Salmos 77:1-20
77 Rü tagaãcü Tupanana chaca i chorü yumüxẽwa nax choxü̃ naxĩnüxü̃ca̱x.
2 Rü ngẽma ngunexü̃ i guxchaxü̃wa changexmagu rü Tupanaca̱x chadau. Rü taguma nüxü̃ charüchau nax chaxunagüme̱xẽãcüma chütacü chayumüxẽxü̃. Natürü woo ngẽmaãcü chayumüxẽgu rü taguma chataãxẽ.
3 Rü nüxna chacua̱xãchi ya Tupana rü chaxaxu. Rü Tupanaarü ngü̃xẽẽca̱x chadau, natürü changechaü̃ erü tama paxa ínangu i norü ngü̃xẽxẽ.
4 Rü cumax, Pa Tupanax, rü tama choxü̃ cuyaxtaxẽxẽ. Rü ngẽma nax poraãcü chanaxĩ̱xãchiãẽxü̃ rü taxucürüwa chidexa.
5 Rü nüxna chacua̱xãchi ga yema ngunexü̃gü rü taunecügü ga nagu mexü̃ choxü̃ ngupetüxü̃.
6 Rü nüxna chacua̱xãchi ga yexguma chütacü taãẽãcüma chawiyaegu. Rü chauãẽwa nagu charüxĩnü rü chaugüna chaca:
7 —¿Ẽ̱xna guxü̃gutáma i nanuxü̃ ya Cori ya Tupana? ¿Rü taxũtáma ẽ̱xna wena tamaxã nangüxmüxü̃?
8 ¿Rü ẽ̱xna marü nüxü̃ narüchau nax tüxü̃ nangechaxü̃xü̃? ¿Ẽ̱xna nüxü̃ narüngümaxüchi ga norü uneta ga nüxü̃ yaxuxü̃?
9 ¿Ẽ̱xna nüxü̃ narüxo ya Tupana nax namecümaxü̃? ¿Ẽ̱xna tamaxã nanuxũchi rü ngẽmaca̱x marü tama nüxü̃́ tangechaü̃tümüü̃gü? —ñachagürü.
10 Rü ngẽma yexera choxü̃́ ngúxü̃ nixĩ i ngẽxguma nagu charüxĩnügu nax nüma ya Tupana ya Guxãétüwa Ngẽxmacü rü marü tama noxrirüü̃ãcü tamaxã yixĩxü̃.
11 Rü choma rü tá nüxna chacua̱xãchi ga yema mexü̃gü ga ü̃pa norü poramaxã naxüxü̃.
12 Rü nagu tá charüxĩnü ga guxü̃ma ga yema taxü̃gü ga mexü̃gü ga curü poramaxã cuxüxü̃.
13 Pa Tupanax, cuma rü cuxüüne rü ngẽmaca̱x cunaxü i ngẽma mexü̃gü i curü poramaxã cuxüxü̃. Rü nataxuma i ta̱xacü i to i tupana i cumaxã wüxiguxü̃.
14 Erü cuma nixĩ ya Tupana i guxü̃ma i ngẽma mexü̃gü i curü poramaxã cuxüxü̃. Rü guxü̃ i nachixü̃anecüã̱x i duü̃xü̃güpe̱xewa cunawe̱x i curü pora.
15 Rü ngẽma curü poramaxã nixĩ i Equítuanewa ícunanguxü̃xẽẽxü̃ i curü duü̃xü̃gü i Acóbutaagü rü Yúchetaagü.
16 Pa Tupanax, rü yexguma cuxü̃ nada̱u̱xgu ga yema már rü cuxü̃ namuü̃. Rü nidu̱xruxchíxü woo ínamatamaxü̃wa.
17 Rü yema caixanexü̃gü rü nanapuxẽxẽ. Rü dauxü̃wa rü nidu̱xruane rü guxü̃wama naxãẽmacüane.
18 Rü yema cuga ga duruanexü̃rüxü̃ ixĩxü̃ rü buanecü ga íxã̱ũ̱xemacüwa inanaxũ. Rü guma ãẽmacü rü ñoma ga naanexü̃ nangóonexẽxẽ. Rü naxĩã̱xãchi ga ñaa naane.
19 Rü cuma rü márwaama cuxũ rü yemaacü cunaxümaxü̃ ga dexá. Natürü taxúema nüxü̃ tadau ga cucutüchica.
20 Rü cunamu ga Moiché rü Aróü̃ nax yagagüãxü̃ca̱x ga curü duü̃xü̃gü ñoma carnérugü igagüxü̃rüxü̃.
