Salmos 38:1-22
38 Pa Cori Pa Tupanax, ngẽxguma chaugagu cunuxgu rü tama chanaxwa̱xe i choxü̃ cungax. ¡Rü taxṹ i curü numaxã choxü̃ cuxüáxü̃!
2 Rü yima cuxne rü chowa narüwa̱xgü rü cuxme̱xmaxã choxü̃ quima̱x.
3 Rü ngẽma chorü chixexü̃gagu nixĩ i chomaxã cunuxü̃. Rü ngẽmaca̱x i ñaa chaxune rü guxü̃wama nida̱xawe rü bai ya wüxi ya chauxchina̱xã ya mexü̃ne.
4 Rü ngẽma chorü pecadugü rü nayaxüchi rü chauétügu nangu rü tama namaxã chapora.
5 Rü choma rü tama chauãẽxü̃ chacua̱x, rü ngẽmagagu chorü o̱xri rü niyixi rü naxãxü̃chíxü.
6 Rü ngẽxgumarüxü̃ ta chamatáxü̃ rü guxü̃ma i ngunexü̃gu changechaü̃ rü chanaxĩ̱xãchiãxẽ.
7 Rü poraãcü chixaxüne. Rü guxü̃wama i chaxunewa rü chida̱xawe.
8 Rü chatura rü changearü poraã̱x. Rü chixãĩnecüü erü chorü maxü̃newa poraãcü ngúxü̃ chinge.
9 Pa Cori Pa Tupanax, cuma rü meama nüxü̃ cucua̱x i guxü̃ma i chorü ngúchaü̃gü. Rü marü nüxü̃ cuxĩnü nax chixainecüüxü̃.
10 Rü chorü maxü̃ne rü poraãcü nidu̱xru rü ngẽma chorü pora rü nigúchigü. Rü woo ya yima chauxetügü rü nixogüchigü.
11 Rü chomücügü rü woo chautanüxü̃ rü choxna nayáxü̃gugü naxcha̱xwa i ngẽma chorü o̱xrigü.
12 Rü ngẽma choxü̃ ima̱xgüchaü̃xü̃ rü chope̱xegu nananu i norü yütagü. Rü ngẽma choxü̃ chixexẽẽgüchaü̃xü̃ rü nügümaxã nagu narüxĩnüe nax ñuxãcü tá chixexü̃gu choxü̃ nanguxẽẽgüxü̃. Rü guxü̃ i oragu rü chauchiga doraxü̃ nixugü.
13 Natürü i choma rü chaugü changauchi̱xẽxẽxẽ rü ñoma tama nüxü̃ chaxĩnüxü̃rüxü̃ chixĩ. Rü ñoma ngeã́xü̃rüxü̃ tama nüxü̃ changãxü̃.
14 Rü nape̱xewa i chorü uanügü rü ñoma wüxi i ngauchi̱xẽxü̃rüxü̃ chaugü chixĩxẽxẽ. Rü taxucürüwa ta̱xacürü oremaxã chaugü íchapoxü̃.
15 Pa Cori Pa Chorü Tupanax, curü ngü̃xẽxẽ nixĩ íchananguxẽẽxü̃. Rü chanaxwa̱xe nax cuma yixĩxü̃ i cunangãxü̃xü̃ i ngẽma chorü uanügü.
16 Rü ngẽma cuxna naxca̱x chacaxü̃ nixĩ nax tama choxü̃ nacugüexü̃ i chorü uanügü rü tama nügü yacua̱xüü̃güxü̃ca̱x i ngẽxguma changuxgu.
17 Rü aixcüma nixĩ nax chaturaxü̃. Rü ngẽma nax choxü̃́ nangúxü̃ rü taguma choxü̃ narüna.
18 Rü ñu̱xmax, Pa Tupanax, rü cumaxã nüxü̃ chixu i ngẽma chorü pecadugü erü naxca̱x chaugü íchicua̱x ga yema chixexü̃ ga chaxüxü̃.
19 Rü ngẽma chorü uanügü rü nimuetanü, rü namuxũchi i ngẽma natüca̱xma chauxchi aiexü̃.
20 Rü ngẽxguma mexü̃ naxca̱x chaxü̱xgu rü chixexü̃maxã choxü̃́ nanaxütanügü. Rü ngẽxguma mexü̃ca̱x chada̱u̱xgu rü nümagü rü chomaxã nanue.
21 Pa Corix ¡taxṹ i choxna quixũgachixü̃! Pa Chorü Tupanax ¡Taxṹ i choxna cuyáxü̃guxü̃!
22 Pa Corix, Pa Chorü Maxẽxẽruxü̃x ¡paxa nua naxũ nax choxü̃ curüngü̃xẽxẽxü̃ca̱x!
