Salmos 69:1-36
69 ¡Choxü̃ rüngü̃xẽxẽ, Pa Chorü Tupanax! Erü ngẽmatama nagu changu i taxü̃ i guxchaxü̃.
2 Rü ñoma wüxi i ãcharaxü̃wa rü waxü̃rüxü̃ chixĩ. Rü taxuguma chayayauxãchiéga. Rü ñoma mátamaxü̃chixü̃ i dexáwa ingaxgurüxü̃ chixĩ nax choxü̃ yachaxẽẽxü̃ i poraxü̃chíüxü̃.
3 Rü choma rü düxwa chipa nax curü ngü̃xẽẽca̱x íchaca̱xaxü̃. Rü marü düxwa changu̱xmanaxã. Rü düxwa chipaxetü nax cuxca̱x ichadawenüxü̃, Pa Chorü Tupanax.
4 Rü ngẽma natüca̱xma chauxchi aiexü̃ rü chauyaexü̃ narümumae. Rü nimuetanü i ngẽma chomaxã rüxuanüã̱xgüxü̃ i choxü̃ ima̱xgüchaü̃xü̃. Rü nüma nüxü̃ nixugüe nax changĩ́xü̃ woo taxuca̱xma changi̱xgu. ¿Rü ta̱xacü chi chataeguxẽxẽxü̃ ega tama changi̱xgu?
5 Pa Chorü Tupanax, cuma nüxü̃ cucua̱x nax tama aixcüma chauãẽxü̃ chacuáxü̃. Rü ngẽmaca̱x taxucürüwama cupe̱xewa ichayacu̱xgü i chorü pecadugü.
6 Pa Cori Pa Tupana ya Guxãétüwa Ngẽxmacüx, tama chanaxwa̱xe nax chaugagu ãne yangegüxü̃ i ngẽma chautanüxü̃ i cuxü̃́ yaxõgüxü̃. Pa Iraétanüxü̃arü Tupanax, tama chanaxwa̱xe nax chaugagu cuxü̃ naxoexü̃ i chautanüxü̃ i cuxca̱x daugüxü̃.
7 Rü cuxca̱x nixĩ ga chomaxã naguxchigagüxü̃ rü poraãcü ãne chingexü̃.
8 Rü chautanüxü̃pe̱xewa rü ñoma wüxi i to i nachixü̃anecüã̱xrüxü̃ chixĩ. Rü chorü mama nanegü rü ñoma tama choxü̃ nacua̱xgüxü̃rüxü̃ choxü̃ narüdaunü.
9 Rü choma rü poraãcü chayanuxũ ya cupata. Rü chauxchama chanangenagü i norü guxchigagü i ngẽma cumaxã rüxuanügüxü̃.
10 Rü ngẽxguma cuxca̱x chaxaxugu rü tama chachibüãcüma chayumüxẽgu rü nümagü rü choxü̃ nacugüe.
11 Rü ngẽxguma chorü ngechaü̃chirugu chicu̱xgu rü choxü̃ narücutanüxü̃.
12 Rü duü̃xü̃gü rü ĩanearü plazawa chauchiga nidexagü rü ngẽma ngãxẽxü̃ rü chaugu nawiyaegü.
13 Natürü i chomax, Pa Corix, rü chorü yumüxẽwa rü cuxna chacaama. Rü ngẽmaca̱x, Pa Chorü Tupanax, ngẽma choxü̃ nax cungechaü̃xü̃gagu ¡rü choxü̃ nangãxü̃! Rü cuma nax guxü̃guma choxü̃ curüngü̃xẽẽxü̃, rü chanaxwa̱xe i chauétüwa cuchogü.
14 ¡Choxü̃ rüngü̃xẽxẽ nax tama chixexü̃gü changuxü̃ca̱x, ñoma wüxi i ãcharaanexü̃gu inguxü̃rüxü̃! ¡Rü naxme̱xwa choxü̃ ínanguxuchixẽxẽ i ngẽma chauxchi aiexü̃! ¡Rü nüxna choxü̃ ixũgachixẽxẽ i ngẽma chorü guxchaxü̃gü i ñoma dexá i mátamaxü̃rüxü̃ ixĩxü̃!
15 Rü tama chanaxwa̱xe i ngẽma guxchaxü̃gü choxü̃ narüyexera ñoma poraxü̃chíüxü̃ choxü̃ ichaxẽẽxü̃rüxü̃. Rü tama chanaxwa̱xe i choxü̃ natú i ngẽma guxchaxü̃gü ñoma wüxi ya tupuyuca choxü̃ itúcuchigurüxü̃. Rü tama chanaxwa̱xe nax cho̱xma̱xü̃gu chagüétüxü̃.
16 Pa Corix ¡choxü̃ nangãxü̃! Erü cuma rü chomaxã cumecüma rü poraãcü choxü̃ cungechaü̃. Rü ngẽma nax choxü̃ cungẽchaü̃gagu ¡rü chauxca̱x nataegu!
17 Rü choma nax curü duü̃xü̃ chixĩxü̃ ¡rü taxṹ i choxna quixũgachixü̃! ¡Rü paxa choxü̃ nangãxü̃! Erü ãũcümaxü̃wa changexma.
