Salmos 37:1-40
37 ¡Taxṹ i cunaxĩ̱xãchiãẽxü̃ namaxã i ngẽma duü̃xü̃gü i chixexü̃gu maxẽxü̃! ¡Rü taxṹ i quixãũxãchixü̃ i ngẽma chixexü̃ ügüxü̃!
2 Erü ngẽma duü̃xü̃gü rü paxa tá inayarüxo ñoma maxẽ ya rüñẽ̱xẽcürüxü̃ rü ñoma natüane i pagüxü̃rüxü̃.
3 ¡Rü nüxü̃ yaxõ ya Cori ya Tupana rü mexü̃ naxü! ¡Rü mea ñoma i naanewa namaxü̃ rü aixcüma mexü̃ naxü!
4 ¡Rü aixcüma nüxü̃ nangechaxü̃ ya Cori ya Tupana! Rü nüma rü tá nayanguxẽxẽ i ngẽma cuma nagu curüxĩnüxü̃.
5 ¡Rü Cori ya Tupaname̱xẽgu naxǘ i curü maxü̃! ¡Rü nüxü̃́ yaxõ! Rü nüma rü tá cuxü̃ narüngü̃xẽxẽ.
6 Rü nüma rü tá nanango̱xẽxẽ nax cumexü̃ rü quixaixcümaxü̃ ñoma üa̱xcü tocuchigu ibáxixü̃rüxü̃.
7 Rü name nax cungea̱xmarexü̃ nape̱xewa ya Cori ya Tupana. ¡Rü yáxna naxĩnü! Rü nüma rü tá cuxü̃ narüngü̃xẽxẽ. ¡Rü taxṹ i quixãũãchixü̃ ega ngẽma chixexü̃ ügüxü̃ rü namuarü ngẽmaxü̃ã̱xgügu rü mea yaxũxgu i ngẽma nagu naxĩnüexü̃!
8 ¡Rü nüxü̃ rüxo nax cunuxwa̱xexü̃ rü nüxna ixũgachi nax cunuxü̃! ¡Rü taxṹ i nugu curüxĩnüxü̃! Erü ngẽxguma ngẽmagu curüxĩnügu rü yexera cugütama cuchixeãxẽ.
9 Erü ngẽma duü̃xü̃gü i chixexü̃gu rüxĩnüexü̃ rü tá ínawoxü̃ nawa i ñaa nachixü̃ane. Natürü ngẽma duü̃xü̃gü i Cori ya Tupanaaxü̃́ yaxõgüxü̃ tá nixĩ i nayauxgüxü̃ i ñaa nachixü̃ane.
10 Rü paxa tá inayarüxo i ngẽma chixexü̃ ügüxü̃. Rü woo tá naxca̱x cuda̱u̱xgu rü taxugutáma nüxü̃ icuyangau.
11 Natürü yíxema Cori ya Tupanape̱xewa mexü̃gu rüxĩnüexe tá tixĩ ya nayauxgüxe i ñaa naane. Rü ngẽmawa tá nixĩ i aixcüma tataãẽgüxü̃.
12 Rü ngẽma duü̃xü̃gü i chixexü̃gu rüxĩnüexü̃ rü naxca̱x nadaugü nax ñuxãcü tá chixexü̃gu nanguxẽxẽãxü̃ ya yimá yatü ya mecü. Rü nuãcüma nüxü̃ nadawenü.
13 Natürü nüma ya Cori ya Tupana rü nüxü̃ nacugü. Erü nüxü̃ nacua̱x nax marü yangaicaxü̃ i norü poxcu i ngẽma duü̃xü̃gü i chixexü̃gu rüxĩnüexü̃.
14 Rü ngẽma chixexü̃gu rüxĩnüexü̃ rü norü tara nanatúxuchi, rü norü würaxü̃ natú nax tüxü̃ namaxü̃xü̃ca̱x ya yíxema taxuxü̃ma tüxü̃́ ngẽxmaxe rü yíxema mexü̃gu rüxĩnüxe. Rü ngẽmaãcü tüxü̃ nadaixchaü̃ ya yíxema mecümagüxe.
15 Natürü ngẽma norü tara tátama nixĩ i norü maxü̃newa yarüwáxü̃, rü yima norü würagü rü íxraxü̃gu tá inabüe.
16 Rü ngẽma muxü̃ i diẽru i ngẽma duü̃xü̃gü i chixexü̃ nüxü̃́ ngẽxmaxü̃arü yexera name nixĩ i ngẽma noxretama i nüxü̃́ ngẽxmaxü̃ ya yimá yatü ya mexü̃gu rüxĩnücü.
17 Erü nüma ya Cori ya Tupana rü tá inayanaxoxẽxẽ i ngẽma duü̃xü̃gü i chixexü̃ ügüxü̃. Natürü tá tüxü̃ narüngü̃xẽxẽ ya yíxema mexü̃gu rüxĩnüxe.
18 Rü nüma ya Cori ya Tupana rü tüxna nadau ya yíxema mexü̃gu rüxĩnüexe. Rü tümaane rü guxü̃táma tümataagüwa naxüe.
19 Rü ngẽxguma guxchaxü̃gü íngugügu, rü taiya ngu̱xgu, rü taxũtáma ãne tinge ya yíxema mexü̃gu rüxĩnüexe, erü õna rü tá tüxü̃́ ningu.
20 Natürü ngẽma chixexü̃ ügüxü̃ rü ñoma maxẽ ya ipagücü iguxü̃rüxü̃ tá inayarüxogü. Rü ngẽma Tupanaarü uanügü rü ñoma taemaxü̃rüxü̃ tá inayarütauxe.
