Salmos 28:1-9
28 Pa Cori Pa Tupanax, cuma nixĩ i nuta i chorü poxü̃ruxü̃ quixĩxü̃. Rü cuxna nixĩ i chacaxü̃ nax choxü̃ curüngü̃xẽẽxü̃ca̱x. ¡Rü taxṹ i cugü quinuxuxü̃ nax choxü̃ cungãxü̃xü̃! Erü ngẽxguma taxũtáma choxü̃ cungãxü̃gu rü ñoma yuexü̃rüxü̃ tá chixĩ.
2 ¡Rü choxü̃ naxĩnü i ngẽxguma cupata íngexmaxü̃gu chawéxme̱xãcüma curü ngü̃xẽẽca̱x íchacaxgu!
3 Rü tama chanaxwa̱xe i choxü̃ cupoxcu wüxigu namaxã i ngẽma chixexü̃ ügüxü̃. Rü nümagü rü mea tümamaxã naxãmücügüneta ya duẽxẽgü, natürü naãẽwa rü nagu narüxĩnüe nax ñuxãcü tüxü̃ yama̱xgüchaü̃xü̃.
4 Rü ngẽmaca̱x, Pa Corix, rü name nax cunapoxcuexü̃ naxca̱x i ngẽma norü chixexü̃ i naxügüxü̃. ¡Rü ngẽma chixexü̃ i to̱xguã̱xmaxã naxügüxü̃ rü ngẽmatama chixexü̃ naxca̱x natáeguxẽxẽ!
5 Rü nümagü rü tama nüxü̃ nacua̱xgüchaü̃ i ngẽma Tupana ngo̱xẽẽxü̃. Rü ngẽmaca̱x ya Tupana rü tá nanadai rü tagutáma wena inanachigüxẽxẽ.
6 Rü namecümaxüchi ya Cori ya Tupana erü nüxü̃ naxĩnü i chorü yumüxẽ.
7 Rü nüma ya Cori ya Tupana rü chorü poxü̃ruxü̃ ya poraxüchicü nixĩ. Rü nüxü̃́ nixĩ ga chayaxõxü̃, rü nüma nixĩ ga choxü̃ nangü̃xẽẽxü̃. Rü poraãcü chataãxẽ i ñu̱xmax. Rü Cori ya Tupanaca̱x tá chawiyae rü tá moxẽ nüxna chaxã.
8 Rü nüma ya Cori ya Tupana nixĩ i norü duü̃xü̃güxü̃ naporaexẽẽxü̃. Rü nüma nixĩ i nüxü̃ nangü̃xẽẽxü̃ rü ínapoxü̃ãxü̃ ya yimá ãẽ̱xgacü ya nümatama nüxü̃ naxunetacü.
9 Pa Cori Pa Tupanax ¡nüxü̃ rüngü̃xẽxẽ ya curü duü̃xü̃gü rü mexü̃ namaxã naxuegu! ¡Rü ñoma wüxi i carnéruarü dauruü̃rüxü̃ nüxna nadau rü guxü̃guma mea yagagü!
