Salmos 74:1-23
74 Pa Tupanax, toma nax curü duü̃xü̃gü tixĩgüxü̃, rü ¿tü̱xcüü̃ toxü̃ ícuwogüxü̃chi? ¿Rü tü̱xcüü̃ tomaxã cunu?
2 ¡Rü nüxna nacua̱xãchi i curü duü̃xü̃gü ga woetama nũxcüma cudexü̃! Rü yemagü nixĩ ga norü uanügüme̱xẽwa ícunguxü̃xẽẽxü̃ nax curü duü̃xü̃gü yixĩgüxü̃ca̱x. ¡Rü nüxna nacua̱xãchi ya yima ma̱xpǘne ya Chióü̃ ga nagu cuxãchixü̃ne!
3 ¡Rü nua naxũ rü íyadau ya daa curü ĩane nax guxü̃wama nagu napogüene! Rü yema curü uanügü rü cupatawa rü nagu napogüe ga guxü̃ma ga ta̱xacü yéma yexmagüxü̃.
4 Rü ñu̱xma i ngẽma curü uanügü rü noxrütama wiyaegügu nawiyaegü nawa ya cupata erü marü narüporamaegü. Rü yimá norü woneragü rü ngéma nanawãĩxnagügü.
5 74:5-6 Rü ñoma naixnecüwa üxü imaxü̃rüxü̃ rü nagu namagüe rü nagu napogüe ga guxü̃ma ga norü meruü̃gü ga guma cupata.
6 Nüü̃ nadau 74:5
7 Rü guma cupata ga üünene rü nagu nanangixgü rü nayawa̱xẽẽgü. Rü yemaacü nanachixexẽẽgü ga guma cupata.
8 Rü ngẽma torü uanügü rü nagu narüxĩnüe nax noxtacüma toxü̃ nadaixüchixü̃. Rü torü ĩanegüwa rü ínanagu ga torü ngutaque̱xepataü̃gü ga nawa cuxü̃ ticua̱xüü̃güne.
9 Rü ñu̱xma rü marü nataxuma ya cupata rü nataxuma i curü orearü uruü̃gü. Rü tama nüxü̃ tacua̱x nax ñuxgu tá nangupetüxü̃ i ñaa guxchaxü̃ i toétüwa ngẽxmaxü̃.
10 Pa Tupanax, ¿ñuxguxüratáta nixĩ i nüxü̃ nachauexü̃ i ngẽma torü uanügü nax chixri tomaxã nachopetüxü̃? ¿Rü ngẽxgumarüxü̃ ta rü ñuxguxüratáta nixĩ i nüxü̃ nachauexü̃ nax cumaxã chixexü̃ yaxugüexü̃?
11 ¿Rü tü̱xcüü̃ tama icunawéxchaü̃ i curü pora? ¿Rü tü̱xcüü̃ ngéma nüxü̃ cudawenümare?
12 Rü nũxcümacürüwatama rü cuma nixĩ ga torü ãẽ̱xgacü quixĩxü̃. Rü ñoma i naanewa rü muxü̃ma ga ãẽ̱xgacügüxü̃ curüporamae.
13 Rü cuma rü curü poramaxã cuyayauxye ga már arü dexá. Rü yema ngo̱xogü ga márwa yexmagüxü̃ rü cunadaieru.
14 Rü yema ngo̱xo ga Leviatáü̃ rü cuyama̱xeru. Rü yema aigü ga dauxchitacüã̱xna cunaxã nax nawemü yixĩxü̃ca̱x.
15 Rü cuma nixĩ ga cungóexẽẽxü̃ ga dexáarü baibeanegüxü̃ rü natügü. Rü cuma nixĩ ga cuyapagüxẽẽxü̃ ga natügü ga noxri taguma ngearü dexáã̱xgüxü̃.
16 Rü cuma nixĩ ga cuxüxü̃ ga ngunexü̃ rü chütaxü̃. Rü yimá tauemacü rü üa̱xcü, rü cuma nixĩ ga namaxü̃gu cuyaxũxẽẽchigüxü̃ ga wüxichigü.
17 Rü cuma nixĩ ga cuxunetaxü̃ ga ngextá tá yacuáxü̃ ga naane. Rü cuma nixĩ ga cungo̱xẽẽxü̃ ga mucü rü taunecü.
18 Pa Corix ¡taxṹ i nüxü̃ icurüngümaxü̃ i ñuxãcü ngẽma curü uanüã̱xgü cumaxã chixexü̃ yaxugüexü̃! ¡Rü dücax i ngẽma duü̃xü̃gü i tama naãẽxü̃ cua̱xgüxü̃ rü ñuxãcü chixri cuchiga nidexagü!
19 ¡Rü taxṹ i toxü̃ curüngü̃maxü̃! Erü muxtucuxacügürüxü̃ taturae. ¡Rü taxṹ i torü uanügü i düraexü̃me̱xẽwa toxü̃ cuwogüxü̃!
20 ¡Rü nüxna nacua̱xãchi ga yema curü uneta ga torü o̱xigümaxã cuxüxü̃! Erü ñu̱xma rü ñaa torü nachixü̃ane rü daimaxã nanapá i guxü̃wama.
21 ¡Rü taxṹ i cunangexrüxü̃ i ngẽxguma ngẽma duü̃xü̃gü i poraexü̃ chixri namaxã chopetügu i ngẽma ngearü ngẽmaxü̃ã̱xgüxü̃! ¡Ẽcü nüxü̃́ natauxchaxẽxẽ nax cuxü̃ yacua̱xüü̃güxü̃ca̱x i ngẽma ngearü diẽruã̱xgüxü̃ rü ngẽma ngearü ngẽmaxü̃ã̱xgüxü̃!
22 ¡Inachi, Pa Tupanax, rü ínapoxü̃ i ngẽma cuxca̱x mexü̃! ¡Rü nüxna nacua̱xãchi nax torü uanügü i naechitamare maxẽxü̃ rü guxü̃guma chixexü̃ cumaxã nixugüe!
23 ¡Rü taxṹ i cunangexrüxü̃ i norü guchigagü i ngẽma curü uanügü! Erü wüxichigü i ngunexü̃gu rü niyexerachigü i ngẽma norü dexa i chixexü̃.
