Salmos 51:1-19
51 Pa Tupanax, ¡cuxü̃́ changechaü̃tümüxü̃, erü cuma rü cungechaü̃wa̱xe! ¡Rü curü ngechaü̃gagu choxü̃́ nüxü̃ irüngüma i chorü pecadugü!
2 ¡Rü choxü̃́ nüxü̃ irüngüma i guxü̃ma i chorü chixexü̃gü! ¡Rü choxü̃́ ínapi i chorü pecadugü!
3 Rü naxca̱x íchicua̱x nax chixexü̃ chaxüxü̃. Rü ngẽma chorü pecadu rü guxü̃guma chauãẽwa nangẽxmaecha.
4 Rü cupe̱xewatama nixĩ i chanaxüxü̃ i ngẽma pecadu. Rü cuxetümaxã nüxü̃ cudau i ngẽma chaxüxü̃. Rü ngẽmaca̱x i ngẽma poxcu i chomaxã cuxueguxü̃ rü aixcüma name rü taxucürüwa texé nüxü̃ tixu nax chixri choxü̃ cungugüxü̃.
5 Rü aixcüma nixĩ nax noxritama chabuxgu rü wüxi i chixexü̃ chixĩxü̃. Rü woetama pecaduwa chayaxĩxĩchi ga chauéanüwa.
6 Cuma rü nüxü̃ cungechaü̃ i ngẽma duü̃xü̃ i aixcüma nüxü̃ ixuxü̃ i norü pecadugü. Rü chauãẽwa cunanguxẽxẽ i cua̱x.
7 ¡Rü ẽcü ngẽma maxcuruü̃maxã choxü̃ namaxcuxü̃ne nax iyanaxoxü̃ca̱x i chorü chixexü̃! Rü ngẽmaãcü i chorü maxü̃ rü cupe̱xewa rü gáuxü̃te̱xe i cómüxü̃arü yexera tá nacómüxü̃.
8 Rü chanaxwa̱xe nax wena choxü̃ cutaãẽxẽẽxü̃. ¡Rü choxna naxã i taãxẽ ñu̱xmata yima chauxchina̱xãgü i cuma quibuyegünewa nangu!
9 ¡Rü ẽcü choxü̃́ nüxü̃ irüngüma i chorü pecadugü, rü ínapi i guxü̃ma i chorü chixexü̃gü!
10 Pa Tupanax ¡chowa nangẽxmaxẽxẽ i wüxi i chauãxẽ i aixcüma mexü̃! ¡Rü nangexwaca̱xü̃xẽxẽ i chauãxẽ nax cupe̱xewa wüxi i naãxẽ i aixcüma mexü̃ yixĩxü̃ca̱x!
11 ¡Rü taxṹ i cugüna choxü̃ cuyáxü̃guxẽxẽxü̃! ¡Rü taxṹ i choxna cuyaxũgachixẽxẽxü̃ i Cuãxẽ i Üünexü̃!
12 51:12-13 ¡Ẽcü wena cha̱u̱xca̱x natáeguxẽxẽ i ngẽma taãxẽ ga noxri choxü̃́ yexmaxü̃ ga yexguma chixexü̃wa choxü̃ ícunguxuchixẽxẽgu! ¡Rü choxü̃ naporaxẽxẽ nax cuga chaxĩnüxü̃ca̱x! ¡Rü ngẽxguma i choma rü tá chanangúexẽxẽ i ngẽma tama cuga ĩnüexü̃ nax nümagü rü ta cuga naxĩnüexü̃ca̱x rü aixcüma cuxü̃́ yaxõgüãxü̃ca̱x!
13 Nüü̃ nadau 51:12
14 Pa Tupana ya Chorü Maxẽxẽruxü̃x ¡choxü̃ ínanguxuchixẽxẽ nax yexü̃cürü nagü ichanabaxẽxẽxü̃! Rü choma rü wiyaeãcüma tá nüxü̃ chixu nax cuma rü aixcümacü quixĩxü̃.
15 Pa Corix ¡ẽcü choxü̃ ichoxẽxẽ nax cuxca̱x chawiyaexü̃ca̱x rü ngẽmaãcü cuxü̃ chicua̱xüxü̃xü̃ca̱x!
16 Erü cuma rü tama cunaxwa̱xe nax ta̱xacürü ãmare cuxna chaxãxü̃ rüe̱xna ta̱xacürü ãmare cuxca̱x chiguxü̃. Rü choma rü chi cuxna chanaxã, natürü tama ngẽma nixĩ i namaxã cutaãẽxü̃.
17 Rü ngẽma cuma cunaxwa̱xexü̃, Pa Tupanax, nixĩ i wüxi i duü̃xü̃ i nüxü̃ rüxoxü̃ i chixexü̃. Rü cumax, Pa Tupanax, rü tama nüxü̃ cuxo i ngẽma duü̃xü̃ i nügümaxã nangechaü̃ãcüma cumaxã nügü ixuxü̃ nax nachixexü̃.
18 Pa Cori Pa Tupanax ¡cuxü̃́ nangechaxü̃tümüxü̃ ya yima cupata ya Chióü̃wa ngẽxmane erü nüxü̃ cungechaü̃! ¡Rü curü duü̃xü̃güxü̃ rüngü̃xẽxẽ nax wena inachixẽẽxü̃ca̱x ya Yerucharéü̃arü poxeguxü̃!
19 Rü ngẽxguma i cuma rü tá namaxã cutaãxẽ i ngẽma ãmaregü i wocagü i tá cuxca̱x daixü̃ rü cuxca̱x íguxü̃. Rü ñu̱xũchi curü ãmarearü guruü̃wa tá cuxca̱x nayagugü i wocaxacügü.
