Salmos 35:1-28
35 Pa Cori Pa Tupanax ¡naxca̱x íyaxüãchi i ngẽma cha̱u̱xca̱x yaxüãchixü̃, rü nadai i ngẽma choxü̃ ima̱xgüchaü̃xü̃!
2 ¡Rü ẽcü nayaxu i curü poxü̃ruxü̃ rü curü tüxünexü̃ rü nua naxũ rü choxü̃ rüngü̃xẽxẽ!
3 ¡Rü nayaxu ya curü wocaxe nax namaxã cunada̱i̱xü̃ca̱x i ngẽma chowe ingẽxü̃tanüxü̃! ¡Rü chomaxã nüxü̃ ixu nax cuma yixĩxü̃ i choxü̃ cumaxẽxẽxü̃!
4 ¡Rü yabuxmüxẽxẽ i ngẽma choxü̃ ima̱xgüchaü̃xü̃! ¡Rü yabuxmüxẽxẽ rü naxãneexẽxẽ i ngẽma choxü̃ chixexẽẽgüchaü̃xü̃!
5 ¡Rü namu i curü orearü ngeruxü̃ i daxũcüã̱x nax ínawoxü̃ãxü̃ca̱x ñoma buanecü maxẽ ya pacü ngĩãnexẽẽxü̃rüxü̃!
6 ¡Rü ngẽma norü nama i chorü uanügü rü naxẽanexẽxẽ rü nacoramaexẽxẽ! Rü chanaxwa̱xe i curü orearü ngeruxü̃ i daxũcüã̱x nawe ningẽchigü.
7 Rü woo taxuxü̃ma i chixexü̃ chaxüyane rü nümagü rü yütagu choxü̃ nangu̱xẽẽgüchaü̃. Rü woo taxuxü̃ma i chixexü̃ chaxüyane rü nümagü rü bexma nanaxügü i wüxi i ãxmaxü̃ nax ngẽmagu chingucuchixü̃ca̱x.
8 ¡Rü ẽcü ngürüãchi guxchaxü̃gu nayi̱xixẽxẽ nax ngẽma nümatama namexẽẽgüxü̃ i ãxmaxü̃gu nayi̱xixü̃ca̱x rü ngẽmaãcü nagu yanachixexü̃ca̱x!
9 Natürü i chomax rü Cori ya Tupanamaxã tá chataãxẽ erü choxü̃ tá ínapoxü̃.
10 Rü guxü̃ma i chorü maxü̃maxã rü ñacharügü tá: —¿Texé cumaxã tawüxigu, Pa Cori Pa Tupanax? Erü yíxema ngearü diẽruã̱xgüxe rü taxuxü̃ma tüxü̃́ ngẽxmagüxe, rü cuma rü tüxü̃ ícupoxü̃ nüxna i ngẽma tüxü̃ rüporamaegüxü̃ rü ngẽma chixri tümaarü puracü ütanügüxü̃ —ñachagürü tá.
11 Rü ñu̱xma rü ínangugü i duü̃xü̃gü i chixexü̃gü i doraxü̃ ixugüxü̃. Rü choxna naxca̱x nacagüe i chixexü̃ i choma tama nüxü̃ chacuáxü̃.
12 Rü yema mexü̃ ga naxca̱x chaxüxü̃ rü chixexü̃maxã choxü̃́ nanatáeguxẽẽgü. Rü ngẽma rü poraãcü ngechaxü̃ choxna naxã.
13 Rü yexguma nümagü yada̱xaweegu rü choma rü naxca̱x chaxoegaãxẽ rü naxchiru ga témüxü̃gu chicu̱x. Rü tama chachibü rü naxca̱x chayumüxẽ.
14 Rü choma rü naxca̱x changechaxü̃ rü ñoma chaué yuxü̃rüxü̃ rüe̱xna wüxi i chomücü yuxü̃rüxü̃ rüe̱xna chauenexẽ yuxü̃rüxü̃ chixĩ.
15 Natürü yexguma guxchaxü̃ cha̱u̱xca̱x ínguxgu, rü nümagü rü naxĩtaque̱xe rü choxü̃ nacugüe ñoma tama choxü̃ nacua̱xgüxü̃rüxü̃. Rü yemaacü chixexü̃maxã choxü̃ nixugüecha.
