Salmos 30:1-12
30 Pa Cori Pa Tupanax, cuxü̃ chicua̱xüxü̃ erü cuma nixĩ i chorü da̱xawewa choxü̃ ícurüdaxẽẽamaxü̃ rü ngẽmaca̱x tama chayu. Erü cuma rü nüxna cunachu̱xu nax choxü̃ nacugüexü̃ i chorü uanügü.
2 Pa Cori Pa Chorü Tupanax, choma rü cuxna naxca̱x chaca i curü ngü̃xẽxẽ, rü cuma rü choxü̃ cungãxü̃ rü cha̱u̱xca̱x cuyataanexẽxẽ.
3 Rü nawa choxü̃ ícunguxuchixẽxẽ i ngẽma yu rü choxü̃ cumaxẽxẽ. Rü ngẽmaca̱x tama chayu.
4 Rü ngẽmaca̱x i pemax, Pa Chomücügü i aixcüma Cori ya Tupanaaxü̃́ Yaxõgüxü̃x ¡rü ngĩxã wüxigu Tupanaca̱x tawiyaegü rü nüxü̃ ticua̱xüxü̃gü ya yimá üünecü!
5 Erü ngẽma norü nu rü paxaãchimare nixĩ, natürü ngẽma norü ngü̃xẽxẽ rü taguma inayagu̱x. Rü woo chütacü ixauxegu, natürü moxü̃ãcü rü taãẽãcü tingunexü̃gü.
6 Rü choma rü yexguma taxũta chida̱xawegu rü chaugügu charüxĩnü rü ñachagürü —Ñu̱xma rü marü taxuxü̃táma i ta̱xacü choxü̃ nangupetü —ñachagürü.
7 Cumax, Pa Corix, rü choxü̃ curüngü̃xẽxẽ rü nagu charüxĩnü nax tagutáma ta̱xacürü guxchaxü̃ choxü̃ üpetüxü̃. Natürü yexguma choxna quixũgachigu rü muü̃maxã chaba̱i̱xãchi.
8 Rü cuxna nixĩ ichacaxü̃, Pa Cori Pa Tupanax, rü cuxü̃ nixĩ i chachixewexü̃.
9 Rü ñachagürü: —Pa Corix, Pa Tupanax ¿ta̱xacüwa cuxü̃́ namexü̃ ega chayu̱xgu rü cho̱xma̱xü̃wa chaxũxgu? Erü ngẽma waixü̃müte̱xe rü tama cuxü̃ nicua̱xüxü̃ rü tama nüxü̃ nixu nax cuma rü aixcümacü quixĩxü̃ —ñachagürü.
10 Pa Corix, Pa Tupanax ¡cuxü̃́ changechaü̃tümüxü̃, rü choxü̃ naxĩnü, rü choxü̃ rüngü̃xẽxẽ!
11 Rü ñu̱xma nax cha̱u̱xca̱x cuyataanexẽẽxü̃ rü ngẽma chorü ngechaü̃ rü taãẽxü̃ choxü̃́ cuyanguxuchixẽxẽ. Rü choxna cuyaxũgachixẽxẽ i ngẽma chorü ngechaü̃ rü taãxẽ choxna cuxã.
12 Rü ngẽmaca̱x wiyaegümaxã tá cuxü̃ chicua̱xüxü̃ rü guxü̃gutáma moxẽ cuxna chaxã.
