Salmos 70:1-5
70 Pa Chorü Tupanax ¡paxa nua naxũ nax choxü̃ ícunguxuchixẽxẽxü̃ca̱x! Pa Corix ¡paxa nua naxũ nax choxü̃ curüngü̃xẽxẽxü̃ca̱x!
2 ¡Rü naxãneexẽxẽ i ngẽma choxü̃ ima̱xgüchaü̃xü̃ nax ngẽmaãcü norü ãnemaxã yabuxmüxü̃ca̱x i ngẽma choxü̃ ima̱xgüchaü̃xü̃!
3 Rü guxü̃ma i ngẽma choxü̃ cugüexü̃, rü chanaxwa̱xe i norü ãnemaxã nibuxmü.
4 Natürü guxãma ya yíxema cuxca̱x daugüxe rü name nixĩ nax poraãcü tataãẽgüxü̃. Rü yíxema naxwa̱xegüxe nax tümaétüwa cuchogüxü̃ rü name nixĩ i guxü̃guma ñatagürügü: —Namecümaxüchi ya Tupana —ñatagürügü.
5 Natürü i choma nax chaturaxü̃ rü chanaxĩ̱xãchiãẽxü̃, rü chanaxwa̱xe i paxa nua cuxũ nax choxü̃ curüngü̃xẽẽxü̃ca̱x, Pa Tupanax. Erü cuma nixĩ i chorü ngü̃xẽẽruxü̃ rü chorü nguxuchixẽẽruxü̃ quixĩxü̃. ¡Rü paxa choxü̃ rüngü̃xẽxẽ, Pa Corix!
