Salmos 87:1-7
87 Rü yima ma̱xpǘne ya Chióü̃gu nixĩ i naxüxü̃ ya yima Tupanaarü ĩane ya Yerucharéü̃.
2 Rü nüma ya Cori ya Tupana rü poraãcü nüxü̃ nangechaü̃ ya yima ĩane guxü̃nema ya naigü ya Iraéanearü ĩanearü yexera.
3 Pa Tupanaarü Ĩanex, rü mexẽchixü̃ i ore cuchiga nixugü.
4 Rü natanüwa i ngẽma duü̃xü̃gü i choxü̃ cua̱xgüxü̃ rü nangẽxma i duü̃xü̃gü i Equítuanegu buexü̃, rüe̱xna Babiróniaanegu buexü̃, rüe̱xna Firitéugüanegu buexü̃, rüe̱xna Tíruarü ĩanegu buexü̃ rüe̱xna Etiopíaanegu buexü̃. Rü wüxichigü i ngẽmagü rü poraãcü ngẽma ĩane i nagu nabuxü̃maxã nataãxẽ.
5 Natürü guxü̃arü yexera nataãẽgü i ngẽma Chióü̃gu buexü̃. Erü nümatama ya Tupana ya Guxãétüwa Ngẽxmacü rü nüxü̃ naxuneta ya yima ĩane nax noxrü yixĩxü̃.
6 Rü ngẽma popera i nawa nango̱xégagüxü̃ i duü̃xü̃gü, rü Tupana rü tá nüxü̃ nawǘneta i ngẽma duü̃xü̃égagü i Yerucharéü̃gu buexü̃.
7 Rü ngẽma Yerucharéü̃wa wiyaegüxü̃ rü ngẽma paxetagüxü̃ rü ñanagürügü tá: —Chopata rü guxü̃ma i chorü taãxẽ rü cuwa nangẽxma, Pa Yerucharéü̃x —ñanagürügü tá.
