Salmos 50:1-23
50 Nüma ya Cori ya Tupana ya Guxãétüwa Ngẽxmacü rü nidexa, rü naxca̱x nangema i guxü̃ma i duü̃xü̃gü i guxü̃wama ñoma i naanewa ngẽxmagüxü̃.
2 Rü nüma ya Tupana rü yima mexẽchine ya napata ya Chióü̃wa ngẽxmanewa norü üünemaxã nanangóonexẽxẽ.
3 Rü nüma ya tórü Tupana rü nua naxũ. Natürü tama bexma ínangu erü nape̱xewa nangẽxma i wüxi i üxüema i guxü̃xü̃ma ixaxẽẽxü̃, rü nacüwawa nangẽxma ya buanecü ya taxüchicü.
4 Rü Tupana naxca̱x nangema i dauxü̃wa ngẽxmaxü̃ i naane rü ñoma i naane nax nüxü̃ nadaugüxü̃ca̱x i ngẽxguma norü duü̃xü̃gü i Iraécüã̱xgüxü̃ yacagügu.
5 Rü ñanagürü nüxü̃: —¡Penangutaque̱xexẽxẽ i ngẽma duü̃xü̃gü ga chomaxã ixunetagüxü̃ ga yexguma norü ãmaregü cha̱u̱xca̱x yagugügu! —ñanagürü.
6 Ngẽma dauxü̃wa ngẽxmaxü̃ i naane nanango̱xẽxẽ nax Tupana rü ãẽ̱xgacü ya aixcüma mecü nax yixĩxü̃.
7 Rü nüma ya Tupana rü ñanagürü: —Pa Chorü Duü̃xü̃gü i Iraétanüxü̃x ¡rü iperüxĩnüe! Rü ñu̱xma rü tá pemaxã chanangõ̱xẽxẽ i ngẽma perü chixexü̃. Rü chaxicatama nixĩ ya Tupana chixĩxü̃. Rü chomatama nixĩ i perü Tupana chixĩxü̃.
8 Rü ñu̱xma rü tama pexü̃ chaxoregü naxca̱x i ngẽma ãmaregü i guxü̃guma cha̱u̱xca̱x pedaixü̃ rü cha̱u̱xca̱x ípeguxü̃.
9 Rü tama pexna naxca̱x chaca i ngẽma wocaxacügü i yatüxü̃ rü carnéruxacügü i yatüxü̃ i perü naxpüü̃wa ngẽxmagüxü̃.
10 Erü choxrü nixĩ i guxü̃ma i naeü̃gü i naixnecüwa ngẽxmagüxü̃, rü guxü̃ma i ngẽma wocagü i 1,000 i ma̱xpǘnegüwa ngẽxmagüxü̃.
11 Rü nüxü̃ chacua̱x i ngẽma werigü i ma̱xpǘneanecüã̱xgü, rü guxü̃ma i ngẽma naexü̃gü i naanegüwa ngẽxmagüxü̃.
12 Rü ngẽxguma chi chataiyaxgu i choma rü taxũchima pemaxã nüxü̃ chixu erü choxrü nixĩ i ñoma i naane rü guxü̃ma i ta̱xacü i nawa ngẽxmagüxü̃.
13 ¿Ẽ̱xna pema nagu perüxĩnüegu rü wocamachimaxã chaxãwemüxü̃ rü namaxã chaxaxexü̃ã́xü̃ ya yimá nagü i chíbuxacügü i yatüxü̃?
14 Rü choma ya Tupana ya Guxü̃étüwa Ngẽxmaxe rü ngẽma ãmare i chanaxwa̱xexü̃ nixĩ nax moxẽ choxna pexãxü̃ rü aixcüma peyanguxẽẽxü̃ i ngẽma perü unetagü.
15 ¡Rü cha̱u̱xca̱x peca ega ngẽxguma guxchaxü̃ pexü̃ ngupetügu! Rü choma rü tá pexü̃ íchapoxü̃ rü pema rü tá choxü̃ picua̱xüü̃gü —ñanagürü ya Tupana.
16 50:16-17 Natürü ngẽma chixexü̃ ügüxü̃ rü Tupana rü ñanagürü nüxü̃: —Cuma rü chorü mugüchiga quidexa rü nüxü̃ quixu i chorü unetagü, ¿natürü ta̱xacüwa i cuxü̃́ namexü̃ i ngẽma ega tama namaxã cutaãẽgu i chorü ucu̱xẽgü rü tama nüxü̃ cucuáxchaü̃gu i chorü ore?
17 Nüü̃ nadau 50:16
18 Rü cuma rü taãẽãcü cunayaxu i ngẽma ngĩ́ta̱xagüxü̃ rü namaxã cuxãmücü i ngẽma duü̃xü̃gü i naxma̱xẽchita nai i ngemaxã maxẽxü̃.
19 Rü cua̱x rü chixexü̃ i oremaxã nidexa, rü curü conü rü doraxü̃ nixu.
20 Rü cuma rü chixri nachiga quidexa ya cumücü. Rü yimá cuenexẽxü̃chi rü namaxã cuguxchiga.
21 Rü woo guxü̃ma i ngẽma chixexü̃ cuxüxgu, rü choma rü ngéma changea̱xmare. Rü cuma nagu curüxĩnügu nax curüxü̃ chixĩxü̃ rü chi nüxü̃ icharüngüma i ngẽma cuxüxü̃. Natürü i ñu̱xma rü tá cupe̱xewa chanangõxẽxẽ i ngẽma chixexü̃ i cuxüxü̃ rü tá naxca̱x cuxna chaca.
22 ¡Dücax i pemax nax choxü̃ iperüngümaexü̃, name nixĩ i nagu perüxĩnüe i ngẽma pemaxã nüxü̃ chixuxü̃! ¡Rü cha̱u̱xca̱x pewoegu naxü̃pa nax pexü̃ chada̱i̱xü̃ rü taxúema pexü̃ ípoxü̃xü̃!
23 Rü yíxema moxẽ choxna ãxe rü choxü̃ ticua̱xüxü̃. Rü choma rü tá tüxü̃ chamaxẽxẽ ya yíxema aixcüma chauga ĩnüxẽ —ñanagürü ya Tupana.
