Salmos 79:1-13
79 Pa Tupanax, ngẽma tama cuxü̃́ yaxõgüxü̃ rü naxca̱x ínayaxüãchi ya yima cupata ya üünene rü nanaxãũãchixẽxẽ. Rü nüma ya ĩane ya Yerucharéü̃ rü nagu napogüe.
2 Rü ngẽma naxü̃negü i ngẽma aixcüma curü duü̃xü̃gü ixĩgüxü̃ rü ngéma nanawogü nax ngẽmaãcü ngurucuwemü rü aigüwemü yixĩgüxü̃ca̱x.
3 Rü ñoma dexá ibaxü̃rüxü̃ nixĩ ga gumá nagü ga Yerucharéü̃arü namagüwa. Rü nataxuma nax texé inata̱xgüxü̃.
4 Rü ngẽma nachixü̃anegü i torü ngaicamana ngẽxmagüxü̃ rü togu nidauxcüraxü̃gü rü toxü̃ nacugüe.
5 Pa Cori Pa Tupanax ¿rü ñuxguxüratáta i nüxü̃ curüchauxü̃ nax tomaxã cunuxü̃? ¿Rü ẽ̱xna guxü̃gutáma ñoma wüxi ya üxürüxü̃ niyauraecha i ngẽma curü nu?
6 ¡Rü ẽcü namaxã nanu i ngẽma nachixü̃anegü i tama cuxü̃́ yaxõgüxü̃ rü taguma yumüxẽwa cuxna cagüexü̃!
7 Yerü nümagü nixĩ ga totanüxü̃ ga Acóbutanüxü̃xü̃ nada̱i̱xü̃ rü guxü̃wama nachixexẽẽãxü̃ ga tochixü̃ane.
8 ¡Rü taxṹ i toguama cuyangutanüxẽxẽxü̃ ga yema chixexü̃gü ga torü o̱xigü ügüxü̃! ¡Rü paxa cuxü̃́ tangechaxü̃tümüxü̃gü! Erü marü toxü̃ narüyexera i ñaa guxchaxü̃gü.
9 Pa Tupana ya Torü Maxẽxẽxẽruxü̃x ¡rü curü üünegagu rü toxü̃ rüngü̃xẽxẽ, rü toxü̃ ínanguxü̃xẽxẽ, rü toxü̃́ nüxü̃ irüngüma i torü chixexü̃!
10 Rü ngẽma duü̃xü̃gü i tama cuxü̃́ yaxõgüxü̃ rü taxuca̱xma tü̱xcüü̃ ñanagürügü: —¿Ngecü nixĩ ya yimá norü Tupana? —ñanagürügü. Rü ñu̱xma rü nüxü̃ tadauxchaü̃ nax ñuxãcü tá cunada̱i̱xü̃ i ngẽma torü uanügü ga curü duü̃xü̃güxü̃ daixü̃. Rü woo i ngẽma nachixü̃anecüã̱xgü i tama cuxü̃́ yaxõgüxü̃ rü tanaxwa̱xe nax nümagü rü ta nüxü̃ nacua̱xgüxü̃ca̱x i ngẽma cuxüxü̃.
11 ¡Rü nüxü̃ naxĩnü i norü axu i ngẽma totanüxü̃ i poxcuexü̃! ¡Rü curü poramaxã ínanguxü̃xẽẽama i ngẽma totanüxü̃ i dai namaxã naxuegugüxü̃!
12 Rü ngẽma nachixü̃anegü i cumaxã guxchigagüxü̃, Pa Cori Pa Tupanax ¡rü 7 e̱xpü̱xcüna napoxcue!
13 Rü ñu̱xũchi i toma nax curü duü̃xü̃gü tixĩgüxü̃ rü guxü̃gutáma moxẽ cuxna taxã. Rü torü wiyaemaxã guxü̃gutáma gucü ya taunecügügu cuxü̃ ticua̱xüü̃gü.
