Salmos 31:1-24
31 Pa Corix, Pa Tupanax, cuxü̃tagu nixĩ i chaugü charücúxü̃ nax choxü̃ ícupoxü̃xü̃ca̱x. ¡Rü taxṹ i choxü̃ cuxoxü̃ ega curü ngü̃xẽẽca̱x íchacaxgu! ¡Rü choxü̃ ínanguxuchixẽxẽ naxme̱xwa i chorü uanügü! Erü cuma rü Tupana ya ixaixcümacü quixĩ.
2 ¡Rü ẽcü choxü̃́ nüxü̃ naxĩnü i chorü yumüxẽ! ¡Rü paxa nua naxũ rü naxme̱xwa choxü̃ ínanguxuchixẽxẽ i chorü uanügü! Rü chanaxwa̱xe i chorü poxü̃ruxü̃ nax quixĩxü̃ i cumax. Rü chanaxwa̱xe nax chorü cu̱xchicaxü̃ nax quixĩxü̃ nax tama choxü̃ yama̱xgüxü̃ca̱x.
3 Rü cuma nixĩ i chorü poxü̃ruxü̃ rü chorü cu̱xchicaxü̃. ¡Rü cuégaxü̃ cungechaü̃gagu choxna nadau rü chomaxã inacua̱x!
4 ¡Rü choxü̃ ínanguxuchixẽxẽ nawa ya yima yüta ya cha̱u̱xca̱x inaxügüne! Erü cuma nixĩ i chorü poxü̃ruxü̃ quixĩxü̃.
5 Rü cuxme̱xwa chanange̱x i chorü maxü̃. ¡Rü choxü̃ ínanguxuchixẽxẽ, Pa Corix, Pa Tupana ya Ixaixcümacüx!
6 Rü tama namaxã chataãxẽ i ngẽma duü̃xü̃gü i naxchicüna̱xãgü i taxuwama mexü̃xü̃ icua̱xüü̃güxü̃. Rü choma rü cuxü̃́icatama nixĩ i chayaxõxü̃, Pa Corix, Pa Tupanax.
7 Rü choma rü chataãẽxüchi erü choxü̃ cungechaü̃ rü chomaxã cumecüma. Erü cuma nüxü̃ cudau nax chanaxĩ̱xãchiãẽxü̃ rü nüxü̃ cucua̱x nax ngechaü̃ chingexü̃.
8 Cuma rü taxũtáma chorü uanüme̱xẽgu choxü̃ cunguxẽxẽ. Rü cha̱u̱xca̱x cunamexẽxẽ i wüxi i nachica i taxucürüwama nawa choxna nangugüxü̃.
9 Pa Corix, Pa Tupanax ¡cuxü̃́ changechaxü̃tümüxü̃! Erü ãũcümaxü̃wa changexma i ñu̱xmax. Rü ngẽma ngúxü̃ nax chingexü̃ca̱x rü changu̱xetü rü changu̱xũne rü guxü̃wama choxü̃́ nangu̱x.
10 Rü ngẽma nax ngúxü̃ chingexü̃ rü poraãcü changechaü̃ rü chaxauxecha. Rü ngẽma nax changechaü̃xü̃gagu rü chorü pora rü choxna nixũgachi rü chauxchina̱xãgü rü nituraetanü.
11 Rü choma rü norü cugüruxü̃ chixĩ i ngẽma chorü uanügü. Rü ngẽma chorü ngaicamagu ãchiü̃güxü̃ i duü̃xü̃gü rü norü ĩnücaruü̃mare choxü̃ nixĩgüxẽxẽ. Rü ngẽma choxü̃ cua̱xgüxü̃ i duü̃xü̃güca̱x, rü wüxi i ãũãchixü̃ chixĩ. Rü ngẽxguma ĩanearü namawa choxü̃ nadaugügu, rü cha̱u̱xcha̱xwa nibuxmü.