21 Rü ngẽma duü̃xü̃ i chixexü̃ rü ngẽxguma texéxü̃tawa diẽruca̱x ínaca̱xgu rü taguma nanatáeguxẽxẽ. Natürü yimá yatü ya mecü rü nüxü̃́ tangechaü̃tümüxü̃ ya namücü rü norü ngẽmaxü̃gü tümamaxã nangau.
22 Rü yíxema Cori ya Tupana tüxü̃ rüngü̃xẽẽgüxe rü tümaarü tá nixĩ i naane. Natürü i ngẽma tama naga ĩnüexü̃ rü Tupana tá chixexü̃wa nanawogü rü tá inayarüxogü.
23 Rü yimá yatü ya mecü rü Cori ya Tupana rü ngẽma nama i mexü̃wa nanaga. Rü ngẽxguma ngẽma namagu yaxũxgu ya yimá yatü rü nüma ya Cori rü nataãxẽ.
24 Rü woo ega nanguxgu ya yimá yatü rü taxũtáma ngéma nangẽxmaecha, erü nüma ya Cori ya Tupana rü naxme̱xgu ningĩ rü wenaxarü inanachixẽxẽ.
25 Rü yexguma changextü̱xügu rü ñu̱xma nax chayáxü̃gu rü taguma nüxü̃ chadau nax ngexta nata̱xmarexü̃ ya wüxi ya yatü ya mexü̃ ücü, rü woo i nanegü i nüxü̃ chadauxü̃ i ngextá paũca̱x nax naca̱a̱xü̃wa̱xegüxü̃.
26 Rü nüma ya yimá yatü ya mecü rü guxü̃guma duü̃xẽ nüxü̃́ tangechaü̃tümüxü̃ rü tüxna nanaxã ega ta̱xacüca̱x nüxna tacagügu. Rü nanegü rü norü taãẽxẽẽruxü̃ nixĩgü.
27 ¡Rü nüxna ixũgachi i ngẽma chixexü̃, rü mexü̃ naxü! Rü ngẽmaãcü guxü̃gutáma cuxü̃́ nangẽxma i cuchica i nawa tá cumaxü̃xü̃ i ñoma i naanewa.
28 Erü nüma ya Cori ya Tupana rü nüxü̃ nangechaü̃ i ngẽma maxü̃ i we̱xguxü̃, rü taguma tüxü̃ ínawogü ya yíxema aixcüma nawe rüxĩxe. Rü guxü̃gutáma tüxna nadau. Natürü ngẽma chixexü̃gu maxẽxü̃, rü Tupana tá inayanaxoxẽxẽ i nanegü rü nataagü.
29 Natürü ngẽma mexü̃gü rü noxrü tá nixĩ i ñaa naane rü guxü̃gutáma nawa namaxẽ.
30 Rü yimá yatü ya mecü rü mea nüxü̃ nacuáãcüma nidexa, rü ngẽxguma yadexaxgu rü aixcümaxü̃ nixu.
31 Rü nügüãẽgu namaxã nanguxü̃ i Tupanaarü ore. Rü ngẽmaca̱x i ngextá ínaxũxü̃wa rü naxuãxẽ nax tama chixexü̃gu nanguxü̃ca̱x.
32 Rü ngẽma duü̃xü̃ i chixexü̃ rü nanangugü ya yimá yatü ya mecü, rü naxca̱x nadau nax ñuxãcü yamáaxü̃ca̱x.
33 Natürü nüma ya Cori ya Tupana rü tá ínanapoxü̃ ya yimá yatü ya mecü nax tama ngẽma chixexü̃ i duü̃xü̃güme̱xẽgu nanguxü̃ca̱x. Rü tá nüxna nadau nax tama yanaguãchixẽẽgüaxü̃ca̱x i ta̱xacü rü chixexü̃.
34 Rü cumax, Pa Duü̃xü̃x ¡Cori ya Tupanaaxü̃́ yaxõ rü naga naxĩnü! Rü nüma rü tá cuxü̃ nicua̱xüxü̃ rü tá cuxna nanaxã i ñaa nachixü̃ane nax cuxrü yixĩxü̃ca̱x. Rü cuxetümaxã tá nüxü̃ cudau nax ñuxãcü yanaxoxü̃ i ngẽma chixexü̃ ügüxü̃.
35 Rü nüxü̃ chadau i ngẽma duü̃xü̃ i chixecümaxü̃ nax nügü yacua̱xüü̃xü̃ rü nügü ínatagüxü̃ ñoma wüxi i nai i taetaxü̃rüxü̃.
36 Natürü ngẽxguma wena ínangexmaxü̃wa chaxüpetügux, rü naxca̱x chadau rü marü nataxuma, rü taxuxü̃ma ichayangau.
37 ¡Natürü, dücax, nangugü ya yimá duü̃ ya aixcüma mecü rü mexü̃gu rüxĩnücü! Rü ngẽma tá naxca̱x ínguxü̃ rü taãxẽ nixĩ.
38 Natürü guxü̃ma i ngẽma pecadua̱xgüxü̃ rü tá inayarüxo. Rü ngẽma nanegü rü nataagü rü ngẽxma tá nayacua̱x.
39 Natürü ngẽma duü̃xü̃gü i mexü̃ rü Tupanawa nixĩ i ne naxũxü̃ i norü ngü̃xẽxẽ. Rü nüma nixĩ i nüxna nadauxü̃ ega guxchaxü̃ naxca̱x ínguxgu.
40 Rü nüma ya Cori ya Tupana rü nüxü̃ narüngü̃xẽxẽ nax tama ngẽma chixexü̃ i duü̃xü̃güme̱xẽgu nayi̱xixü̃ca̱x. Erü Tupanana naxca̱x ínaca i norü ngü̃xẽxẽ nax ínapoxü̃ãxü̃ca̱x.
