Salmos 40:1-17
40 Choma rü íchananguxẽxẽ nax choxü̃ nangü̃xẽẽxü̃ca̱x ga Cori ya Tupana. Rü nüma rü nüxü̃ naxĩnü ga chorü yumüxẽ.
2 Rü yema ãxmaxü̃ ga dexááxü̃ ga nagu iyuxü̃wa choxü̃ ínanguxuchixẽxẽ. Rü ãcharaxanexü̃wa choxü̃ nanatúxuchi. Rü wüxi ga nutawa choxü̃ inachixẽxẽ. Rü taixanexü̃waama choxü̃ naga nax íchixũxü̃ca̱x.
3 Rü wüxi ga yexwaca̱xü̃xü̃ ga wiyae cha̱u̱a̱xwa nanguxẽxẽ nax yemamaxã nüxü̃ chicua̱xüxü̃xü̃ca̱x ga Tupana. Rü muxü̃ma ga duü̃xü̃gü rü nüxü̃ nadaugü ga yema Tupana üxü̃ rü namuü̃e rü nüxü̃́ nayaxõgü.
4 Rü tataãxẽ ya yíxema Cori ya Tupanaaxü̃́ yaxṍxe, rü tama duü̃xü̃gü i chixexü̃ ügüxü̃gu naxca̱x dauxe i tümaarü ngü̃xẽxẽ rü tama tupananetachicüna̱xãgüxü̃ icua̱xüxü̃xẽ.
5 Pa Cori Pa Chorü Tupanax, namuxũchima nixĩ ga yema mexü̃gü ga curü poramaxã cuxüxü̃. Rü namuxũchi ga yema mexü̃gü ga toxca̱x cuxüxü̃. Rü yema nax namuxũchixü̃, rü ngẽmaca̱x taxucürüwama nüxü̃ chixu i guxü̃ma ga yema mexü̃gü ga toxca̱x cuxüxü̃.
6 Cuma rü tama namaxã cutaãxẽ nax ta̱xacü cuxca̱x ínaguxü̃, rü ãmaregü i cuxna naxãgüxü̃. Rü tama naxca̱x ícuca i ãmaregü i cuxca̱x ínaguxü̃ rü ãmaregü i pecaduarü ütanüruxü̃ ixĩgüxü̃. Natürü cuma rü cuyawaxna i chauxchi̱xẽ nax cuxü̃́ ichaxĩnüxü̃ca̱x.
7 Rü ngẽmaca̱x cumaxã nüxü̃ chixu rü daxe chixĩ rü chaugü ichaxã ngẽma curü orewa naxümatüxü̃rüxü̃.
8 Rü chomax, Pa Chorü Tupanax, rü namaxã chataãxẽ nax curü ngúchaü̃ chaxüxü̃. Rü chauãẽgu namaxã changuxü̃ i ngẽma curü ngu̱xẽẽtae.
9 Rü yema taxü̃ ga ngutaque̱xewa rü duü̃xü̃güpe̱xewa meama nüxü̃ chixu nax cuma rü ixaixcümacü quixĩxü̃. Rü cuma rü meama nüxü̃ cucua̱x nax tama changea̱xmarexü̃.
10 Rü tama chaugügu chayacu̱x nax quixaixcümaxü̃ rü namexü̃ i ngẽma cuxüxü̃. Rü marü namaxã nüxü̃ chixu nax cuma yixĩxü̃ i toxü̃ cumaxẽxẽẽxü̃ rü aixcüma cuyanguxẽẽxü̃ i ngẽma nüxü̃ quixuxü̃. Rü ngẽmaãcü tama ichayacu̱x nax nüxü̃ chixuxü̃ nax cuma rü ixaixcümacü quixĩxü̃ rü cuxü̃́ tangechaü̃tümüxü̃güxü̃.
11 Rü ñu̱xmax, Pa Corix, rü tama chanaxwa̱xe nax choxü̃ ícurüngü̃maxü̃ nax cuxü̃́ changechaü̃tümüxü̃xü̃. Erü ngẽma curü ngechaü̃ rü curü mecüma nixĩ i guxü̃guma choxü̃ ípoxü̃xü̃.
12 Rü ngẽma muxũchixü̃ i chorü pecadugü rü choxü̃ niyauxgü rü taxucürüwama nüxna chiña. Rü ngẽma chorü pecadugü rü chauyaexü̃ narümumae rü ngẽmagagu ichayanguãxẽ.
13 Pa Corix, ¡choxü̃ ínanguxuchixẽxẽ nawa i ngẽma chorü pecadugü rü paxa choxü̃ rüngü̃xẽxẽ!
14 40:14-15 Rü ngẽxgumarüxü̃ ta, Pa Corix, rü chanaxwa̱xe i cunaxãneexẽxẽ i guxü̃ma i ngẽma choxü̃ ima̱xgüchaü̃xü̃. Rü name nax norü ãnemaxã cuyabuxmüxẽẽxü̃ i ngẽma choxü̃ cugüexü̃.
15 Nüü̃ nadau 40:14
16 Natürü guxãma ya yíxema cuxca̱x daugüxe rü name nixĩ nax cumaxã tataãẽgüxü̃. Rü guxãma ya yíxema nayauxgüxe nax tüxü̃ curüngü̃xẽẽxü̃ rü name nixĩ i guxü̃guma ñatarügügü: —¡Cori ya Tupanaxü̃ picua̱xüxü̃gü erü nüma rü guxãétüwa nangẽxma! —ñatarügügü.
17 Pa Corix, ¡yáxna chomaxã naxĩnü woo nax cupe̱xewa taxuxü̃ma chixĩxü̃, rü changearü poraáxü̃ nax chaugü íchapoxü̃xü̃! Erü cuma nixĩ i choxü̃ curüngü̃xẽxẽxü̃ rü choxü̃ ícupoxü̃xü̃. Rü ngẽmaca̱x, Pa Chorü Tupanax ¡taxṹ i cunuxcüãẽxü̃ nax choxü̃ curüngü̃xẽxẽxü̃!
