Salmos 72:1-20
72 Pa Tupanax ¡nüxna naxã ya ãẽ̱xgacü i cua̱x nax curüxü̃ mexü̃gu naxĩnüxü̃ca̱x rü aixcümacü nax yixĩxü̃ca̱x!
2 Rü ngẽmaãcü mea tá curü duü̃xü̃gümaxã inacua̱x rü tá tüxü̃ narüngü̃xẽxẽ ya yíxema taxuxü̃ma tüxü̃́ ngẽxmagüxe.
3 Rü chanaxwa̱xe nax namuarü oóxü̃ i ngẽma nanetügü i ma̱xpǘneanewa ngẽxmagüxü̃ nax ngẽmaãcü nataãẽgüxü̃ca̱x i duü̃xü̃gü rü nügü nangechaü̃güxü̃ca̱x.
4 Rü chanaxwa̱xe i nüma ya ãẽ̱xgacü rü mea tümamaxã inacua̱x ya yíxema ingearü ngẽmaxü̃ã̱xgüxe, rü tüxü̃ narüngü̃xẽxẽ ya tümaxacügü ya yíxema tüxü̃́ nataxúxe, rü napoxcueã i ngẽma chixri norü duü̃xü̃gümaxã icua̱xgüxü̃.
5 Rü ngẽmaãcü ya yimá ãẽ̱xgacü rü name nax guxü̃guma naga naxĩnüexü̃ i norü duü̃xü̃gü, ngẽxgumarüxü̃ ya üa̱xcü rü tauemacü rü guxü̃guma inabaigüxü̃rüxü̃.
6 Rü chanaxwa̱xe nax yimá ãẽ̱xgacü rü meama norü duü̃xü̃güxü̃ nangü̃xẽẽxü̃ ñoma pucü i nanetügü meama iwainecüxẽẽcürüxü̃.
7 Rü ngẽxguma nüma ãẽ̱xgacü yixĩxgu rü chanaxwa̱xe nax guxü̃ma mea ixũxü̃ rü nax nataxuxü̃ma i nu ñu̱xmata iyanaxo ya tauemacü.
8 Rü nüma ya ãẽ̱xgacü rü name nixĩ i namaxã inacuáxü̃ i guxü̃ma i naanegü i márwa ixüxgüxü̃ rü ñu̱xmata to i márwa nangu. Rü ngẽma nixĩ i naanegü i taxtü i Eufrátewa ixügüxü̃ rü ñu̱xmata naane íyacuáxü̃wa nangu.
9 Rü ngẽma ãẽ̱xgacüarü uanügü i chianexü̃gu ãchiü̃güxü̃ rü name nixĩ i yimá ãẽ̱xgacüpe̱xewa waixü̃müte̱xegu nanangücuchigü.
10 Rü ngẽma Tárchixanearü ãẽ̱xgacü, rü Capaxũgüarü ãẽ̱xgacü, rü Chabáanearü ãẽ̱xgacü, rü Chebáanearü ãẽ̱xgacü, rü name nixĩ i guxü̃ma i ngẽma ãẽ̱xgacügü rü torü ãẽ̱xgacüxü̃tawa nanana i norü ãmaregü.
11 Rü guxü̃ma i togü i nachixü̃anegüarü ãẽ̱xgacügü, rü name nixĩ i torü ãẽ̱xgacüpe̱xegu nacaxã́pü̱xügü. Rü guxü̃ma i ngẽma togü i nachixü̃anegüarü duü̃xü̃gü, rü name nixĩ i torü ãẽ̱xgacüaxü̃́ napuracüe.
12 Erü nüma ya yimá ãẽ̱xgacü rü tá tüxü̃ ínapoxü̃ ya yíxema ngearü ngẽmaxü̃ã́xẽ ya nüxna caxe. Rü yíxema taxúema tüxü̃ rüngü̃xexẽ́xẽ rü nüma tá tüxü̃ narüngü̃xẽxẽ.
13 Rü yíxema tama pora tüxü̃́ ngẽxmaxe, rü tá nüxü̃́ tangechaü̃tümüü̃gü. Rü yíxema ngearü diẽruã̱xgüxe rü tá tüxü̃ ínapoxü̃ nax tama tayuexü̃ca̱x.
14 Rü tá tüxü̃ ínanguxü̃xẽxẽ naxme̱xwa i ngẽma chixri tümamaxã icuáxü̃ rü tüxü̃ cua̱i̱xgüxü̃. Erü tümaarü maxü̃ rü ãẽ̱xgacüaxü̃́ nachu̱xu.
15 ¡Namaxü̃ ya yimá ãẽ̱xgacü! ¡Rü nüxna penaxã i ngẽma Chabáanearü úiru! ¡Rü guxü̃guma naxca̱x peyumüxẽgü! Rü name nixĩ i guxü̃guma Tupana nüxü̃ narüngü̃xẽxẽ.
16 ¡Toxü̃ rüngü̃xẽxẽ, Pa Tupanax, nax tochixü̃anewa toxü̃́ yaxoxochixü̃ca̱x i torü trigugü rü toxü̃́ nabacaxü̃ca̱x i torü trigunecügü i ma̱xpǘneanewa ngẽxmagüxü̃! ¡Rü namuxẽxẽ i norü o ngẽma Líbanuanewa ngẽxmagüxü̃ i nanetügürüxü̃! ¡Rü ñoma maxẽ i naanewa muxü̃rüxü̃ torü ĩanegüwa yamuxẽxẽ i duü̃xü̃gü!
17 Rü chanaxwa̱xe i duü̃xü̃gü guxü̃guma nüxna nacua̱xãchie i naéga ya ãẽ̱xgacü. Rü name nixĩ i duü̃xü̃gü guxü̃guma mea nachiga yadexagüxü̃ ñoma üa̱xcü guxü̃guma ibáxixü̃rüxü̃. Rü name nixĩ nax guxü̃ma i duxü̃xü̃gü mexü̃ namaxã uegugüxü̃ rü ngẽmaãcü guxü̃ma i nachixü̃anecüã̱xgü nüxü̃ icua̱xüü̃güxü̃.
18 Namecümaxüchi ya Cori ya Tupana ya Iraégüarü Tupana. Rü nüxicatama nixĩ i naxüaxü̃ i ngẽma mexü̃gü i taxü̃gü i norü poramaxã naxüxü̃.
19 Rü name nixĩ i guxü̃guma duü̃xü̃gü nüxü̃ nicua̱xüü̃gü i naéga i üünexü̃. Rü name nixĩ i guxü̃ma i ñaa naane rü namaxã napaxü̃ i norü üüne. ¡Rü ngẽmaãcü yixĩ!
20 Rü nuxã nixĩ i yaguxü̃ i norü yumüxẽgü ya Dabí ya Ichaxí nane.
