Salmos 4:1-8
4 Pa Chorü Poxü̃ruxü̃, Pa Tupanax, ¡choxü̃ nangãxü̃ ega cuxna chacaxgu! Rü ngẽxguma ngúxü̃ chingexgu, rü cuma nixĩ i choxü̃ cutaãẽxẽẽxü̃. Rü cuxü̃́ changechaü̃tümüxü̃ rü ¡choxü̃́ nüxü̃ naxĩnü i chorü yumüxẽ!
2 Rü pema nax petachigaxü̃ ¿rü ñuxguxüratáta i nüxü̃ perüxoexü̃ nax choxü̃ picugüexü̃ rü ãne choxü̃ pingexẽẽxü̃? ¿Rü ñuxguxüratáta i nüxna pixĩgachixü̃ nax nagu pemaxẽxü̃ i pecümagü i chixexü̃ i taxuwama mexü̃ rü natüca̱xmamare ixĩxü̃?
3 Nüma ya Cori rü tüxü̃ nicua̱xüxü̃ ya yíxema duü̃xẽ ya aixcüma naga ĩnüxe. Rü nüma ya Cori rü choxü̃ naxĩnü ega norü ngü̃xẽẽca̱x nüxna chacaxgux.
4 ¡Rü nüxü̃ pemuü̃e rü nüxü̃́ iperüxĩnüe! ¡Rü marütama nax chixexü̃ pexügüxü̃! Rü ngẽxguma ipeyacaxãchitanügu i perü pechicaxü̃wa, ¡rü peãxẽwa pegü pengugü nax ñuxãcü yixĩxü̃ i perü maxü̃ i Tupanape̱xewa!
5 ¡Rü Tupanana penaxã i ngẽma ãmaregü i nüma namaxã nataãẽxü̃! ¡Rü guxü̃guma nüxü̃́ peyaxõgü!
6 Rü muxü̃ma i duü̃xü̃gü rü ñanagürügü: —¿Texé tá tüxü̃ tarüngü̃xẽxẽ? —ñanagürügü. Pa Corix ¡cuxü̃́ tangechaxü̃tümüxü̃gü rü toxü̃ rüngü̃xẽxẽ!
7 Ngẽma duü̃xü̃gü i muxü̃ma i trigu rü tacü ya bínu nüxü̃́ ngẽxmagüxü̃arü yexera rü cuma rü taãxẽ choxna cuxã.
8 Choma rü taãẽãcü ichayacaãchi rü ngẽxgumatama mea chape, erü nüxü̃ chacua̱x, Pa Corix, nax cuma rü choxna cudauxü̃.
