cori ya Tupana ya poracü rü tama muü̃cü nixĩ. Rü nüma nixĩ ya Cori ya Tupana ya taxúexü̃ma muü̃cü i daiwa.
9 ¡Rü piwãxnagü, Pa Nũxcümaü̃xü̃ i Ĩã̱xgüx! ¡Rü pengeenügü nax yaxücuxü̃ca̱x ya yimá guxãarü Ãẽ̱xgacü ya üünecü ya poracü!
10 ¿Rü texé nixĩ ya yimá Ãẽ̱xgacü ya üünecü? Rü nüma nixĩ ya Cori ya Tupana ya Guxãétüwa ücü. Rü nümatama nixĩ ya Ãẽ̱xgacü ya üünecü.
