Salmos 53:1-6
53 Rü ngẽma duü̃xü̃gü i naechita maxẽmarexü̃ rü ñanagürügü: —Nataxuma ya Tupana —ñanagürügü. Rü ngẽma duü̃xü̃gü rü chixexü̃gu narüxĩnüe rü chixexü̃ naxügü. Rü tataxuma ya texé ya mexü̃ üxe, rü bai i wüxi.
2 Rü nüma ya Tupana rü daxũwa duü̃xü̃güxü̃ nadawenü nax nüxü̃ nacuáxü̃ca̱x rü tayíxema ya aixcüma tümaãẽxü̃ cuáxe rü naga ĩnüxe rü naxca̱x dauxe.
3 Natürü guxü̃ma i duü̃xü̃gü rü Tupanana nixĩgachi rü guxü̃ma wüxigu chixexü̃gu narüxĩnüe. Rü marü tataxuma ya texé ya mexü̃ üxe, rü bai ya wüxi.
4 Rü ngẽma chixexü̃ ügüxü̃ rü nangeãẽgümare rü paxãma nanachixexẽxẽ i chorü duü̃xü̃gü. Rü ngẽma tama Tupanaga ĩnüexü̃ rü chorü duü̃xü̃güxü̃ inarüxoxẽẽgü ñoma paũ ingõ̱xgurüxü̃. Rü ngẽma duü̃xü̃gü rü taguma nayumüxẽgü nax Tupanaarü ngü̃xẽẽca̱x nadaugüxü̃ca̱x.
5 Rü ngẽma duü̃xü̃gü rü muü̃maxã nidu̱xrue woo nataxuguma i ta̱xacüca̱x namuü̃exü̃. Yerü Tupana rü marü nanawoone ga naxchina̱xãgü ga yema curü uanügü ga cuxca̱x íyaxüãchixü̃. Rü cuma rü cunaxãneexẽxẽ ga yema uanügü, yerü Tupana rü marü nüxü̃ naxo.
6 Chierüx yima ma̱xpǘne ya Chióü̃wa ne naxũxgu ya Tupana ya Iraétanüxü̃arü poxü̃ruxü̃. Rü ngẽxguma Tupana nanawoeguxẽẽgu i norü duü̃xü̃gü, rü Acóbutaagü rü tá nataãẽgü rü guxü̃ma i Iraétanüxü̃ rü nataãẽgü.
