Salmos 81:1-16
81 ¡Taãẽãcü Tupanaca̱x pewiyaegü! Erü nüma nixĩ i tüxü̃ naporaexẽẽxü̃. ¡Ẽcü tagaãcü nüxü̃ picua̱xüü̃gü ya yimá Acóbuarü Tupana!
2 ¡Rü paü̃derumaxã rü árpamaxã rü árpaxacümaxã pegü pepaxpe̱xegüãcüma pewiyaegü!
3 Rü ngẽxguma ngexwaca nango̱xgux ya tauemacü ¡rü peyacue ya cornéta! Rü ngẽxgumarüxü̃ ta i ngẽxguma tüema yixĩxgu ¡rü peyacue! Rü ngẽma nixĩ i ngunexü̃ i nagu naxüchigaxü̃ nax Tupanaxü̃ icua̱xüü̃güxü̃.
4 Erü yema nixĩ ga mu ga Iraétanüxü̃na naxãxü̃ ga Acóbuarü Tupana.
5 Rü yema nixĩ ga mu ga Yúchetanüxü̃na naxãxü̃ ga yexguma Tupana Equítuanecüã̱xarü ãẽ̱xgacüxü̃ naxãxũnegu. Rü choma rü nüxü̃ chaxĩnü ga wüxi ga naga ga tama nüxü̃ chacuáxü̃ ga ñaxü̃:
6 —Pa Iraétanüxü̃x, marü pexü̃ ichaxüxweta rü pexü̃ íchanguxü̃xẽxẽ nawa ga yema taxü̃ ga puracü.
7 Rü yexguma guxchaxü̃wa peyexmagügu ga Equítuanewa rü choxna pecagüe, rü choma rü pexü̃ íchanguxü̃xẽxẽ. Rü yema caixanexü̃ ga duruanexü̃ nawa ínaxũxü̃wa pexü̃ changãxü̃. Rü yexguma Meribáwa pengugügu rü nataxuxgu ga dexá rü choma rü pexü̃ chaxümare.
8 Pa Chorü Duü̃xü̃güx ¡naga pexĩnüe i ñaa chorü ucu̱xẽ i pemaxã nüxü̃ chixuxü̃! ¡Chierüx chauga pexĩnüegux, Pa Iraétanüxü̃x!
9 Rü tama chanaxwa̱xe i namaxã petupanaã̱xgü i ngẽma tama aixcüma Tupana ixĩxü̃ rü tama chanaxwa̱xe i nüxü̃ picua̱xüü̃gü i naxchicüna̱xãgü.
10 Rü choma nixĩ i perü Cori ya Tupana chixĩxü̃ ga Equítuanewa pexü̃ íchanguxü̃xẽẽxü̃. Rü ngẽxguma ta̱xacü pexü̃́ taxu̱xgux ¡rü choxna peca! Rü choma rü tá pexna chanaxã.
11 Natürü i pema i chorü duü̃xü̃gü i Iraétanüxü̃, rü tama choxü̃́ ipexĩnüe rü tama chauga pexĩnüechaü̃.
12 Rü yemaca̱x nixĩ ga pexü̃ chayexrüxü̃ nax penaxüamaxü̃ca̱x ga perü chixexü̃ rü pema penaxwa̱xexü̃ãcüma pemaxẽxü̃ca̱x.
13 81:13-14 Rü yexguma chi chauga pexĩnüegu, Pa Chorü Duü̃xü̃güx, rü chi nagu pexĩxgu ga yema pexü̃ chamuxü̃, Pa Iraétanüxü̃x, rü chi paxaxüchi chanaxãneexẽxẽ ga yema pemaxã rüxuanüã̱xgüxü̃ rü chi chanapoxcu —ñanagürü ga Tupana.
14 Nüü̃ nadau 81:13
15 Rü ngẽma naxchi aiexü̃ ya Cori ya Tupana, rü norü muü̃maxã tá nape̱xegu nayayitanü. Rü guxü̃gutáma napocu.
16 Natürü ngẽxguma chi norü duü̃xü̃gü ya Tupana naga ĩnüegu rü chi mexü̃ i trigumaxã nanaxüwemü rü chi mexü̃ i berurewa mea nayaxaxegüxẽxẽ.
