Salmos 75:1-10
75 Moxẽ cuxna taxã, Pa Tupanax, moxẽ cuxna taxã. Rü cuxna nixĩ i taca̱xaxü̃ i torü yumüxẽwa. Rü ngẽma mexü̃gü i curü poramaxã cuxüxü̃chiga nixĩ i tawiyaegüxü̃.
2 Rü nüma ya Cori ya Tupana rü ñanagürü: —Ngẽxguma nawa nanguxgu i ngẽma ngunexü̃ i choma nüxü̃ chaxunetaxü̃, rü aixcüma tá nüxna chaca i wüxichigü i duü̃xü̃ i norü maxü̃chiga.
3 Rü ngẽxguma naxĩã̱xãchigu i ñaa naane guxü̃ma i norü duü̃xü̃gümaxã, rü chomatama nixĩ i namaxã ichacuáxü̃ nax tama yaxũgachixü̃ca̱x i namaxü̃wa —ñanagürü.
4 Rü choma ya Tupana rü ñachagürü nüxü̃ i ngẽma nügü icua̱xüü̃güxü̃ rü ngẽma chixexü̃ ügüxü̃: —¡Taxṹ i pegü íperütagüxü̃ rü pegü picua̱xüü̃güxü̃!
5 ¡Rü taxṹ i perü porachiga pidexagüxü̃! Rü ngẽxguma pidexagügu ¡rü taxṹ i choxü̃ perüyexeragüchaxü̃xü̃ namaxã i perü cua̱x! —ñachagürü.
6 Rü ngẽma tórü ngü̃xẽxẽ rü tama nachixü̃anegü i éstewa ngẽxmagüxü̃wa rüe̱xna ngẽma nachixü̃anegü i oéstewa ngẽxmagüxü̃wa, rü bai i ngẽma nachixü̃anegü i súrwa ngẽxmagüxü̃wa ne naxũ.
7 Natürü nüma ya Tupana nixĩ ya aixcüma ãẽ̱xgacü ixĩcü rü nüma nixĩ i nangugüãxü̃ i wüxíechigüarü maxü̃. Rü tümaxe rü tüxü̃ naxãneexẽxẽ rü toguxe rü tüxü̃ nicua̱xüxü̃.
8 Rü nüma ya Cori ya Tupana rü naxme̱xwa nangẽxma i ngẽma copu i norü nu nawa ngẽxmaxü̃ ñoma wüxi ya bínu ya ngúchia̱xüchicürüxü̃. Rü ngẽxguma inabaãgu i ngẽma norü nu naétü i ngẽma duü̃xü̃gü i chixexü̃ ügüxü̃ rü guxü̃watáma nangu rü taxuxü̃táma niña.
9 Natürü i choma rü guxü̃gutáma nüxü̃ chixuchiga ya yimá Acóbuarü Tupana. Rü chorü wiyaemaxã tá nüxü̃ chicua̱xüxü̃.
10 Erü nüma rü tá inayanaxoxẽxẽ nax nügü yacua̱xüü̃güxü̃ i ngẽma duü̃xü̃gü i chixri maxẽxü̃. Natürü yíxema mexü̃ ügüxe rü yexera tá tüxü̃ naporaexẽxẽ.
