Salmos 42:1-11
42 Rü ñoma wüxi i cowü i ta̱xawaxüchixü̃ i natüca̱x dauxü̃rüxü̃ chixĩ nax cuxca̱x chadauxü̃, Pa Chorü Tupanax.
2 Rü choxü̃́ nangúchaü̃ nax namaxã chaxãmücüxü̃ ya Tupana ya maxü̃arü yora. ¿Rü ñuxgu tá napatawa chaxũxü̃ nax ngéma nape̱xewa changexmaxü̃ca̱x?
3 Ngunecü rü chütacü rü chaxaxu nax norü ngü̃xẽẽca̱x íchaca̱xaxü̃ca̱x. Rü yoxni i chorü uanügü rü choxü̃ nacugüe rü ñanagürügü: —¿Ngexcü nixĩ ya curü Tupana? —ñanagürügü.
4 Rü ngẽxguma ngẽmagu charüxĩnügu rü marü tama yáxna namaxã chaxĩnü i ngẽma nax chaxaxuxü̃. Rü nüxna chacua̱xãchi ga yexguma Tupanapatawa chanagagügu ga yema muxü̃ma ga duü̃xü̃gü. Rü taãẽãcü moxẽ nüxna taxã rü tanatachigaxẽxẽ.
5 ¿Rü ñu̱xma rü ta̱xacüca̱x chi íchayaxoõchixü̃? ¿Rü ta̱xacüca̱x chi i naxca̱x chaxoegaãẽxü̃? Rü Tupanawa tá nüxü̃ ichayangau i chorü ngü̃xẽxẽ, rü yimáxü̃ tá nixĩ i chicua̱xüxü̃xü̃. Erü nüma nixĩ ya chorü Tupana ya chorü maxẽẽruxü̃.
6 Natürü i ñu̱xmax rü poraãcüxüchima íchayaxoõchi. Rü ngẽmaca̱x, Pa Tupanax, poraãcü cuxna chacua̱xãchi nawa i ñaa naane i natü i Yudáü̃ nawa dapetüxü̃ rü yima ma̱xpǘnegü ya Ermóü̃ rü Michá nawa ngẽxmagüne.
7 Rü ñoma dexá i dauxü̃wa nagoxü̃chíüxü̃rüxü̃ chauétü nangu i guxü̃ma i ngẽma guxchaxü̃gü rü ngúxü̃gü i cha̱u̱xca̱x ícunguxẽẽxü̃. Rü ñoma wüxi ya yuape ya taxüchicürüxü̃ chauétüwa naxüpetü.
8 Rü guxü̃ i ngunegu rü nüma ya Cori ya Tupana choxü̃ nanawe̱x nax choxü̃ nangechaü̃xü̃. Rü chütacü rü chawiyae rü namaxã chidexa ya Tupana ya choxü̃ maxẽẽcü.
9 Rü ñachagürü nüxü̃ ya Tupana ya chorü poxü̃ruxü̃: —¿Tü̱xcüü̃ choxü̃ curüngü̃ma? ¿Rü ta̱xacüca̱x i ñu̱xma rü ngechaü̃ãcü ichixũxü̃ rü choxü̃ nua nachixeãẽgüxü̃ i chorü uanügü? —ñachagürü.
10 Rü woo ya chauxchina̱xãgü rü ta nangúe nagagu i ngẽma chorü uanügü i guxü̃guma choxü̃ cugüexü̃ rü ñagüxü̃: —¿Ngexcü nixĩ ya curü Tupana? —ñagüxü̃.
11 ¿Natürü ta̱xacüca̱x chi nüxü̃ charüxoxü̃? ¿Rü ta̱xacüca̱x chi ichaxoégaãẽxü̃? Erü Tupanaaxü̃́ nixĩ i chayaxõxü̃ rü yimáxü̃ tá nixĩ ichicua̱xüxü̃amaxü̃. Erü nüma nixĩ i chorü Tupana ya chorü maxẽxẽruxü̃ ixĩcü.