Salmos 44:1-26
44 Pa Tupanax, tomatama nüxü̃ taxĩnüchiga ga yema taxü̃ ga mexü̃ ga nũxcüma cuxüxü̃. Yerü torü o̱xigü rü tomaxã nüxü̃ nixugüe ga yema mexü̃gü ga nũxcüma curü poramaxã cuxüxü̃.
2 Rü cumatama nixĩ ga ñaa naanewa ícuwoxü̃xü̃ ga yema duü̃xü̃gü ga tama cuxü̃́ yaxõgüxü̃. Rü cunadai ga yema duü̃xü̃gü nax nachicüxü ñaa naanegu cuxãchiü̃güxẽẽxü̃ca̱x ga torü o̱xigü.
3 Rü tama tümaarü poramaxã rü tümanegümaxã nixĩ ga tanayauxgüxü̃ ga ñaa naane. Natürü yema curü poragagu rü curü ngü̃xẽẽgagu nixĩ ga nawa tangugüxü̃ ga yema naane. Yerü cuma rü tüxü̃ cungechaü̃ rü tümamaxã cumecüma.
4 Pa Chorü Ãẽ̱xgacü, Pa Chorü Tupanax, chanaxwa̱xe icunaporamaexẽẽxü̃ i curü duü̃xü̃gü.
5 Rü cugagu tá nixĩ i nüxü̃ tarüporamaegüxü̃ i torü uanügü. Rü cuégagu tá nüxü̃ tarüyexera i ngẽma toxü̃ daixchaü̃xü̃.
6 Rü choma rü tama chauxnegüaxü̃́ chayaxõ, erü yimá chauxnegü rü taxũtáma chorü uanügüna choxü̃ ínapoxü̃.
7 Natürü cuma nixĩ i torü uanüxü̃ toxü̃ curüporamaexẽẽxü̃ rü cuma nixĩ i cunaxãneexẽẽxü̃ i ngẽma toxchi aiexü̃.
8 Rü guxü̃guma cumaxã togü ticua̱xüü̃gü, Pa Tupanax. Rü guxü̃gutáma nüxü̃ ticua̱xüxü̃ i cuéga.
9 Natürü i ñu̱xmax rü toxü̃ cuxo rü toxü̃ cuxãneexẽxẽ. Rü marü tama ícuyaxümücü i torü churaragü.
10 Rü cuma rü nüxü̃́ cunatauxchaxẽxẽ i torü uanügü nax toxü̃ yabuxmüxẽẽxü̃ca̱x. Rü ngẽmaca̱x i ngẽma toxchi aiexü̃ rü toxü̃́ nanade i ngẽma nüma nanaxwa̱xegüxü̃.
11 Rü cuma rü nüxna toxü̃ cumugü ñoma carnérugü i daiwa nagagüxü̃rüxü̃. Rü ngẽma togü i nachixü̃anegu toxü̃ cuwoonemare.
12 Rü ítanüxü̃gu tomaxã cutaxe, rü taxuxü̃ma nawa cuyaxu nax tomaxã cutaxexü̃.
13 Rü ngẽma toxna ngaicamagüxü̃ i nachixü̃anecüã̱xgü rü toxü̃ nacugüe rü tomaxã naguxchigagü.
14 Rü wiyaegüãcüma ngẽma togü i nachixü̃anecüã̱xgü toxü̃ nacugüe. Rü ngẽxguma toxü̃ nadaugügu rü nanexáerugüãcüma toxü̃ nacugüe.
15 Rü wüxichigü i ngunexü̃ rü ichayarümaãchi. Rü ngẽmaca̱x chorü ãnemaxã tama chadaunagü.
16 Erü ngẽma chorü uanügü rü choxü̃ nima̱xgüchaü̃ rü chomaxã naguxchigagü rü chaugu nidauxcüraxü̃gü.
17 Rü ngẽma ñu̱xma toxü̃ ngupetüxü̃ rü tama ngẽma cuxü̃ nax itarüngümaexü̃gagu nixĩ rü tama nax ta̱xacürü chixexü̃ cupe̱xewa taxüxü̃gagu nixĩ.
18 Rü toma rü tama cuxü̃ ítata̱x rü tama nüxna tixĩgachi i curü ore.
19 Natürü i cuma rü dauxchitacüã̱x i airugümaxü̃wa toxü̃ cuwogü. Rü taxü̃ i ẽanexü̃wa toxü̃ cumugü.
20 44:20-21 Rü ngẽxguma chi nüxü̃ itarüngümaegu i naéga ya Tupana, rü chi nüxü̃ ticua̱xüü̃gux i tomare i tupana, rü nüma rü nüxü̃ nacua̱xama. Erü nüma rü meama nüxü̃ nacua̱x i guxü̃ma i ngẽma bexma taãẽwa nagu rüxĩnüexü̃.
21 Nüü̃ nadau 44:20
22 Natürü cugagu rü guxü̃guma yuwa toxü̃ nagagü. Rü ngẽma torü uanügü rü ñoma carnérugü i daiwa nagagüxü̃rüxü̃ tomaxã nixĩgü.
23 Pa Corix ¿tü̱xcüü̃ cupe? ¡Rü naba̱i̱xãchi, rü taxṹ i toxü̃ ícuwogüxüchixü̃!
24 ¿Tü̱xcüü̃ toxcha̱xwa iquicu̱x? ¿Rü tü̱xcüü̃ toxü̃ icurüngüma i toma nax poraãcü ngúxü̃ tingegüechaxü̃?
25 Rü ñu̱xma rü waixü̃müte̱xewa ãne tingegü. Rü waixü̃müanegumare togü titúgü.
26 ¡Ẽcü inachi rü paxa nua naxũ rü toxü̃ yarüngü̃xẽxẽ! ¡Rü taxü̃ i curü ngechaü̃gagu toxü̃ ínanguxü̃xẽxẽ!
