Salmos 34:1-22
34 Rü guxü̃ i oragu rü Cori ya Tupanamaxã tá mexü̃ chaxuegu, rü cha̱u̱a̱xmaxã rü guxü̃gutáma nüxü̃ chicua̱xüxü̃.
2 Rü chauãẽwa Cori ya Tupanaxü̃ chicua̱xüxü̃. Rü ngẽma mexü̃gu rüxĩnüexü̃ rü tá nüxü̃́ naxĩnüe i chorü ore i namaxã nüxü̃ chicua̱xüxü̃, rü tá nataãẽgü.
3 ¡Rü ngĩxã wüxigu Tupanaxü̃ ticua̱xüü̃gü rü wüxigu tanatachigaxẽxẽ i naéga!
4 Rü Cori ya Tupanana chaca rü nüma rü choxü̃ nangãxü̃, rü choxü̃ ínanguxuchixẽxẽ nawa i guxü̃ma i chorü oegaãẽgü.
5 Rü yíxema Cori ya Tupanaxü̃ rüdaunüxe nax tüxü̃ nangü̃xẽẽxü̃ca̱x rü guxü̃gutáma tataãẽgü, rü tagutáma ãne tingegü.
6 Rü daa yatü ya taxuxü̃ma ixĩcü rü Cori ya Tupanana naca, rü nüma nüxü̃ naxĩnü rü ínananguxuchixẽxẽ nawa ga guxü̃ma ga norü oegaãẽgü.
7 Rü Cori ya Tupanaarü orearü ngeruxü̃ i daxũcüã̱x rü tümatanüwa nangẽxma ya yíxema Cori ya Tupanaxü̃ muü̃xe, rü tüxü̃ ínapoxü̃.
8 ¡Rü nüxü̃ pexü̱x rü tá nüxü̃ pedau nax namecümaxü̃ ya Cori ya Tupana! Rü nataãxẽ ya yimá yatü ya Cori ya Tupanaaxü̃́ yaxõcü.
9 Rü pema i aixcüma Cori ya Tupanaxü̃ ngechaü̃güxe, rü name nixĩ i nüxü̃ pemuü̃xe. Rü yíxema nüxü̃ muü̃xe rü taxuxü̃táma ta̱xacü tüxü̃́ nataxu.
10 Rü ngẽma leóü̃xacügü rü naturae rü taiya nüxü̃́ nangu̱x. Natürü yíxema Cori ya Tupanaarü ngü̃xẽẽca̱x daugüxe rü taxũtáma ta̱xacü tüxü̃́ nataxu.
11 Pa Chauxacügüx ¡nua pexĩ rü choxü̃́ iperüxĩnüe! Rü pexü̃ tá changúexẽxẽ nax Cori ya Tupanaxü̃ pemuü̃exü̃.
12 ¿Cunaxwa̱xexü̃ nax cutaãẽxü̃ rü nax namáxü̃ i curü maxü̃ i ñoma i naanewa?
13 ¡Rü naxuãxẽ rü nüxna nadau ya curü conü nax tama chixexü̃xü̃ yaxuxü̃ca̱x! ¡Rü nüxna nadau i cuberagü nax tama doraxü̃ quixuxü̃ca̱x!
14 ¡Rü nüxna ixũgachi i guxü̃ma i chixexü̃ rü mexü̃ naxü! ¡Rü naxca̱x nadau nax taxúemaxãma nax cuguxchaxü̃ã́xü̃! ¡Rü ngẽmaãcü mea namaxü̃!
15 Erü nüma ya Cori ya Tupana rü tüxna nadau ya yíxema aixcüma mea maxẽxe. Rü tüxü̃́ nüxü̃ naxĩnü i tümaarü yumüxẽ.
16 Natürü nüxü̃ naxo i ngẽma chixexü̃ ügüxü̃ rü inayanaxoxẽxẽ i ñoma i naanewa nax taxúema nüxna cua̱xãchixü̃ca̱x.
17 Rü yíxema ixaixcümagüxe rü Cori ya Tupanaarü ngü̃xẽẽca̱x ítacagü, rü nüma rü nüxü̃ naxĩnü i tümaarü yumüxẽ rü guxü̃ma i tümaarü oegaãẽgüwa tüxü̃ ínanguxü̃xẽxẽ.
18 Rü nüma ya Cori ya Tupana rü ínamemare nax tüxü̃ nangü̃xẽẽxü̃ ya yíxema ngúxü̃ ingegüxe Rü tüxü̃ ínanguxü̃xẽxẽ ya yíxema ngechaxü̃ ingegüxe.
19 Rü yimá yatü ya ixaixcümacü rü namu i norü guxchaxü̃gü. Natürü nüma ya Cori ya Tupana rü ínananguxuchixẽxẽ nawa i guxü̃ma i ngẽma.
20 Rü nüma ya Tupana rü guxü̃wama nüxna nadau rü woo naxchina̱xãgü rü nüxna nadau nax tama yabüyexü̃ca̱x.
21 Rü ngẽma duü̃xü̃ i chixexü̃ ügüxü̃ rü ngẽma norü guxchaxü̃gu tátama nayi. Rü ngẽma tümachi aixü̃ ya yíxema mexü̃ üxe rü Tupana tá nanapoxcu.
22 Natürü nüma ya Cori ya Tupana rü tüxü̃ ínapoxü̃ ya yíxema norü duü̃xü̃gü ixĩgüxe. Rü tama poxcu tümamaxã naxuegu ya yíxema nüxü̃́ yaxõgüxe.
