Salmos 29:1-11
29 Pa Dauxü̃cüã̱x ¡nüxü̃ picua̱xüü̃gü ya Cori ya Tupana naxca̱x i norü pora rü norü üüne!
2 ¡Rü nüxü̃ picua̱xüü̃gü i ngẽma naéga i üünexü̃! ¡Rü yima napata ya mexẽchínewa rü penatachigaxẽxẽ!
3 Rü ngẽma naga ya Cori ya Tupana rü márétügu nayaxũ. Rü nüma ya Tupana ya poracü rü nayaduruanexẽxẽ. Rü nüma rü ngẽma taxü̃ i márétüwa nangẽxma.
4 Rü naga ya Cori ya Tupana rü napora rü guxü̃wama nangu.
5 Rü ngẽma naga ya Cori ya Tupana rü nanabüü̃chacüxü ya yima ocayiwagü ya Líbanuwa ngẽxmagüne.
6 Rü nüma rü nayaxĩã̱xcüüxẽxẽ ya yima ma̱xpǘnegü ya Líbanu rü Chirióü̃. Rü yima ma̱xpǘne ya Líbanu rü nanayuxnagüxẽxẽ ñoma wocaxacürüxü̃. Rü yima ma̱xpǘne ya Chirióü̃ rü nanayuxnagüxẽxẽ ñoma woca i yatüxü̃rüxü̃.
7 Rü naga ya Cori ya Tupana rü niyaura.
8 Rü ngẽma naga ya Cori ya Tupana rü chianexü̃ i Cadé nayadu̱xruxẽxẽ.
9 Rü ngẽma naga ya Cori rü nayawa̱xgüxẽxẽ ya yima castañagü rü nanangearü naixnecüã̱xẽxẽ i ngẽma naane. Rü napatawa rü guxü̃ma nüxü̃ nicua̱xüü̃gü.
10 Rü nüma ya Cori ya Tupana rü pucümaxã inacua̱x. Rü guxü̃guma guxarü ãẽ̱xgacü nixĩ.
11 Rü nüma ya Cori ya Tupana rü nanaporaexẽxẽ i norü duü̃xü̃gü. Rü nüxü̃ narüngü̃xẽxẽ nax tama daigu naxĩnüexü̃ca̱x.
