Salmos 64:1-10
64 Pa Cori Pa Tupanax ¡choxü̃́ nüxü̃ naxĩnü nax curü ngü̃xẽxẽca̱x íchaca̱xaxü̃! ¡Rü choxna nadau na̱xcha̱xwa i ngẽma uanügü i choxü̃ ima̱xgüchaü̃xü̃!
2 ¡Rü na̱xcha̱xwa choxü̃ icu̱x i ngẽma máxwa̱xegüxü̃ i bexma nagu rüxĩnüexü̃ nax ñuxãcü choxü̃ yama̱xgüchaxü̃xü̃! ¡Rü choxna nadau na̱xcha̱xwa i ngẽma chixexü̃gu rüxĩnüexü̃!
3 Erü norü conü rü ñoma tararüxü̃ nate̱xechi nax doraxü̃ yaxuxü̃. Rü ñoma naxnegürüxü̃ inanaña i norü dexagü i poraãcü tüxü̃́ nangu̱xẽẽxü̃.
4 Rü ngẽma íyacu̱xgüxü̃wa rü ínanaxũxũxẽxẽ i chixexü̃ i ore tümaca̱x ya yíxema taxuxü̃ma guxchaxü̃ namaxã üxe. Rü tama namuü̃ãcüma ngürüãchi tümaechita ínanaxũxũxẽxẽ i ngẽma norü dexa i chixexü̃.
5 Rü nügüxü̃́ nanangúchaü̃xẽxẽ nax chixexü̃ naxügüxü̃. Rü nügümaxã nagu narüxĩnüe nax ñuxãcü bexma duü̃xü̃güxü̃ chixexü̃gu nayixẽẽchaü̃xü̃. Rü nüma nüxü̃ nacua̱xgügu rü taxúema tá nüxü̃ tadau.
6 Rü nagu narüxĩnüe nax chixexü̃ naxügüxü̃, rü ñanagürügü: —Meama nagu tarüxĩnüe nax ñuxãcü tá tanaxü i ngẽma taxüxchaü̃xü̃ —ñanagürügü. Rü ngẽma nagü naxĩnüexü̃ i ngéma duü̃xü̃gü rü taxuwama name.
7 Natürü nüma ya Tupana rü tá naxnemaxã nanamaxgü. Rü ngürüãchi tá nanapíexẽxẽ.
8 Rü ngẽma norü conü tátama nixĩ ya chixexü̃gu nayixẽẽcü. Rü yíxema nüxü̃ dauxe nax chixexü̃gu nayixü̃, rü tá nüxü̃ tacugü.
9 Rü ngẽxguma ngẽmaxü̃ nadaugügu i duü̃xü̃gü rü tá Tupanaxü̃ namuü̃e. Rü tá nüxü̃ nixugügü i ngẽma Tupana üxü̃ rü tá nüxü̃ nicua̱xãchitanü nax ta̱xacüchiga yixĩxü̃.
10 Rü yimá yatü ya mexü̃gu maxü̃cü rü Cori ya Tupanamaxã tá nataãxẽ rü tá naxca̱x nixũ nax ínapoxü̃ãxü̃ca̱x. Rü guxü̃ma i duü̃xü̃gü i mexü̃gu rüxĩnüexü̃ rü tá nataãxẽgü.
