Salmos 61:1-8
61 Pa Chorü Tupanax ¡nüxü̃ naxĩnü nax cuxca̱x aita chaxüxü̃! ¡Rü choxü̃́ nüxü̃ naxĩnü i chorü yumüxẽ rü choxü̃ nangãxü̃!
2 Rü ñu̱xma nax chorü naanena chayáxü̃guxü̃ rü cuxna chaca nax choxü̃ curüngü̃xẽẽxü̃ca̱x. Rü poraãcü chaxoegaãxẽ, rü ngẽmaca̱x chanaxwa̱xe i wüxi ya tacü ya nutaétügu choxü̃ cumunagü i ngextá taxucürüwa chorü uanügü choxna íngugüxü̃wa.
3 Erü cuma nixĩ i chorü dauruxü̃ quixĩxü̃. Rü cuma rü ñoma wüxi i poxü̃chicaxü̃ i taxucürüwa ta̱xacürü uanü nawa ngugüxü̃rüxü̃ quixĩ.
4 Rü chanaxwa̱xe nax guxü̃gutáma cupatawa changexmaxü̃ nax ngéma cuxpe̱xatütüü̃gu chicúxü̃ca̱x.
5 Rü cumax, Pa Chorü Tupanax, rü marü nüxü̃ cuxĩnü i chorü unetagü i cumaxã nüxü̃ chixuxü̃. Rü cuma rü marü choxna cunaxã i wüxi i nachica natanüwa i ngẽma duü̃xü̃gü i cuxü̃ ngechaxü̃güxü̃.
6 Rü choma nax ãẽ̱xgacü chixĩxü̃ rü chanaxwa̱xe i cunama̱xẽxẽ i chorü maxü̃ nax ngẽmaãcü mucü ya taunecü chamaxü̃xü̃ca̱x.
7 Rü choma rü chanaxwa̱xe i guxü̃guma cupe̱xewa mexü̃ i ãẽ̱xgacü chixĩxü̃ nax meama chorü duü̃xü̃gümaxã ichacuáxü̃ca̱x Rü cumax, Pa Tupanax, nax aixcümacü quixĩxü̃ rü chanaxwa̱xe i curü ngechaü̃maxã meama choxna cudau.
8 Rü ngẽmaãcü guxü̃gutáma chorü wiyaemaxã cuxü̃ chicua̱xüxü̃. Rü wüxichigü i ngunexü̃gu tá cupe̱xewa chayanguxẽxẽ i ngẽma unetagü i cumaxã nüxü̃ chixuxü̃.
