Salmos 41:1-13
41 Rü nüma ya Cori ya Tupana rü tümamaxã nataãxẽ ya yíxema nüxü̃ rüngü̃xexẽ́xẽ i tümamücü i nüxü̃́ nataxuxü̃ i pora. Rü nüma ya Cori ya Tupana rü tá tüxü̃ ínanguxuchixẽxẽ i ngẽxguma guxchaxü̃ tümaca̱x ínguxgu.
2 Rü nüma ya Cori ya Tupana rü tá tüxna nadau rü tá maxü̃ tüxna naxã rü tá tüxü̃ nataãẽxẽxẽ i ñoma i naanewa. Rü taxũtáma tümaarü uanügüarü ngúchaü̃wa tüxü̃ nata̱x.
3 Rü nüma ya Cori ya Tupana rü tá pora tüxna naxã ega ngúxü̃ tingegügu. Rü ngẽxguma tida̱xawegu rü tá tümaca̱x nayataanexẽxẽ.
4 Rü choma rü ñaãcü chayumüxẽ: —Pa Corix ¡cumaxã nüxü̃ chixu i chorü pecadugü, rü chanaxwa̱xe i cuxü̃́ changechaü̃tümüxü̃ rü cha̱u̱xca̱x cuyataanexẽxẽ! —ñachagürü.
5 Natürü ngẽma chorü uanügü rü ñanagürügü: —Chierüna paxa nayu̱xgu nax ngẽxma yanaxoxü̃ca̱x i naéga —ñanagürügü.
6 Rü ngẽxguma choxü̃ íyadaugügu i ngẽma nax chida̱xawexü̃ rü chomücüxü̃ nügü nixĩxẽẽnetagü. Natürü chauxchi naxaie rü nataãẽgü i ngẽxguma nüxü̃ nadaugügu nax ngúxü̃ chingexü̃. Rü ngẽxguma choxna nawoegu̱xgu rü choxü̃ nacugüe.
7 Rü ngẽma chauxchi aiexü̃ rü naxĩtaque̱xe rü chauchiga nidexagü. Rü nagu narüxĩnüe nax chaugagutama ngúxü̃ chingexü̃.
8 Rü ñanagürügü: —Rü ngẽma nax yada̱xawexü̃ rü yuüxü̃ chixexü̃ namaxã naxüxü̃, rü ngẽmaca̱x tagutáma wena ínarüda —ñanagürügü.
9 Rü woo ga yema rümemaexü̃ ga chomücü ga nüxü̃́ chayaxõxü̃ rü wüxiwa chomaxã chibüchiréxü̃, rü ñu̱xma rü chomaxã narüxuanü.
10 Natürü cumax, Pa Corix ¡rü cuxü̃́ changechaü̃tümüxü̃! ¡Rü choxü̃ írüdaxẽxẽ nax ngẽmaãcü chanapoxcuexü̃ca̱x i ngẽma chomaxã rüxuanügüxü̃!
11 Rü ngẽguma tama choxü̃ naporamaegügu i chorü uanügü rü ngẽmawa tá nüxü̃ chacua̱x nax chomaxã cutaãẽxü̃.
12 Rü chomax nax mexü̃gu chamaxü̃xü̃ ¡rü choxna nadau nax ngẽmaãcü guxü̃guma cuxü̃tawa changexmaxü̃ca̱x!
13 Rü namecümaxüchi ya Cori ya Iraétanüxü̃arü Tupana. Rü nüma rü guxü̃guma nangẽxmaecha. ¡Rü ngẽmaãcü yixĩ!
