Salmos 65:1-13
65 Rü cumax, Pa Tupanax i Chióü̃gu Ãpataxex, rü name nixĩ i cuxü̃ ticua̱xüü̃gü rü cupe̱xewa tayanguxẽxẽ i ngẽma unetagü i cumaxã nüxü̃ tixuxü̃.
2 Erü cuma rü nüxü̃ cuxĩnü i torü yumüxẽ. Rü guxü̃ma i duü̃xü̃gü rü cuxca̱x naxĩ nax curü ngü̃xẽẽca̱x íyacagüxü̃ca̱x.
3 Rü ngẽma torü chixexü̃gü rü tomaxã inacua̱x, natürü cuma rü toxü̃́ nüxü̃ icuyarüngüma i ngẽma torü pecadugü.
4 Rü nataãxẽ i ngẽma duü̃xü̃ i cuma cuyaxuxü̃ nax yima cupata ya Chióü̃wa ngẽxmanewa cumaxẽẽxü̃ca̱x. Rü wüxi i taãxẽ tá nixĩ nax natanüwa tangexmagüxü̃ i ngẽma mexü̃gü i cupata ya üünenewa ngẽxmagüxü̃.
5 Pa Tupana Pa Torü Maxẽxẽẽruxü̃, cuma rü tomaxã quixaixcüma rü toxü̃ cungãxü̃ namaxã i ngẽma mexü̃gü i curü poramaxã cuxüxü̃. Rü woo ñaa naane iyacuáxü̃wa ngẽxmagüxü̃ i duü̃xü̃gü rü cuxü̃́ nayaxõgü. Rü woo már arü tocutü i yáxü̃guxü̃wa ngẽxmagüxü̃ i duü̃xü̃gü rü cuxü̃́ nayaxõgü.
6 Rü cuma rü curü poramaxã cunango̱xẽxẽ ya yima ma̱xpǘnegü. Rü yemaacü icunawe̱x i curü pora.
7 Rü cuma rü cunachiãchixẽxẽ i ngẽma yuapegü i taxü̃gü, rü cuyanangea̱xgüxẽxẽ i ngẽma duü̃xü̃gü i ípuraexü̃.
8 Rü woo ngẽma yáxü̃wa ngẽxmagüxü̃ i duü̃xü̃gü rü namuü̃e i ngẽxguma nüxü̃ nadaugügu i ngẽma taxü̃ i mexü̃gü i curü poramaxã cuxüxü̃. Rü guxü̃wama i duü̃xü̃gü i éstewa rü ñu̱xmata oéstewa nangu rü ngẽma cuxüxü̃gagu nataãẽgü.
9 Rü cuma nixĩ i ñoma i naanena cudauxü̃ rü nagu cupuxẽẽxü̃ nax naxügüxü̃ca̱x i nanetügü. Rü cuma rü natüxacügümaxã cuyawaimüanexẽxẽ nax naxügüxü̃ca̱x i trigugü. Rü ngẽmaãcü nixĩ i cunangomüanexẽẽxü̃ i waixü̃mü.
10 Rü cuma rü cuyamegütanü i ngẽma nanetü i aimüanexü̃gu togüxü̃. Rü ngẽma ngüchitaerugüxü̃ rü cuyanawe̱xãchianexẽxẽ. Rü pucümaxã cunangomüanexẽxẽ rü ngẽmaãcü duü̃xü̃güaxü̃́ cunamuarü oõxẽxẽ i nanetügü.
11 Rü wüxichigü ya taunecü rü mexü̃maxã ícunanguxẽxẽ. Rü ngẽma curü caixanexü̃gü rü poraãcü nanapuxẽxẽ.
12 Rü ngẽma carnéruchitaxü̃gü i paanexü̃wa ngẽxmagüxü̃ rü narüxügü i maxẽ rü naya̱u̱xétüane. Rü yima ma̱xpǘnegü rü maxẽmaxã nanga̱xãẽgü.
13 Rü ngẽma metachinüanegüxü̃ rü carnérugümaxã nayapagü. Rü ngẽma doxonexü̃gü rü trigunecü nixĩgü. Rü guxü̃ma i ngẽma rü taãẽãcü nicuxcutanügü.
