Salmos 66:1-20
66 Pa Duü̃xü̃gü i Ñoma i Naanewa Maxẽxü̃x ¡Tupanaca̱x taãẽãcü pewiyaegü!
2 ¡Rü perü wiyaemaxã penataxẽxẽ i naéga i üünexü̃! ¡Rü perü wiyaegümaxã nüxü̃ picua̱xüü̃gü!
3 66:3-4 ¡Rü Tupanamaxã nüxü̃ pixu rü ñapegügü: —Pa Tupanax, ngẽma cuxüxü̃ rü namexẽchi. Rü ngẽma cumaxã rüxuanügüxü̃ rü curü poragagu muü̃maxã cuxme̱xgu nügü nayixẽxẽ. Rü guxü̃wama i ñoma i naanewa rü duü̃xü̃gü cuxü̃ nicua̱xüü̃gü rü norü wiyaegümaxã cuxü̃ nataxẽẽgü —ñapegügü!
4 Nüü̃ nadau 66:3
5 ¡Rü nua pexĩ nax nüxü̃ pedaugüxü̃ca̱x i ngẽma taxü̃ i mexü̃gü i duü̃xü̃güca̱x naxüxü̃ ya Tupana!
6 Rü nüma ga Tupana rü nayapachitamaxẽxẽ ga yema már nax tümacutümaxã yéma tichoü̃xü̃ca̱x ga tórü o̱xigü. Rü nümagü ga tórü o̱xigü rü nacutümaxã nichoü̃ ga yema natü. ¡Rü ngĩxã Tupanamaxã tataãxẽgü!
7 Rü nüma ya Tupana rü guxü̃guma norü poramaxã ñoma i naanemaxã inacua̱x. Rü nüma rü naxetümaxã nüxü̃ nadau i guxü̃ma i nachixü̃anegü. Rü ngẽma tama naga ĩnüexü̃, rü tama name nax namaxã nanuexü̃.
8 Pa Guxü̃ma i Nachixü̃anecüã̱xgüx ¡nüxü̃ picua̱xüü̃gü ya tórü Tupana! ¡Rü perü wiyaegümaxã tagaãcü nüxü̃ picua̱xüü̃gü!
9 Erü nüma rü marü tüxna nanaxã i maxü̃ rü tüxna nadau nax tama pecadugu iyixü̃ca̱x.
10 Pa Tupanax, cuma rü poraãcü toxü̃ cuxü. Rü ngẽmaãcü toxü̃ cumexẽxẽ ñoma diẽrumü üxüwa imexẽẽxü̃rüxü̃.
11 Rü cuma rü torü uanügüaxü̃́ cunatauxchaxẽxẽ nax toxü̃ ínayauxü̃xü̃ca̱x rü puracü i yáxü̃wa toxü̃ napuracüexẽẽxü̃ca̱x.
12 Rü cunangexrü nax torü uanügü rü norü cowarugümaxã towa ngagüxü̃ca̱x. Rü toma rü üxüwa rü dexá i ãũcümaxü̃wa tachopetü. Natürü düxwa ñaa naane i mexü̃wa toxü̃ cugagü.
13 66:13-14 Rü ngẽmaca̱x i ñu̱xma rü cupatawa tá chaxũ rü ngéma tá cupe̱xewa chayagu i ãmaregü. Rü ngẽmaãcü tá chayanguxẽxẽ i ngẽma cumaxã ichaxunetaxü̃ ga yexguma ãũcümaxü̃wa chayexmagu.
14 Nüü̃ nadau 66:13
15 Rü ngẽma curü ãmarearü guruü̃wa rü tá cuxca̱x chayagu i wocaxacügü i ngüexü̃, rü wocagü i iyatüxü̃, rü chíbugü i iyatüxü̃, rü carnérugü nax ngẽma naemamaxã cutaãẽxü̃ca̱x.
16 Pa Duü̃xü̃gü i Tupanaga Ĩnüexü̃x ¡rü nua pexĩ rü iperüxĩnüe! Rü tá pemaxã nüxü̃ chixu i ngẽma mexü̃gü ya Tupana cha̱u̱xca̱x üxü̃.
17 Rü ñaa cha̱u̱a̱xmaxã nüxna chaca rü daa chorü conümaxã nüxü̃ chicua̱xüxü̃.
18 Rü ngẽxguma chi chixexü̃gu charüxĩnügu rü nüma ya Cori rü taxũchima choxü̃ nangãxü̃.
19 Natürü i nümax rü choxü̃ naxĩnü rü nanangãxü̃ i chorü yumüxẽ.
20 Rü namecümaxüchi ya Tupana, erü tama choxü̃́ nüxü̃ naxo i ngẽma naxca̱x íchaca̱xaxü̃. Rü tama nüxü̃ narüchau nax choxü̃ nangechaü̃xü̃.
