Salmos 82:1-8
82 Rü Tupana ãẽ̱xgacü íyixĩxü̃wa i daxũguxü̃ i naanewa rü inachi nax poxcu namaxã naxueguxü̃ca̱x i ngẽma ãẽ̱xgacügü i guxchaxü̃arü mexẽẽruü̃gü i chixri norü duü̃xü̃gümaxã icua̱xgüxü̃. Rü ñanagürü:
2 —¿Ñuxguratáta i nüxü̃ perüchauxü̃ nax chixri duü̃xü̃gümaxã ipecuáxü̃ rü ngẽma chixri maxẽxü̃étüwaama nax pexügüxü̃?
3 Rü dücax, rü name nixĩ i nüxü̃ perüngü̃xẽẽgüxü̃ i ngẽma duü̃xü̃gü i taxucürüwa nügü ípoxü̃güxü̃ rü ngẽma taxcutagü. ¡Rü ẽcü nüxü̃ perüngü̃xẽxẽ i ngẽma ngearü diẽruã̱xgüxü̃ rü ngẽma nüxü̃́ nataxuxü̃ i norü ngẽmaxü̃gü!
4 ¡Rü ngẽma chixexü̃ i duü̃xü̃güme̱xẽwa ípenanguxü̃xẽxẽ i ngẽma taxucürüwama nügü ípoxü̃güxü̃ rü ngẽma ngearü diẽruã̱xgüxü̃!
5 Natürü i pemax, Pa Ãẽ̱xgacügüx, rü tama peãẽxü̃ pecua̱x rü peechitamare pemaxẽ. Rü ngẽmaca̱x nangẽxma i taxü̃ i chixexü̃ i petanüwa rü ngẽma duü̃xü̃gü i namaxã pecuáxü̃ rü pemaxã nanue.
6 Rü choma rü marü pexü̃ chaxuxgu rü tupanagü pixĩgü erü chauxacügü pixĩgü i choma nax Guxãétüwa Changexmaxü̃.
7 Natürü i pema rü guxü̃ i duü̃xü̃gürüxü̃ tá peyue. Rü ngexü̃rüüxü̃ i ãẽ̱xgacü i chixri norü duü̃xü̃gümaxã icuáxü̃rüü̃ãcü tá peyue —ñanagürü ya Tupana.
8 Pa Tupanax ¡ẽcü inachi rü nüxna naca i norü chixexü̃chiga i ñoma i naanecüã̱xgü i ãẽ̱xgacügü! Erü cuma nixĩ i norü yora quixĩxü̃ i guxü̃ma i nachixü̃anegü.
