Salmos 88:1-18
88 Pa Corix, Pa Chorü Tupanax, Pa Chorü Maxẽxẽruxü̃x, ngunecü rü chütacü rü cuxna chaca nax choxü̃ curüngü̃xẽẽxü̃ca̱x.
2 ¡Rü choxü̃́ nüxü̃ naxĩnü i chorü yumüxẽ, rü choxna naxã i ngẽma cuxna naxca̱x chaca̱xaxü̃!
3 Rü poraãcü taxü̃ i guxchaxü̃ chauétü nangu rü nagu charüxĩnü rü ngẽmamaxã tá chayu.
4 Rü duü̃xü̃güca̱x rü marü yuexü̃tanüwa changexma erü marü nataxuma i chorü pora.
5 Rü nua yuexü̃tanüwa choxü̃ nata̱xgü. Rü choma rü ñoma duü̃xü̃ i daigu yuxü̃ rü itáxü̃rüxü̃ chixĩ. Rü ñoma wüxi i duü̃xü̃ i nüxü̃ cuxoxü̃ rü nüxü̃ icurüngümaxü̃rüxü̃ chixĩ.
6 Rü ngẽma ãxmaxü̃ i ma̱xmaxü̃chixü̃wa choxü̃ cuta̱x i ngextá ínawaanexüchixü̃wa.
7 Rü chauétü cunanguxẽxẽ i ngẽma curü nu. Rü poraãcü ãũcümaxü̃wa choxü̃ cungexmaxẽxẽ ñoma dexágu inguxgurüxü̃.
8 Rü ngẽma chomücügüãẽwa ícunanguxẽxẽ nax choxna naxĩgüxü̃ca̱x. Rü wüxi i norü guxchaxẽẽruxü̃ choxü̃ quixĩxẽxẽ. Rü ñoma wüxi i poxcuxü̃ i taxucürüwama iñaxü̃rüxü̃ chixĩ.
9 Rü ngẽma nax poraãcü chaxauxechaxü̃gagu rü düxwa chixoxetü. Rü guxü̃ma i ngunexü̃gu rü cuxca̱x chaxunagüme̱xẽãcüma cuxna chaca, Pa Corix, rü auxãcüma cumaxã nüxü̃ chixu i chorü guxchaxü̃.
10 ¿Rü ta̱xacüwa i choxü̃́ namexü̃ i ngẽma taxü̃ i mexü̃gü i curü poramaxã cuxüxü̃ ega marü chayu̱xgu? ¿Rü ñuxãcü i wüxi i yuxü̃ rü moxẽ cuxna naxã?
11 Rü ngẽxguma chayu̱xgu rü cho̱xma̱xü̃wa changexmagu ¿rü ñuxũcürüwa duü̃xü̃gümaxã nüxü̃ chixu nax quixaixcümaxü̃ rü toxü̃ cungechaxü̃xü̃?
12 Rü ngẽma yuexü̃tanüwa i ngextá ínaxẽanexü̃wa ¿rü tayíxemaxü̃ ya texé ya nüxü̃ ixuxe nax quixaixcümaxü̃ rü taxü̃ i mexü̃gü cuxüxü̃?
13 Natürü i chomax, Pa Corix, rü cuxna nixĩ i chaca̱xaxü̃, rü guxü̃guma i pa̱xmama rü cumaxã nixĩ i chayumüxẽxü̃
14 ¿Rü tü̱xcüü̃ nixĩ i choxü̃ cuxoxü̃, Pa Corix, rü tü̱xcüü̃ nixĩ i cha̱u̱xcha̱xwa iquicúxü̃?
15 Rü changextü̱xügucürüwatama rü guxchaxü̃wa changexmaecha rü ngẽmamaxã wixguxüchi chayu. Rü poraãcü yáxna namaxã chaxĩnü ga yema guxchaxü̃gü ga cuma cha̱u̱xca̱x ícunguxẽẽxü̃. Rü ñu̱xma rü düxwa marü tama namaxã chapora.
16 Rü ngẽma curü nu i ãũcümaxü̃ rü marü chauétüwa nangu rü choxü̃ narüporamae.
17 Rü guxü̃ i oragu rü ngẽma curü nu rü choxü̃ ínayaeguãchi ñoma wüxi ya tacü ya mucürüxü̃.
18 Rü cuma rü marü choxna cuyaxĩgachixẽxẽ i guxü̃ma i ngẽma chomücügü rü yema ü̃pa namaxã chaxãmücügüxü̃. Rü ñu̱xma rü ngẽma ẽanexü̃xicatama nixĩ i namaxã chaxãmücüxü̃.
