Salmos 27:1-14
27 Nüma ya Cori ya Tupana rü chorü omü rü chorü maxẽxẽruxü̃ nixĩ. ¿Rü texéxü̃ tá nixĩ i chamuü̃xü̃? Rü nüma ya Cori nixĩ i ínapoxü̃ãxü̃ i chorü maxü̃. ¿Rü texéxü̃ tá nixĩ i chamuü̃xü̃?
2 Rü ngẽma chixexü̃gü i chorü uanügü rü cha̱u̱xca̱x nibuxmü nax choxü̃ yama̱xgüxü̃ca̱x. Natürü nüxchiama tá guxchaxü̃gu nayi.
3 Rü woo muxũchixü̃ i churaragü choxü̃ íchomaeguãchigu rü taxuca̱xtama chamuü̃. Rü woo nügü ínamexẽẽgügu nax cha̱u̱xca̱x íyaxü̃ãchixü̃ca̱x rü taxuca̱xma chanaxĩ̱xãchiãxẽ.
4 Rü ngẽma Cori ya Tupanana naxca̱x chacaxü̃ rü choxü̃́ ngúchaü̃xü̃ rü wüxitama nixĩ. Rü ngẽma nixĩ nax guxü̃ma i chorü maxü̃gu Cori ya Tupanapatawa changexmaxü̃ nax ngẽmaãcü nüxü̃ chicua̱xüü̃xü̃ca̱x rü norü üünemaxã chataãẽxü̃ca̱x.
5 Rü ngẽxguma guxchaxü̃ cha̱u̱xca̱x ínguxgu rü nüma ya Cori rü napatawa tá choxna nadau. Rü nügümaxã tá choxü̃ natüxchipeta rü choxü̃ ínapoxü̃. Rü wüxi ya nuta ya tacüétügu tá choxü̃ namunagü nax taxuxü̃ma choxü̃ imáxü̃ca̱x.
6 Rü ngéma rü taxuxü̃táma i chorü uanü choxna nangu. Rü ngẽxguma rü tá choxü̃́ natauxcha nax Cori ya Tupanaca̱x chayaguxü̃ i ãmaregü i napatawa. Rü taãẽãcüma tá naxca̱x chawiyae rü nüxü̃ chicua̱xüxü̃.
7 Rü cuxna nixĩ i chaca̱xaxü̃, Pa Corix. ¡Rü choxü̃ naxĩnü! ¡Rü cuxü̃́ changechaü̃tümüxü̃ rü choxü̃ nangãxü̃!
8 Rü chauãẽwa rü chaugümaxã ñachagürü: —Cori ya Tupanaca̱x tá chadau —ñachagürü. Rü ngẽmaca̱x i chomax, Pa Corix, rü cuxca̱x chadau.
9 ¡Rü taxṹ i cha̱u̱xcha̱xwa iquicúxü̃, rü taxṹ i curü numaxã choxü̃ cuxoxü̃! Erü cuxicatama nixĩ i chorü ngü̃xẽẽruxü̃ quixĩxü̃. ¡Rü taxṹ i chaxica nua choxü̃ cutáxü̃ nax ngẽmaãcü changemücüxü̃ca̱x! Erü cuma nixĩ ya chorü Tupana rü chorü maxẽẽruxü̃ quixĩxü̃.
10 Rü woo chaunatü rü chaué choxü̃ íta̱xgügu, natürü cumax, Pa Corix, tá nixĩ i choxna cudauxü̃.
11 Pa Corix ¡choxü̃ nawe̱x i cumaxü̃ rü chorü uanügücha̱xwa choxü̃ nüxü̃ nacua̱xẽxẽ i ngẽma nama i mexü̃ nax nagu chixũxü̃ca̱x!
12 ¡Rü taxṹ i chorü uanügüarü ngúchaü̃wa choxü̃ cutáxü̃! Erü ngẽma duü̃xü̃gü i choxü̃ ima̱xgüchaü̃xü̃ rü chixri chauchiga nidexagü. Erü guxü̃ma i ngẽma chauchiga nüxü̃ yaxugüxü̃ rü doragümare nixĩ.
13 Natürü i choma rü chayaxõ nax nüxü̃ tá chadauxü̃ nax aixcüma choxü̃ nangechaü̃xü̃ ya Cori ya Tupana i guxü̃ma i ngẽma ngunexü̃gü i nagu chamaxü̃xü̃gu.
14 ¡Ẽcü nüxü̃́ yaxõ ya Cori! ¡Rü cugü naporaxẽxẽ rü taxṹ i nüxü̃ curüxoxü̃ nax cuyaxõxü̃! Rü cumaxã nüxü̃ chixu rü ¡nagu yaxõ ya Cori ya Tupana!
