Salmos 73:1-28
73 Tupana rü namaxã namecüma i ngẽma Iraétanüxü̃ i mexü̃gu rüxĩnüexü̃.
2 Rü choma rü wixgutaa̱x chiwĩxĩchi rü ichayangu.
3 Yerü chixãũxãchi naxca̱x nax ñuxãcü namuarü ngẽmaxü̃ã̱xgüxü̃ i ngẽma duü̃xü̃gü i nügü icua̱xüü̃güxü̃ rü chixexü̃ ügüxü̃.
4 Rü ngẽma duü̃xü̃gü rü tama nagu narüxĩnüe tá nax nayuexü̃ erü naporae rü taxuxü̃ma nüxü̃ naxüpetü.
5 Rü taguma ngúxü̃ ningegü rü taguma to̱xguã̱xgürüxü̃ nangearü diẽruã̱xgü.
6 Rü ngẽma nax nügü yacua̱xüü̃güxü̃ rü norü nga̱xãẽxü̃ruxü̃ nixĩ. Rü ngẽma dai rü guxü̃guma naãẽwa nangẽxma.
7 Rü norü ngümaxã nanayigüxetü, rü ngẽma norü chixexü̃ i nagu naxĩnüexü̃ rü nangupetüxüchiama.
8 Rü duü̃xü̃güxü̃ nacugüe rü tümagu nidauxcüraxü̃gü rü chixexü̃ tümamaxã nixugüe. Rü chixexü̃maxã rü ma̱xmaxã duü̃xü̃güxü̃ naxãxũnegü. Rü nügü yacua̱xüü̃güãcüma nidexagü.
9 Rü chixri daxũguxü̃ i naanechiga nidexagü rü ngextá ínaxĩxü̃wa rü nügü nicua̱xüü̃gü.
10 Rü ngẽmaca̱x i nümaxü̃ i Tupanaarü duü̃xü̃gü rü düxwa nawe narüxĩ rü naga naxĩnüe rü nanayauxgü i norü ore i nüxü̃ yaxugüexü̃.
11 Rü nügümaxã ñanagürügü: —Nüma ya Tupana rü taxũtáma nüxü̃ nacua̱x i ngẽma ixügüxü̃. Rü Yimá Guxãétüwa Ngẽxmacü rü taxũtáma nüxü̃ nacua̱xama —ñanagürügü.
12 ¡Rü dücax i ngẽma duü̃xü̃gü i chixexü̃gu maxẽxü̃ nax ñuxãcü taãẽãcüma yamuxẽxẽãxü̃ i norü ngẽmaxü̃gü!
13 Rü ngẽmaca̱x i chomax rü düxwa nagu charüxĩnü rü natüca̱xmamare nixĩ nax mea chamaxü̃xü̃ rü chaugüna chadauxü̃ nax tama chixexü̃ chaxüxü̃ca̱x.
14 Erü ñu̱xma nax Tupanawe charüxũxü̃ rü taxuwama choxü̃́ name. Erü guxü̃ i ngunexü̃gu rü ngúxü̃ chinge rü guxchaxü̃ choxü̃́ ngẽxmaxü̃.
15 Natürü, Pa Tupanax, rü ngẽxguma chi ngẽma nüma nagu naxĩnüexü̃gu charüxĩnügu rü choma rü chi naechita chixri chamaxü̃ i curü duü̃xü̃gü.
16 Rü yexguma pora chaxü nax nüxü̃ chacuáxü̃ca̱x nax tü̱xcüü̃ i ngẽma chixri maxẽxü̃ rü mexü̃wa nayexmaxü̃. Natürü choxü̃́ naguxcha nax nüxü̃ chacuáxü̃.
17 Natürü yexguma cupatagu chaxücu̱xgu, Pa Tupanax, rü yexguma nixĩ ga nüxü̃ chicua̱xãchixü̃ nax ngextá tá naxĩxü̃ i ngẽma chixexü̃ ügüxü̃.
18 Rü cuma rü ãũcümaxü̃wa cunangexmagüxẽxẽ nax norü chixexü̃gu nayi̱xixü̃ca̱x rü ngẽxma yanaxoxü̃ca̱x i norü guxü̃ma.
19 73:19-20 Rü ngürüãchimare tá narüxo. Rü norü muü̃maxã tá nayue. Rü ngẽxguma ícurüdaxgu, Pa Corix, ñoma wüxíe pewa írüdaxü̃rüxü̃, rü cuma rü tá nüxü̃ cuxo erü tama aixcüma mea cupe̱xewa namaxẽ.
20 Nüü̃ nadau 73:19
21 Rü noxri ga choma rü chixãũxãchi naxca̱x nax ñuxãcü namuarü ngẽmaxü̃ã̱xgüxü̃ i ngẽma chixexü̃ ügüxü̃, rü poraãcü chauãẽwa nangu̱x.
22 Yerü wüxi ga ngeãẽmarexü̃ chixĩ ga yexguma rü tama chauãẽxü̃ chacua̱x. Rü cupe̱xewa, Pa Tupanax, rü ñoma wüxi ga naeü̃rüü̃mare chixĩ.
23 Natürü i choma rü guxü̃guma cugu charüxĩnü. Rü chorü tügüneme̱xẽgu cuyayauxãchi.
24 Rü ngẽma curü ucu̱xẽmaxã mexü̃wa choxü̃ cuga. Rü wüxi i ngunexü̃ rü taãẽãcüma tá choxü̃ cuyaxu i daxũguxü̃ i naanewa.
25 ¿Rü texé tixĩ ya chomücü i daxũguxü̃ i naanewa? Rü cuma nixĩ, Pa Tupanax. Rü cuxicatama nixĩ i chacuxwa̱xexü̃ i ñoma i naanewa rü nataxuma i to.
26 Rü ñoma i naanewa rü ñaa chaxune rü chauãxẽ rü naturae. Natürü i cumax, Pa Tupanax, rü cunaporaxẽxẽ i chorü maxü̃ne. Rü guxü̃gutáma chorü Tupana quixĩ.
27 Rü ngẽma duü̃xü̃gü i cuxna ixĩgachixü̃ rü tá nayue. Rü tá icuyanaxoxẽxẽ i ngẽma tama aixcüma cuga ĩnüexü̃.
28 Natürü i chomax rü yexeraãcü tá cuxna changaixcama. Erü ngẽma nixĩ i cha̱u̱xca̱x rümemaexü̃. Rü cumax, Pa Cori Pa Tupanax, rü chorü poxü̃ruxü̃ quixĩ. Rü ngẽmaca̱x tá nüxü̃ chixuchiga i guxü̃ma i ngẽma cha̱u̱xca̱x cuxüxü̃.
