Salmos 71:1-24
71 Pa Cori Pa Tupanax, cuma nixĩ i chorü poxü̃ruxü̃ quixĩxü̃. ¡Rü choxna nadau nax tama chaxãnexü̃ca̱x!
2 ¡Rü ẽcü chorü uanügüna choxü̃ ínapoxü̃! Erü cuma rü chomaxã quixaixcüma. ¡Rü choxü̃́ nüxü̃ naxĩnü i chorü yumüxẽ rü choxü̃ ínanguxuchixẽxẽ!
3 Rü cuma nixĩ i nuta ya tacü ya chorü cu̱xchicaxü̃ quixĩxü̃. Rü guxü̃gutáma cuxü̃tagu charücúxü̃. Rü cuma nixĩ i nüxü̃ quixuxü̃ nax choxü̃ tá ícupoxü̃xü̃. Erü cuma nixĩ i nuta ya tacü ya chorü cu̱xchicaxü̃ quixĩxü̃.
4 Pa Chorü Tupanax ¡choxü̃ ínanguxuchixẽxẽ naxme̱xwa i ngẽma duü̃xü̃gü i chixexü̃gü i nuwa̱xegüxü̃ rü máxwa̱xegüxü̃!
5 Erü cumax, Pa Tupana ya Guxãétüwa Ngẽxmacüx, rü yexguma changextü̱xügutama cuxü̃́ chayaxõ. Rü cuma nixĩ ga choxü̃ curüngü̃xẽẽxü̃ rü choxna cudauxü̃.
6 Rü yexguma chauéanüwa chayexmagu, rü cuxme̱xwa chayexma rü cuma nixĩ ga choxü̃ cubuxẽẽxü̃. Rü guxü̃gutáma cuxü̃ chicua̱xüxü̃.
7 Rü muxü̃ma i duü̃xü̃gü rü chomaxã naba̱i̱xãchiãẽgü, erü marü chaya. Natürü cuma nixĩ i chorü poxü̃ruxü̃ quixĩxü̃.
8 Rü chauã̱xmaxã cuxü̃ chicua̱xüxü̃, Pa Tupanax, rü guxü̃ i ngunexü̃gügu nüxü̃ chixu nax cuma rü poraãcü cuxüünexü̃.
9 Natürü ñu̱xma nax chayaxü̃ rü changearü poraáxü̃ ¡rü taxṹ i choxü̃ cuxoxü̃ rü choxü̃ ícutáxü̃!
10 Rü ngẽma chorü uanügü i choxü̃ ima̱xgüchaü̃xü̃ rü chauchiga nidexagü rü wüxigu nügümaxã nagu narüxĩnüe nax ñuxãcü tá choxü̃ yama̱xgüxü̃.
11 Rü ñanagürügü: —¡Nawe pingẽxü̃tanü rü peyayauxgü, erü ya Tupana rü marü nüxna nixũgachi rü taxúetama ítanapoxü̃! —ñanagürügü.
12 Pa Tupanax ¡taxṹ i choxna quixũgachixü̃! ¡Rü paxa nua naxũ rü choxü̃ yarüngü̃xẽxẽ!
13 ¡Rü naxãneexẽxẽ rü nadai i ngẽma chorü uanügü i choxü̃ imaxgüchaxü̃xü̃! ¡Rü duü̃xü̃güarü cugüruxü̃ yaxĩgüxẽxẽ i ngẽma naxwa̱xegüxü̃ nax chixexü̃gu changuxü̃!
14 Natürü i choma rü guxü̃gutáma íchanangu̱xẽxẽ nax choxü̃ curüngü̃xẽẽxü̃. Rü yexeraãcü tá cuxü̃ chicua̱xüxü̃.
15 Rü wüxichigü i ngunexü̃gu rü tá nüxü̃ chixu nax cuma quixĩxü̃ nax toxü̃ cumaxẽxẽxẽxü̃ rü aixcüma toxü̃ curüngü̃xẽxẽxü̃. Rü ngẽma nax namuxũchixü̃ i ngẽma mexü̃gü i cha̱u̱xca̱x cuxüxü̃, rü taxucürüwama chayaxugü.
16 Pa Corix, guxü̃ma i duü̃xü̃gümaxã tá nüxü̃ chixu i ngẽma taxü̃gü i mexü̃gü i curü poramaxã cuxüxü̃. Rü tá chanaxunagü nax cuxicatama yixĩxü̃ nax quixaixcümaxü̃.
17 Pa Chorü Tupanax, yexguma changextü̱xügutama choxü̃ cungu̱xẽxẽ i curü ore, rü ñu̱xma rü ta nüxü̃ chixuama ga yema mexü̃ ga taxü̃ ga cuxüxü̃.
18 Pa Chorü Tupanax, ñu̱xma nax marü chayaxü̃ rü chapuxeruxü̃, rü ¡taxṹ i choxna quixũgachixü̃! Erü chanaxwa̱xe i curü porachigaxü̃ chixu namaxã i ngẽma ñu̱xma maxẽxü̃ i duü̃xü̃gü nax nümagü rü ta ngẽma duü̃xü̃gü i tá ingóetanüxü̃maxã nüxü̃ yaxugüxü̃ca̱x.
19 Pa Tupanax, ngẽma curü porachiga rü curü mecümachiga rü guxü̃wama nangu ñu̱xmata daxũguxü̃ i naanewa. Rü cuma rü cunaxü i taxü̃gü i mexü̃gü. Rü tataxuma ya texé ya cumaxã wüxiguxe.
20 Rü woo muxü̃ma ga guxchaxü̃gü rü ĩ̱xãchiãẽgüwa choxü̃ cuxüpetüxẽxẽ, natürü wenatáxarü choxü̃ cutaãẽxẽxẽ. Rü tá choxü̃ ícurüdaxẽxẽ nawa i chorü guxchaxü̃gü, ñoma waixü̃mütüü̃wa írüdaxgurüxü̃.
21 Rü chanaxwa̱xe i noxriarü yexera choxü̃ cuporaxẽxẽ rü wena táxarü choxü̃ cutaãẽxẽxẽ.
22 Pa Chorü Tupana ya Iraétanüxü̃güarü Tupana ya Üünecüx, rü cuxca̱x tá chawiyae rü chorü árpamaxã rü chorü árpaxacümaxã tá cuxü̃ chicua̱xüxü̃. Erü aixcüma cuyanguxẽxẽ i guxü̃ma i ngẽma nüxü̃ quixuxü̃.
23 Rü ngẽmaãcü taãẽãcüma cha̱u̱a̱xmaxã tá cuxca̱x chawiyae, rü cuxü̃ chicua̱xüxü̃ erü cuma rü choxü̃ cumaxẽxẽ.
24 Rü chorü conümaxã rü guxü̃ i ngunexü̃gu tá nüxü̃ chixu nax cuma rü ixaixcümacü quixĩxü̃. Erü ngẽma duü̃xü̃gü i naxwa̱xegüxü̃ nax choxü̃ yama̱xgüxü̃, rü ñu̱xma rü poraãcü ãne ningegü.
