Salmos 85:1-13
85 Pa Corix, toma nax curü duü̃xü̃gü i Acóbutanüxü̃ nax tixĩgüxü̃ rü cuma rü poraãcü tomaxã cumecüma rü wenaxarü toxü̃ cutaãẽxẽxẽ.
2 Rü marü toxü̃́ nüxü̃ curüngü̃ma i torü chixexü̃gü rü pecadugü ga cupe̱xewa taxüxü̃.
3 Rü yema nax tomaxã cunuxü̃ rü marü icurüngüxmüxü̃chi.
4 Pa Tupana ya Torü Maxẽxẽxẽruxü̃, rü ñu̱xma rü tanaxwa̱xe i wenaxarü toétüwa cuchogü. Rü tama name i tomaxã cunuecha.
5 ¿Ẽ̱xna cuyadaxẽxẽ nax guxü̃gutáma tomaxã cunuechaxü̃? ¿Ẽ̱xna guxü̃gutáma totaagümaxã cunuechaxü̃?
6 ¿Rü tama ẽ̱xna i wenaxarü toxü̃ ícurüdagüxẽxẽxü̃ nax ngẽmaãcü cumaxã tataãẽgüxü̃ca̱x i tomax i curü duü̃xü̃gü nax tixĩgüxü̃?
7 Pa Cori Pa Tupanax ¡toxü̃ nangechaxü̃ rü toxü̃ ínanguxü̃xẽxẽ!
8 Rü ñu̱xma rü tá icharüxĩnü i ngẽma nüxü̃ yaxuxü̃ ya Cori ya Tupana erü norü duü̃xü̃gü i naga ĩnüexü̃maxã tá nüxü̃ nixu nax marü namaxã inangüxmüxü̃. Natürü tama nanaxwa̱xe nax wena norü chixexü̃ca̱x nawoeguxü̃.
9 Rü aixcüma nixĩ ya Tupana i tüxna nangaicamaxü̃ nax tüxü̃ nangü̃xẽẽxü̃ca̱x ya yíxema naga ĩnüexe. Rü ngẽmaãcü i ngẽma norü üüne rü torü naanewa tá nangẽxma.
10 Rü ngẽxguma Tupana norü duü̃xü̃gütanüwa ngẽxmagu, rü tá nügü nangechaü̃gü rü tá nügümaxã nixaixcümagü rü tá nügümaxã inarüngü̃xmüxe rü tá meama niwe̱xgü i norü maxü̃wa.
11 Rü duü̃xü̃gü rü tá nügümaxã nixaixcüma rü ngẽma rü guxü̃wama tá nango̱x ñoma wüxi i nanetü i waixü̃müwa ngóxü̃rüxü̃. Rü ngẽma nax mea namaxẽxü̃ i duü̃xü̃gü rü tá ta meama nango̱x ñoma üa̱xcü i caixanexü̃pechitawa ngóxü̃rüxü̃.
12 Rü nümatama ya Cori ya Tupana rü tá pucü ínananguxẽxẽ rü ngẽma tórü naanewa rü tá mea narüxügü i tanetügü.
13 Rü ngẽxguma tatanüwa nangẽxmagu ya Cori ya Tupana, rü tá aixcüma mea naxca̱x tamaxẽ. Rü nüma rü tá tüxü̃ narüngü̃xẽxẽ nax nacümagu ixĩxü̃.
