Salmos 7:1-17
7 Pa Cori Pa Chorü Tupanax, cuxme̱xwa chaugü changexmaxẽxẽ, nax ngẽmaãcü choxü̃ ícupoxü̃xü̃ca̱x nüxna i guxü̃ma i ngẽma chowe ingẽxü̃tanüxü̃.
2 Rü ngẽxguma tama choxü̃ ícupoxü̃gu rü chorü uanügü rü ñoma leóü̃gü i chaugu wagüexü̃rüxü̃ tá nixĩgü. Rü tataxuma ya texé ya nüxna choxü̃ ípoxü̃xẽ.
3 Pa Corix, Pa Chorü Tupanax ¿ta̱xacürü chixexü̃ chaxü? ¿Rü texéxü̃ chima̱x?
4 Rü ngẽxguma chomücü mexü̃ choxü̃́ üxgu, rü taguma chixexü̃maxã tüxü̃́ chanatáeguxẽxẽ. Rü taguma ngürümare guxchaxü̃ chorü uanüca̱x íchanguxẽxẽ.
5 Natürü ngẽxguma chi chixexü̃ namaxã chaxü̱xgux, rü marü name nax chorü uanügü chowe yangẽxü̃tanüxü̃ rü waixü̃müanegu choxü̃ yatúgüxü̃ rü ngẽmaãcü choxü̃ naxãnexẽẽgüxü̃.
6 Pa Corix ¡curü numaxã inachi rü chauétüwa nachogü, rü nadai i ngẽma chorü uanügü i choxü̃ ima̱xgüchaü̃xü̃! ¡Rü napoxcue i ngẽma duü̃xü̃gü i chixexü̃ ügüxü̃! ¡Rü chauétüwa nachogü!
7 ¡Rü cugüpe̱xegu nangutaque̱xexẽxẽ i guxü̃ma i nachixü̃anecüã̱xgü i duü̃xü̃gü! ¡Rü guxü̃ma i ngẽma nachixü̃anecüã̱xétüwa cugü nangẽxmaxẽxẽ rü namaxã inacua̱x!
8 Rü cuma nax guxü̃ i nachixü̃anecüã̱xgümaxã icucuáxü̃, ¡rü nangugü i chorü maxü̃ nax mea nangóxü̃ca̱x nax taxuxü̃ma i chixexü̃ nawa ngẽxmaxü̃!
9 Pa Cori Pa Tupana ya Ixaixcümacüx, cuma rü cunangugü i wüxichigü i duü̃xü̃güarü ĩnügü rü norü ngúchaü̃gü i naãẽwa nagu naxĩnüexü̃. ¡Rü iyanaxoxẽxẽ i norü chixexü̃ i ngẽma chixexü̃gu maxẽxü̃! ¡Natürü yíxema mexü̃gu maxü̃́xẽ rü tüxna nadau nax tama chixexü̃gu tanguxü̃ca̱x!
10 Nüma ya Tupana rü chorü poxü̃ruxü̃ nixĩ. Rü nüma nixĩ i tüxü̃ namaxẽxẽẽxü̃ ya yíxema ixaixcümagüxe.
11 Nüma ya Tupana rü ãẽ̱xgacü ya mea duü̃xü̃güarü maxü̃xü̃ ngugücü nixĩ, rü marü poxcu namaxã naxuegu i ngẽma chixexü̃gu maxẽxü̃.
12 Rü ngẽxguma ngẽma chixexü̃gu maxü̃xü̃ tama nüxü̃ naxoxgu i norü chixexü̃ rü tama Tupanaca̱x nada̱u̱xgu, rü nüma ya Tupana rü tá nanawaixmagu i norü tara, rü tá nanaporamaã́xü̃ ya norü würa nax yamáaxü̃ca̱x.
13 Rü nüma ya Tupana rü marü ínanaxüxü̃ ya naxnegü ya iya̱u̱xramagugǘne. Rü marü ínamemare ya yima naxnegü ya tüxü̃ imáxü̃ne.
14 ¡Rü dücax, nüxü̃ peda̱u̱x i ngẽma chixexü̃arü üruxü̃! Rü nüma rü pora naxü nax yanguxẽẽãxü̃ca̱x i ngẽma chixexü̃ i nagu naxĩnüxü̃, rü ngẽmaãcü nanango̱xẽxẽ i ngẽma dora i namaxã tá duü̃xü̃güxü̃ nawomüxẽẽxü̃.
15 Rü nüma rü togueca̱x nanaxü i wüxi i ãxmaxü̃ i ma̱xmaxü̃ nax nagu tingucuchixü̃ca̱x, natürü nüma tátama nixĩ i nagu yangucuchixü̃.
16 Rü ngẽma chixexü̃ i togueca̱x naxüxü̃ rü ngẽma máeta i nagu naxĩnüxü̃, rü nagu tátama nangu.
17 Natürü i chomax rü Cori ya Tupanaxü̃ tá chicua̱xüxü̃ erü nüma rü aixcümacü nixĩ. Rü choma rü chorü wiyaemaxã tá nüxü̃ chicua̱xüxü̃ ya yimá Cori ya Tupana ya Guxãétüwa Ngẽxmacü.