16 Rü ngúxü̃ choxü̃ ningexẽẽgü rü choxü̃ nacugüe rü numaxã choxna nadaugü. Rü yemaacü chauxchi naxaie.
17 Pa Cori Pa Tupanax ¿ñuxguratáta i nüxü̃ curüchauxü̃ nax ngéma nüxü̃ cudawenümarexü̃ i ngẽma duü̃xü̃gü i ñoma leóü̃gürüxü̃ cha̱u̱xca̱x inginetanücüüxü̃? ¡Rü nüxna choxü̃ ínapoxü̃ nax tama choxna nayauxgüãxü̃ca̱x i ngẽma nügümaxã choxü̃́ wüxicáxü̃ i chorü maxü̃!
18 Rü ñu̱xũchi i choma rü tá moxẽ cuxna chaxã nape̱xewa i ngẽma muxũchixü̃ i curü duü̃xü̃gü. Rü guxü̃ma i ngẽma duü̃xü̃güpe̱xewa rü tá cuxü̃ chicua̱xüxü̃.
19 Rü tama chanaxwa̱xe i natüca̱xma choxü̃ nacugüe i chorü uanügü. Rü tama chanaxwa̱xe nax choxna nanuxetügüxü̃ i ngẽma duü̃xü̃gü i chauxchi aiexü̃ woo taxuxü̃ma i chixexü̃ chaxüyane.
20 Rü nümagü rü tama ngüxmüeca̱x nadaugü. Natürü ngẽma naxca̱x nadaugüxü̃ nixĩ nax tümaechitawa̱xegüxü̃ ya yíxema ñaa nachixü̃anewa mexü̃gu rüxĩnüexe.
21 Rü poraãcü choxü̃ nacugüe rü chauchiga nidexagü rü ñanagürügü: —Dücax, toxetümaxã nüxü̃ tadau nax chixexü̃ naxüxü̃ —ñanagürügü.
22 Pa Corix, cuma rü meama nüxü̃ cucua̱x i ngẽma naxügüxü̃ i ngẽma duü̃xü̃gü. ¡Rü taxṹ i cunangexrüxü̃ nax naxügüxü̃ca̱x i ngẽma chixexü̃! ¡Rü taxṹ i choxna quixũgachixü̃!
23 Pa Corix, Pa Chorü Tupanax ¡írüda rü chauétüwa nachogü!
24 Pa Corix, Pa Chorü Tupanax, cuma nax mecü quixĩxü̃ ¡rü choxü̃ nangugü! Erü tama chanaxwa̱xe nax choxü̃ nacugüexü̃ i chorü uanügü.
25 Rü tama chanaxwa̱xe i chauchiga nidexagü rü chauchiga chixexü̃gu narüxĩnüe ñaxü̃maxã: —Ñaa nixĩ i ngẽma inaxwa̱xegüxü̃ rü düxwa marü chixexü̃gu tananguxẽxẽ —ñanagürügü.
26 Rü ñu̱xma chanaxwa̱xe i ãne ningegü i ngẽma duü̃xü̃gü i taãẽgüxü̃ naxca̱x nax chixexü̃gu changuxü̃. Rü chanaxwa̱xe i guxü̃wama ãne ningegü i ngẽma nügü ixugüexü̃ nax choxü̃ nayexeragüxü̃.
27 Natürü yíxema naxwa̱xegüxe nax chorü uanügüxü̃ charüporamaegüxü̃, rü name nixĩ i taãẽãcü guxü̃guma tagaãcü ñatarügügü: —Nüma ya Cori ya Tupana rü namecümaxüchi. Rü namaxã nataãxẽ i ngẽxguma norü duü̃xü̃ mexü̃ nüxü̃ ngupetügu —ñatarügügü.
28 Rü choma rü chorü conümaxã tá nüxü̃ chixuchiga nax cuma rü ãẽ̱xgacü ya mecü nax quixĩxü̃. Rü guxü̃ i ngunexü̃gu tá cuxü̃ chicua̱xüxü̃.