18 ¡Rü nua naxũ rü choxü̃ rüngü̃xẽxẽ! ¡Rü naxme̱xwa choxü̃ ínanguxuchixẽxẽ i ngẽma chomaxã rüxuanügüxü̃!
19 Cuma rü meama nüxü̃ cucua̱x nax ñuxãcü chomaxã naguxchigagüxü̃ rü ãne choxü̃ yangexẽẽgüxü̃ rü choxü̃ nacugüexü̃. Rü cuma nüxü̃ cucua̱x nax texégü tixĩgüxü̃ ya yíxema chomaxã rüxuanügüxe.
20 Rü ngẽma nax chomaxã naguxchigagüxü̃ rü poraãcü choxü̃́ nangu̱x. Rü ngẽmaca̱x charümaxãchi rü changearü poraã̱x. Rü natüca̱xma naxca̱x chadau nax texéaxü̃́ changechaü̃tümüxü̃xü̃ rü texé choxü̃ taãẽxẽẽxü̃, natürü taxuxü̃ma ichayangau.
21 Rü ngẽma chauxchi aiexü̃ rü chowemügu nanaxǘgü i chaxü̃ruxü̃. Rü yexguma chita̱xawagu rü bínu ya ngúchia̱xüchicü choxna naxãgü.
22 Natürü ngẽma norü õna i taxü̃gü i nügümaxã nangõ̱xgüxü̃ rü namaxã ínataãẽgüxü̃ rü ñu̱xma rü chanaxwa̱xe nax noxrütama chixexẽẽruxü̃ yanguxuchixü̃.
23 ¡Rü ẽcü yangexetüxẽxẽ rü guxü̃guma yadu̱xrueparagüxü̃!
24 ¡Rü nüxna nangu i ngẽma curü nu i poraxü̃! ¡Rü ẽcü curü numaxã napoxcue!
25 Rü chanaxwa̱xe i ngẽma ínaxãchiü̃güxü̃wa rü chianexü̃xü̃ cunanguxuchixẽxẽ nax taxúema napatagüwa ngẽxmagüxü̃ca̱x.
26 Erü nümagü rü tümawe ningẽxü̃tanü ya yíxema cuma tüxü̃ cunaxĩ̱xãchiãẽxẽẽ́xẽ. Rü tüxü̃ nacugüe ya yíxema ngúxü̃ ngẽgüxe nagagu nax tüxü̃ cunapi̱xẽẽxü̃.
27 ¡Ẽcü poxcumaxã nüxü̃́ naxütanü naxca̱x i ngẽma muxü̃ i chixexü̃ i naxügüxü̃! ¡Rü taxṹ i nüxü̃́ nüxü̃ curüngü̃maxü̃ i ngẽma norü pecadugü!
28 ¡Rü ínapiéga nawa i ngẽma popera i nagu naxümatüégagüxü̃ i ngẽma curü duü̃xü̃gü i maxü̃ nüxü̃́ ngẽxmagüxü̃! Rü tama chanaxwa̱xe i ngẽma cuga ĩnüexü̃tanüwa cunango̱xégagüxẽxẽ.
29 Natürü i choma nax chida̱xawexü̃ rü chanaxĩ̱xãchiãẽxü̃ ¡rü choxü̃ írüdaxẽxẽ rü choxü̃ ínapoxü̃, Pa Chorü Tupanax!
30 Rü choma rü wiyaemaxã tá cuxü̃ chicua̱xüxü̃. Rü moxẽ tá cuxna chaxã, rü ngẽmaãcü tá cuxü̃ chataxẽxẽ, Pa Tupanax.
31 Rü wüxi i woca i yatüxü̃ rüe̱xna wocaxacü cuxca̱x chiguxguarü yexera tá namaxã cutaãxẽ i ngẽxguma cuxü̃ chicua̱xüxü̃gu rü moxẽ cuxna chaxãxgu, Pa Corix.
32 Rü yíxema naxĩ̱xãchiãẽgüxe rü tá tataãẽgü i ngẽxguma nüxü̃ tadaugügu nax chomaxã cutaãẽxü̃, Pa Tupanax. Rü yíxema cuxca̱x daugüxe rü tá yexera tüxü̃́ nangúchaü̃ nax cuwe tarüxĩxü̃.
33 Erü nüma ya Cori ya Tupana rü tüxü̃ naxĩnü ya yíxema tüxü̃́ nataxúxe i tümaarü ngẽmaxü̃gü. Rü tama tüxü̃ naxo ya yíxema norü duẽxẽgü ya poxcuexe.
34 Pa Dauxü̃guxü̃ i Naane, rü Pa Ñoma i Naane rü Pa Már, rü name nixĩ i Tupanaxü̃ picua̱xüü̃gü i pema namaxã i guxü̃ma i pewa maxẽxü̃.
35 69:35-36 Erü nüma rü tá naétüwa nachogü ya Chióü̃. Rü tá nüxü̃ narüngü̃xẽxẽ i norü duü̃xü̃gü nax wena táxarü namexẽẽgüãxü̃ca̱x ya Yudáanearü ĩanegü. Rü yima ĩane ya Yerucharéü̃ rü Tupanaarü duü̃xü̃güxacügüarü tá nixĩ. Rü ngéma tá namaxẽ i ngẽma Tupanaga ĩnüexü̃ rü ngẽxma tá naxãchiü̃gü.
36 Nüü̃ nadau 69:35
