Salmos 58:1-11
58 Rü pema, Pa Ãẽ̱xgacügüx, rü pexna chaca ¿rü marü mea namaxã pecuáxü̃ i perü duü̃xü̃gü? ¿Rü aixcüma nawe̱xguxü̃ i ngẽma duü̃xü̃gümaxã pexueguxü̃?
2 Rü tama ngẽmaãcü nixĩ. Erü ngẽxguma texé tümaarü guxchaxü̃ pepe̱xewa mexẽẽchaü̃gu rü tama tüxü̃́ iperüxĩnüe, natürü naga pexĩnüe i ngẽma doramare pemaxã ixuxü̃ erü pexü̃́ nanaxütanü. Rü ngẽmaca̱x pegümaxã penanuexẽxẽ i duü̃xü̃gü i pechixü̃anewa.
3 Rü ngẽma chixexü̃gu maxẽxü̃ i duü̃xü̃gü rü woetama naéanüwa nixĩ i chixexü̃ nüxna nguxü̃. Rü ngẽma idorata̱xáxü̃ rü woetama nabuxgucürüwa rü ngẽma dora namaxã inacua̱x.
4 58:4-5 Rü norü dexa rü ñoma ãxtapeguchatarüxü̃ nixĩ. Rü nacüma rü ñoma ãxtape i düraxüchixü̃ i tama norü puxẽẽruü̃arü paxetaga ĩnüchaü̃xü̃rüxü̃ nixĩ.
5 Nüü̃ nadau 58:4
6 Pa Tupanax ¡napoxü̃püta i ngẽma chixexü̃ ügüxü̃! ¡Rü nabüü̃ ya yima norü cuainagü i ngẽma duü̃xü̃gü i leóü̃gürüxü̃ idüraexü̃!
7 ¡Rü noxtacüma yanaxoxẽxẽ i norü pora ñoma dexá natanüme̱xẽwa nichuruxü̃rüxü̃! ¡Rü nüxna nayaxu i norü maxü̃ ñoma maxẽ ya namawa nawa inga̱xcürüxü̃!
8 ¡Rü ñoma wüxi i meru i yarüxoxü̃rüxü̃, rü ñoma wüxi i buxü̃ i naéanügu yuxü̃ rü taguma ngóonexü̃xü̃ dauxü̃rüxü̃ yaxĩxẽxẽ!
9 Rü ngẽma chixexü̃gu maxẽxü̃ rü name nixĩ nax naechita paxa nayuexü̃ ñoma chuchuxü̃gü i paxa ixaxü̃rüxü̃. Rü name nixĩ nax buanecü ya poracü yangexü̃güxü̃.
10 Rü ngẽxguma daigu nayuegu i ngẽma chixexü̃ ügüxü̃, rü ngẽma duü̃xü̃gü i Tupanaga ĩnüexü̃ rü tá nataãẽgü. Rü ngẽma mea maxẽxü̃ rü nawa tá nangagü i nagü i ngẽma chixexü̃ ügüxü̃.
11 Rü duü̃xü̃gü rü ñanagürügü tá: —Ngẽma mea Tupanape̱xewa maxẽxü̃ rü aixcüma nüxü̃́ nangẽxma i norü natanü. Rü aixcüma nixĩ nax nangẽxmaxü̃ ya Tupana ya ñoma i naanemaxã icuácü —ñanagürügü tá.