12 Rü choxü̃ inarüngü̃mae ñoma marü chayuxü̃rüxü̃. Rü ñoma wüxi i axepáü̃ i puxãchixü̃rüxü̃ chixĩ.
13 Rü duü̃xü̃gü rü chixexü̃maxã bexma choxü̃ nixugüechamare. Rü guxü̃wama nangẽxma i ãũcümaxü̃ rü poraãcü chamuü̃. Rü duü̃xü̃gü rü wüxigu nagu narüxĩnüe nax ñuxãcü choxü̃ yama̱xgüchaü̃xü̃.
14 Natürü i chomax, Pa Corix, Pa Tupanax, rü cuxü̃́ chayaxõ rü ñachagürü: —Cuma nixĩ i chorü Tupana quixĩxü̃ —ñachagürü.
15 Rü ñaa chorü maxü̃ rü cuxme̱xwa nangẽxma. Rü chanaxwa̱xe i naxme̱xwa choxü̃ ícunguxuchixẽxẽ i ngẽma chorü uanügü i chowe ingẽxü̃tanüxü̃.
16 Rü choma nax curü duü̃xü̃ chixĩxü̃, rü chanaxwa̱xe nax chomaxã cutaãẽxü̃. ¡Rü ẽcü choxü̃ ínanguxuchixẽxẽ erü cuxü̃́ changechaxü̃tümüxü̃!
17 Pa Corix, Pa Tupanax, ¡nüxna nachu̱xu i duü̃xü̃gü nax ãne choxü̃ yangexẽxẽgüxü̃, erü cuxna nixĩ i chacaxü̃! ¡Ẽcüx, ãne nüxü̃ ingexẽxẽgü i ngẽma chixexü̃gu maxẽxü̃ i duü̃xü̃gü! ¡Rü noxtacüma naxma̱xü̃ i chianexü̃ i tauquewa ngẽxmaxü̃wa namugü!
18 Rü ngẽmaãcü tá narüchianegü i ngẽma duü̃xü̃gü i dorata̱a̱xgüxü̃ i cugüwa̱xegüxü̃ rü to̱xguã̱xü̃ oexü̃ rü tümamaxã guxchigawa̱xegüxü̃ ya yíxema mexẽ ya duü̃xẽgü.
19 Pa Tupanax, cuma rü icunawe̱x nax poraãcü tümamaxã cumecümaxü̃ ya yíxema cuga ĩnüexe. ¡Rü duü̃xü̃güpe̱xewa inawe̱x nax tüxü̃ ícupoxü̃xü̃ ya yíxema cuxca̱x ĩxe nax cuxü̃tagu tarücu̱xgüxü̃ca̱x!
20 Rü yíxema mexü̃gu rüxĩnüxe rü cuma rü cupata ya üünenewa tüxü̃ ícupoxü̃ nüxna i ngẽma duü̃xü̃gü i tümachi aiexü̃ rü chixri tümachiga idexagüxü̃.
21 Rü cuma rü cumecümaxü̃chi, Pa Corix, Pa Tupanax. Yerü yexguma ãũcümaxü̃wa chayexmagu rü taxü̃ ga mexü̃ cha̱u̱xca̱x cuxü, erü choxü̃ cungechaü̃.
22 Rü yexguma guxchaxü̃wa chayexmayane rü nagu charüxĩnü nax choxna quixũgachixü̃. Natürü yexguma cuxna chacaxgu nax choxü̃ curüngü̃xẽẽxü̃ca̱x, rü cuma rü choxü̃ cuxĩnü nax aita cuxca̱x chaxüxü̃.
23 Pa Guxãma i Pema i Cori ya Tupanaaxü̃́ Yaxõgüxex ¡rü nüxü̃ pengechaxü̃güx! Erü nüma ya Cori rü tüxna nadau ya yíxema naga ĩnüexe. Natürü ngẽma tama naga ĩnüexü̃ rü tá napoxcue namaxã i ngẽma poxcu i nüxna üxü̃.
24 Rü guxãma i pema nax Cori ya Tupanaxü̃ ípenanguxẽẽgüxü̃, ¡rü peporae rü petaãxẽgü!
