Salmos 48:1-14
48 Nüma ya Cori ya Tupana rü guxãétüwa nangẽxma rü name nax nüxü̃ icua̱xüü̃güxü̃ nawa ya yima norü ĩane ya norü ma̱xpǘne ya üünene ya Chióü̃wa ngẽxmane.
2 Namexẽchi ya yima ma̱xpǘne ya Chióü̃ i nórtewaama ngẽxmane. Rü yima nixĩ ya namaxã nataãẽgüne i guxü̃ma i ñoma i naanecüã̱x i duü̃xü̃gü. Rü yimawa nixĩ i nangẽxmaxü̃ i norü ĩane ya yimá Ãẽ̱xgacü ya Guxãétüwa Ngẽxmacü.
3 Rü Yerucharéü̃wa ngẽxmane ya ãẽ̱xgacüpatagüwa nixĩ i nangẽxmaxü̃ ya Tupana. Rü nüma ya Tupana rü nügü nango̱xẽxẽ nax yima ĩanearü poxü̃ruxü̃ ya aixcüma poracü yixĩxü̃.
4 Rü ñoma i naanecüã̱x i nachixü̃anegüarü ãẽ̱xgacügü rü nügümaxã nangutaque̱xegü rü wüxigu yima ĩaneca̱x ínayachoõchi.
5 Natürü yexguma yima ĩanexü̃ nadaugügu rü nañu̱xãẽgü rü nibuxmü.
6 Rü poraãcü namuü̃e. Rü nanaxĩ̱xãchiãẽgü ñoma wüxi i nge i ixíxraxacüchaü̃cürüxü̃.
7 Rü nüma ya Tupana rü wüxi ya tacü ya buanecü ya éstewaama ne namuãcümaxã nagu napogü ya yima Tárchixcüã̱xarü wapurugü.
8 Rü yima Tupanaarü ĩane rü namexẽchi yema tórü o̱xigüwa nüxü̃ taxĩnüechigaxü̃rüxü̃. Rü ñu̱xma i yixema rü ta rü taxetümaxã nüxü̃ tadaugü i ngẽma. Rü nümatama ya Tupana ya Guxãétüwa Ngẽxmacü rü guxü̃gutáma yima ĩanexü̃ ínapoxü̃.
9 Pa Tupanax, nua cupatawa nüxna tacua̱xãchie nax poraãcü toxü̃ cungechaü̃xü̃ i cumax.
10 Pa Tupanax, guxü̃wama i ñoma i naanewa rü cuxü̃ nicua̱xüü̃gü, rü nüxü̃ nicua̱xüü̃gü i cuéga. Rü yima curü tügünechacüüarü poramaxã mea tomaxã icucua̱x.
11 Rü cuma, Pa Tupanax, aixcüma mexü̃ tomaxã cuxuegu. Rü ngẽmaca̱x nataãẽgü i Chióü̃cüã̱xgü rü Yudáanearü ĩanegücüã̱xgü.
12 ¡Rü ẽcü, nüxü̃ ípeyachoegu ya yima ĩane ya Chióü̃ rü peyaxugü i ngẽma norü dauxü̃taechicagü rü ñuxre yixĩxü̃!
13 ¡Rü mea penangugü i norü poxeguxü̃tápü̱xgü rü yima ãẽ̱xgacüpatagü nax pexü̃́ natauxchaxü̃ca̱x nax namaxã nüxü̃ pixuchigaxü̃ca̱x i petaagü!
14 Erü nüma ya Tupana rü guxü̃gutáma tórü Tupana nixĩ. Rü nüma rü guxü̃gutáma mea tamaxã inacua̱x.
