Salmos 55:1-23
55 Pa chorü Tupanax ¡nüxü̃ naxĩnü i chorü yumüxẽ rü taxṹ i nüxü̃ cuxüpetümarexü̃ i ngẽma cuxna naxca̱x chacaxü̃!
2 ¡Rü choxü̃́ irüxĩnü rü choxü̃ nangãxü̃! Erü chorü guxchaxü̃gagu chaxoegaãxẽ rü poraãcü chamuü̃.
3 Rü ngẽma chorü uanügü rü choxü̃ naxãxũnegü, rü ngẽma chixexü̃gu rüxĩnüexü̃ rü chomaxã nanue. Rü nümagü rü ngúxü̃ choxü̃ ningexẽẽgü. Rü norü numaxã chomaxã naguxchigagü.
4 Rü chiyuxnearü maxü̃neã̱x erü poraãcü chamuü̃ nüxü̃ i ngẽma yu i choxna nguxü̃.
5 Rü poraãcüxüchi muü̃ choxna nangu rü muü̃maxã chidu̱xrux.
6 Rü ngẽmaca̱x chaugümaxã ñachagürü: —Chierüx muxtucurüxü̃ chaxãxpe̱xatügu, rü ngẽxguma rü chi chigoe ñu̱xmata nawa changu i wüxi i nachica i nagu charüngü̃xü̃.
7 55:7-8 Rü yáxü̃guxü̃ i chianexü̃wa chi chaña rü ngẽxma chi charüxã̱ũ̱x, rü paxa chi chañaãchi nax chaugü ichayarücúxü̃ca̱x na̱xcha̱xwa i ngẽma guxchaxü̃gü i ñoma buanecü ya poraxüchicürüxü̃ cha̱u̱xca̱x ngéma ne ũemaxü̃ —ñachagürü.
8 Nüü̃ nadau 55:7
9 Pa Corix ¡nadai i ngẽma chomaxã rüxuanügüxü̃! ¡Rü noxrütama dexagu ínatüexẽxẽ! Erü yima ĩanewa rü ngẽma nüxü̃ chadauxü̃ nixĩ nax nügü nada̱i̱xü̃ rü yapuraexü̃ i duü̃xü̃gü.
10 Rü ngunecü rü chütacü rü ngẽma chixexü̃ ügüxü̃ rü ĩanearü poxeguxü̃gu ínayachoegu, rü ngẽmaãcü norü chixexü̃maxã nayapaxẽxẽ ya yima ĩane. Rü duü̃xü̃gü rü ãẽ̱xgacümaxã nanue rü guxü̃wama nangẽxma i chixexü̃.
11 Rü yima ĩanearü namagü rü namaxã nanapá i máetagüxü̃ rü dorata̱a̱xgüxü̃.
12 Rü ngẽxguma chi wüxi i chorü uanü chixexü̃ chomaxã ixugügu, rü choma rü chi yáxna namaxã chaxĩnü. Rü ngẽxguma chi wüxi i chauxchi aixü̃ choxü̃ imáxchaü̃gu, rü choma rü chi naxcha̱xwa ichicu̱x.
13 55:13-14 Natürü cumatama, Pa Chomücüxüchix, nixĩ i cuchauechitaexü̃ woo ü̃pa rü poraãcü yigü ingechaü̃gügu rü wüxigu yigümaxã Tupanapatawa ixĩxgu nax ngéma duü̃xü̃gümaxã Tupanaxü̃ icua̱xüü̃güxü̃ca̱x.
14 Nüü̃ nadau 55:13
15 Rü ngẽma chorü uanügü rü chanaxwa̱xe i noxtacüma naxca̱x ínangu i ngẽma yu rü maxü̃ãcü naxmaxü̃gu nayicu. Erü nümagü rü guxü̃guma chixexü̃gu namaxẽ.
16 Natürü i choma rü tá Tupanana chaca̱a̱ma, rü nüma ya Cori rü tá choxü̃ ínapoxü̃.
17 Rü ẽxü̃wa rü tocuchigu rü chütacü rü Tupanaxü̃ chaca̱a̱xü̃, rü nüma rü choxü̃ naxĩnü rü choxü̃ nangãxü̃.
18 Rü woo namu i chorü uanügü i namaxã togü tadaixü̃, rü nüma ya Tupana rü choxü̃ narüporamaexẽxẽ nax tama choxü̃ yama̱xgüxü̃ca̱x i ngẽma chorü uanügü.
19 Rü nüma ya Tupana ya guxü̃guma ãẽ̱xgacü ixĩcü rü tá choxü̃ naxĩnü rü tá nayaxãneãchitanüxẽxẽ i ngẽma chomaxã rüxuanügüxü̃. Erü nümagü rü tama nüxü̃ narüxoe i nacüma i chixexü̃ rü tama Tupanaga naxĩnüechaü̃.
20 Rü nanadai i namücügü rü tama nayanguxẽxẽ i ngẽma unetagü i namücümaxã nüxü̃ yaxuxü̃.
21 Rü ngẽxguma yadexagügu rü ore i mexechixü̃maxã nidexagü, natürü i norü ĩnüwa rü daigu narüxĩnüe. Rü mexẽchixü̃ i dexamaxã nidexagü, natürü ngẽma dexagü rü ñoma taragü i nachiü̃wa ituxuchigüxü̃rüxü̃ nixĩgü.
22 ¡Cori ya Tupanamaxã nüxü̃ ixu i curü guxchaxü̃gü! Rü nüma rü tá cuxü̃ naporaxẽxẽ. Rü taguma nanaxwa̱xe nax chixexü̃gu tayixü̃ rü ngẽxma tarüchoxü̃ ya yíxema mexü̃ ügüxe.
23 Cumax, Pa Chorü Tupanax, rü tá icuyanaxoxẽxẽ i ngẽma chixexü̃ ügüxü̃ rü yumaxã tá cunapoxcue, rü naxmaxü̃gu tá cunawocu. Rü ngẽma duü̃xü̃gü i máxwa̱xegüxü̃ rü idorata̱a̱xgüxü̃ rü taxũtáma ngãxü̃ i norü maxü̃wa nangugü nax namaxẽxü̃. Natürü i choma rü cuxü̃́ chayaxõ.
