Salmos 25:1-22
25 Pa Cori Pa Tupanax, cuxna nixĩ i chacaxü̃ i chorü yumüxẽwa.
2 Pa Chorü Tupanax, cuxü̃́ chayaxõ. ¡Rü taxṹ i cunaxüchicaxü̃ i chorü uanügü nax ãne choxü̃ yangexẽxẽgüxü̃ca̱x rü choxü̃ nacugüexü̃ca̱x!
3 Rü yíxema cuxü̃́ yaxṍxe rü tagutáma ãne tinge. Natürü ngẽma tama cuga ĩnüexü̃ rü natüca̱xma cumaxã nuexü̃, rü ãne tá ningegü.
4 Pa Corix ¡choxü̃ nawe̱x i cucümagü rü ngẽma cucümagügu choxü̃ ixũxẽxẽ!
5 ¡Rü chomaxã inacua̱x rü choxü̃ nangu̱xẽxẽ i ngẽma curü ore i aixcüma ixĩxü̃! Erü cuma nixĩ i chorü Tupana rü chorü maxẽẽruxü̃ quixĩxü̃. Rü guxü̃ma i oragu rü cuxü̃́ chayaxõ.
6 Pa Cori Pa Tupanax ¡nüxna nacua̱xãchi nax guxü̃guma toxü̃ cungechaü̃xü̃ rü cuxü̃́ tangechaü̃tümüxü̃güxü̃!
7 ¡Natürü taxṹ i nüxna cucua̱xãchixü̃ i ngẽma chorü pecadugü rü yema chixexü̃gü ga chaxüxü̃ ga yexguma changextü̱xügu! Pa Cori Pa Tupanax ¡choxna nacua̱xãchi, erü curü ngechaü̃ rü curü mecüma rü nataxüchi!
8 Nüma ya Cori ya Tupana rü namecüma rü nixaixcüma. Rü nüma rü tüxü̃ narüwe̱xãchixẽxẽ ya yíxema chixexü̃ ügüxe.
9 Rü nügücümagu tüxü̃ naxĩxẽxẽ ya yíxema tama tügü icua̱xüü̃güxe, rü mexü̃wa tüxü̃ nagagü.
10 Rü nüma ya Tupana rü tüxü̃ nangechaü̃ rü tümamaxã nixaixcüma ya yíxema yanguxẽẽgüxe i ngẽma uneta i namaxã taxügüxü̃ rü naga ĩnüexe i norü mugü.
11 Pa Cori Pa Tupanax, nata i chorü chixexü̃ i cupe̱xewa chaxüxü̃ ¡Rü choxü̃́ nüxü̃ irüngüma i ngẽma nax taxúema chixri cuchiga idexaxü̃ca̱x!
12 Rü yíxema Cori ya Tupanaxü̃ ngechaü̃xe, rü nüma rü tá tüxü̃ nanawe̱x i nacüma i mexü̃ nax nagu tixũxü̃.
13 Rü tüma rü tá tataãxẽ rü tümaxacügü tá nixĩ i norü yora i ñaa nachixü̃ane.
14 Rü nüma ya Cori ya Tupana rü tümamücü nixĩ ya yíxema nüxü̃ ngechaü̃güxe. Rü tümaca̱x nanango̱xẽxẽ i norü uneta.
15 Rü guxü̃guma Cori ya Tupanaarü ngü̃xẽẽca̱x chadau, erü nüma nixĩ i choxü̃ ínapoxü̃xü̃ nawa i guxü̃ma i ãũcümaxü̃.
16 Pa Corix ¡choxü̃ rüngü̃xẽxẽ erü chanaxĩ̱xãchiãxẽ, rü cuxü̃́ changechaü̃tümüxü̃ erü chaxicatama charüxã̱ũ̱x!
17 Choma rü yexera chanaxĩ̱xãchiãẽchigü. ¡Rü nawa choxü̃ ínanguxuchixẽxẽ i ñaa ngúxü̃ i chingexü̃!
18 ¡Choxü̃́ nüxü̃ nadau i ñaa ngúxü̃ i chingexü̃ rü chorü guxchaxü̃gü! ¡Rü choxü̃́ nüxü̃ yarüngüma i chorü pecadugü!
19 ¡Rü dücax i ñuxre i chorü uanügü i chauxchi aiexü̃ rü choxü̃ ima̱xgüchaü̃xü̃!
20 ¡Rü choxna nadau rü choxü̃ ínapoxü̃ nax tama choxü̃ yama̱xgüxü̃ca̱x! ¡Rü taxṹ i cunaxüchicaxü̃ i chorü uanügü nax ãne choxü̃ yangexẽxẽgüxü̃ca̱x! Erü cuma nixĩ i chorü poxü̃ruxü̃ quixĩxü̃, rü cuxü̃tagu nixĩ i nüxü̃ ichayangauxü̃ i ngü̃xẽxẽ.
21 Rü ngẽma chaugü namaxã íchapoxü̃xü̃ nixĩ nax aixcümaxü̃ chixuxü̃ rü taxuxü̃ma i chixexü̃ chaxüxü̃. Rü ngẽmaãcü chamaxü̃ erü cuxü̃́ chayaxõ.
22 Pa Chorü Tupanax ¡ínapoxü̃ i Iraéanecüã̱xgü nawa i norü guxchaxü̃gü rü norü ĩ̱xãchiãẽxü̃gü!
