Salmos 52:1-9
52 Pa Yatü ya Poracüx ¿tü̱xcüü̃ cugü quicua̱xüxü̃ namaxã i ngẽma chixexü̃ i cuxüxü̃? Tupanaarü ngechaxü̃ rü aixcüma taguma inayacua̱x.
2 Rü yimá curü conü rü naxãũcüma ñoma wüxi i cüxchi i te̱xechixü̃rüxü̃. Erü yimá curü conü rü nidorata̱x rü chixexü̃ i orexü̃ nixu.
3 Rü cuma, Pa Yatüx, rü ngẽma mexü̃arü yexera cunaxwa̱xe i ngẽma chixexü̃. Rü ngẽma ore i aixcüma ixĩxü̃arü yexera curü me nixĩ i ngẽma dora.
4 Rü curü me nixĩ nax curü conümaxã to̱xguã̱xü̃ quixuxü̃ rü curü me nixĩ nax to̱xguã̱xchiga doraxü̃ quixuxü̃.
5 Natürü nüma ya Tupana rü ngẽmaca̱x tá cuxü̃ inayanaxoxẽxẽ, rü tagutáma ngẽmawa ícunguxuchi. Rü tá cupatawa cuxü̃ ínata̱xüchi, rü tá cuxna nanayaxu i curü maxü̃.
6 Rü ngẽma duü̃xü̃gü i Tupanaga ĩnüexü̃ rü ngẽxguma nüxü̃ nadaugügu i ngẽma cuxü̃ üpetüxü̃, rü tá poraãcü namuü̃e. Rü tá cuxü̃ nacugüe rü ñanagürügü tá:
7 —¡Dücax, nüxü̃ peda̱u̱x i ngẽma duü̃xü̃ i tama Tupanaga ĩnüchaü̃xü̃ rü ngẽma norü ngẽmaxü̃gügu yaxõxü̃ rü chixexü̃guama maxü̃xü̃! —ñanagürügü tá.
8 Natürü i choma rü ñoma wüxi i oribu i baxcaxü̃ i Tupanapataa̱xtügu toxü̃rüxü̃ chixĩ. Rü ngẽmaca̱x guxü̃gutáma norü ngechaü̃gu chayaxõ.
9 Pa Tupanax, choma rü guxü̃gutáma moxẽ cuxna chaxã rü cuxü̃ chicua̱xüxü̃ naxca̱x i ngẽma cuxüxü̃. Rü nape̱xewa i ngẽma cuxü̃́ yaxõgüxü̃ rü tá mea cuxü̃ íchanangu̱xẽxẽ, erü chomaxã cumecüma.
