Salmos 56:1-13
56 Pa Chorü Tupanax ¡cuxü̃́ changechaü̃tümüxü̃! Erü guxü̃guma nangẽxma i uanügü i chowe ingẽxü̃tanüxü̃ rü cha̱u̱xca̱x íyaxüãchixü̃ rü choxü̃ naxĩ̱xãchiãẽgüxẽẽxü̃.
2 Rü ngẽma chomaxã rüxuanügüxü̃ rü guxü̃ i ngunexü̃gügu rü chowe ningẽxü̃tanü. Rü namu i ngẽma nügü rütagüxü̃ rü cha̱u̱xca̱x íyaxüãchixü̃.
3 Natürü ngẽxguma chamuü̃gu rü chayaxõ nax choxü̃ tá curüngü̃xẽxẽxü̃ca̱x.
4 Rü choma rü Tupanaaxü̃́ chayaxõ rü norü oremaxã chataãxẽ. Rü ngẽma nax nüxü̃́ chayaxõxü̃ rü taxuca̱xma chamuü̃. ¿Rü ta̱xacürü chixexü̃ tá chomaxã naxüxü̃ i ngẽma duü̃xü̃ i yuxwa̱xexü̃?
5 Rü ngẽma chomaxã rüxuanüã̱xgüxü̃, rü guxü̃guma ínayatóxẽxẽ i chorü ore. Rü guxü̃guma nagu narüxĩnüe nax ñuxãcü tá chixexü̃gu choxü̃ nanguxẽxẽxü̃.
6 Rü nümagü rü nügümaxã nangutaque̱xegü nax nagu naxĩnüexü̃ nax ñuxãcü tá choxü̃ yama̱xgüxü̃. Rü choxü̃ ínicu̱xéxü̃gü. Rü ngexta íchaxũxü̃wa choxü̃ nangugügü nax choxü̃ yama̱xgüxü̃ca̱x.
7 Pa Chorü Tupanax ¡naétügu nanguxẽxẽ i curü nu, rü yaxãneeãchitanüxẽxẽ i ngẽma duü̃xü̃gü! ¡Rü taxṹ i cunaxüchicaxü̃ nax yabuxmümarexü̃ca̱x!
8 Rü cuma rü meama nüxü̃ cucua̱x i ñuxree̱xpü̱xcüna naxcha̱xwa chiña. Rü marü nuxü̃ cudau i ñuxree̱xpü̱xcüna ngúxü̃ chingexü̃ rü chaxaxuxü̃. Rü curü poperagu marü cunaxümatü i guxü̃ma i ngẽma choxü̃ üpetüxü̃.
9 Rü ngẽxguma curü ngü̃xẽẽca̱x cuxna chacaxgu, Pa Tupanax, rü ngẽma chomaxã rüxuanüã̱xgüxü̃ rü tá cuxcha̱xwa nibuxmü. Rü choma rü meama nüxü̃ chacua̱x nax chauétüwa cuchogüxü̃.
10 Rü choma rü Tupanaaxü̃́ chayaxõ, rü nüxü̃ chicua̱xüxü̃ naxca̱x i norü ore. Rü Coriaxü̃́ chayaxõ rü norü oreca̱x nüxü̃ chicua̱xüxü̃.
11 Rü Tupanaaxü̃́ chayaxõ rü taxuca̱xma chamuü̃. ¿Rü ta̱xacürü chixexü̃ tá chomaxã naxüxü̃ i wüxi i duü̃xü̃?
12 Pa Tupanax, choma rü tá chayanguxẽxẽ i ngẽma chorü uneta i cumaxã nüxü̃ chixuxü̃. Rü moxẽ tá cuxna chaxã naxca̱x i guxü̃ma i ngẽma cuxüxü̃.
13 Erü cuma rü chorü guxchaxü̃wa choxü̃ ícunguxuchixẽxẽ nax tama chayuxü̃ca̱x. Rü choxü̃ ícupoxü̃ nax curü ngóonexü̃wa chamaxü̃xü̃ca̱x.
