Salmos 33:1-22
33 Rü pemax, Pa Duü̃xü̃gü i Tupanaga Ĩnüexü̃x ¡rü nüxü̃ picua̱xüü̃gü! Erü ngéma mexü̃gu rüxĩnüexü̃, rü name nax Cori ya Tupanaxü̃ yacua̱xüü̃güxü̃.
2 ¡Rü moxẽ nüxna pexãgü ya Cori ya Tupana! ¡Rü árpaxacümaxã rü árpa i 10 cunaxü̃maxã naxca̱x pewiyaegü rü nüxü̃ picua̱xüü̃gü!
3 ¡Rü ngexwaca̱xü̃xü̃ i wiyaegümaxã Tupanaca̱x pewiyaegü! ¡Rü mea pepaxetagüãcüma nüxü̃ picua̱xüü̃gü!
4 Rü ngẽma Cori ya Tupanaarü ore rü aixcüma nixĩ. Rü ngẽma naxüxü̃wa nango̱x nax nüma rü aixcüma yangu̱xẽẽãxü̃ i ngẽma nüxü̃ yaxuxü̃.
5 Rü nüma ya Cori ya Tupana rü namaxã nataãxẽ i ngẽma aixcüma ixĩxü̃ rü ngẽma we̱xguxü̃. Rü ngẽma norü ngechaü̃ rü ñoma i naane namaxã nanapá.
6 Rü nüma ga Cori ya Tupana rü norü dexamaxã nanaxü ga daxũguxü̃ i naane rü norü cue ñaxü̃maxã nanaxü ga guxü̃ma i ẽxtagü i ngéma ngẽxmagüxü̃.
7 Rü nüma ga Tupana rü nanaxü ga yema taxü̃ ga már i mátamaxü̃. Rü yema norü dexá rü wüxitama ga nachicawa nanayexmaxẽxẽ.
8 Pa Guxü̃ma i Ta̱xacü i Ñoma i Naanewa Ngẽxmagüxü̃x ¡rü Tupanaxü̃ picua̱xüü̃gü! Rü guxãma i pemax, Pa Ñoma i Naanecüã̱x i Duü̃xü̃güx ¡rü nüxü̃ picua̱xüü̃gü!
9 Yerü nüma rü norü dexamaxã guxü̃ma naxü. Rü nanamu rü guxü̃ma mea inanu.
10 Rü nüma ya Cori ya Tupana rü nagu nayanaxoxẽxẽ i ngẽma nagu naxĩnüexü̃ i ngẽma duü̃xü̃gü i tama nüxü̃́ yaxõgüxü̃.
11 Natürü ngẽma nüma ya Cori ya Tupana nagu rüxĩnüxü̃ rü guxü̃guma nangẽxmaecha rü taguma narüxo.
12 Rü nataãẽgü i ngẽma duü̃xü̃gü i Cori ya Tupanamaxã Tupanaã̱xgüxü̃ rü ngẽma duü̃xü̃gü ya Cori ya Tupana nügüxü̃́ dexü̃.
13 Rü nüma ya Cori ya Tupana rü daxũguxü̃ i naanewa ínadawenü, rü nüxü̃ nadau i guxü̃ma i duü̃xü̃gü.
14 Rü ngẽma daxũguxü̃ i naane i nawa nangẽxmaxü̃wa nixĩ i tüxü̃ nangugüxü̃ ya yíxema ñoma i naanewa ngẽxmagüxe.
15 Rü nüma nixĩ i maxü̃ tüxna naxãxü̃ rü nüxü̃ nacuáxü̃ i guxü̃ma i ngẽma taxügüxü̃.
16 Rü taxucüma ya ãẽ̱xgacü ya woo muarü churaraã́cü rü tá nügü ínapoxü̃ ega tama Tupana nüxü̃ rüngü̃xẽẽgu. Rü bai ya wüxi ya yatü ya poraxüchicü rü tá norü poramaxã nügü ínapoxü̃ ega tama Tupana naxü̃tawa ngẽxmagu.
17 Rü woo cowarugü i poraxüchixü̃ rü taxuacüma norü yoraxü̃ ínapoxü̃ ega tama Tupana nüxü̃ rüngü̃xẽẽgu.
18 Natürü nüma ya Cori ya Tupana rü guxü̃guma tüxna nadau ya yíxema nüxü̃ ngechaü̃güxe rü nüxü̃́ yaxõgüxe.
19 Rü yuwa tüxü̃ ínapoxü̃ rü maxü̃ tüxna naxã ega ñoma i naanewa taiya ínguxgu.
20 Rü Tupanaxü̃tagu nixĩ i nüxü̃ yarüngauxü̃ i tórü maxü̃. Erü nüma nixĩ i tüxü̃ nangü̃xẽẽxü̃ rü tüxü̃ ínapoxü̃xü̃.
21 Rü ngẽmaca̱x tórü Cori ya Tupanamaxã tataãẽgü, rü naéga i üünexü̃axü̃́ tayaxõgü.
22 Pa Corix, Pa Tupanax, tanaxwa̱xe nax toxü̃ cuxümücüxü̃ namaxã i curü ngechaü̃ i taxü̃. Rü ngẽma nixĩ i cuxü̃tawa ítanangu̱xẽẽxü̃.
