Salmos 54:1-7
54 Pa Tupanax ¡cumatama choxü̃ ínanguxuchixẽxẽ naxme̱xwa i chorü uanügü! ¡Rü choxü̃ ínapoxü̃ namaxã i curü pora!
2 Pa Tupanax ¡choxü̃́ nüxü̃ naxĩnü i chorü yumüxẽ rü ẽcü irüxĩnü i chorü dexa!
3 Erü duü̃xü̃gü i to i nachixü̃anecüã̱x chauxca̱x ínayaxüãchi rü ngẽma máxwa̱xegüxü̃ rü choxü̃ nima̱xgüchaü̃. Rü ngẽma duü̃xü̃gü rü tama cuxü̃ namuü̃e, Pa Tupanax.
4 Natürü nüma ya Cori ya Tupana rü chorü ngü̃xẽẽruxü̃ nixĩ. Rü nüma nixĩ i choxna nadauxü̃ nax tama chayuxü̃ca̱x.
5 Rü nüma ya Tupana rü tá naxca̱x nanatáeguxẽxẽ i ngẽma chixexü̃ i chorü uanügü chauxca̱x nagu rüxĩnüexü̃. Pa Tupanax, cuma rü aixcümacü quixĩ, rü ngẽmaca̱x chanaxwa̱xe nax icuyanaxoxẽẽxü̃ i ngẽma chorü uanügü.
6 Rü choma rü chorü ngúchaü̃maxã tá cuxna chanaxã i chorü ãmare i cuxca̱x chiguxü̃. Rü tá cuxü̃ chicua̱xüxü̃ erü cuma rü cumecümaxü̃chi.
7 Rü cuma rü choxü̃ ícunguxuchixẽxẽ nawa i guxü̃ma i chorü guxchaxü̃gü. Rü chauxetümaxã nüxü̃ chadau nax chorü uanügüxü̃ curüporamaexü̃.
