Salmos 89:1-52
89 Pa Corix, guxü̃gutáma chorü wiyaewa nüxü̃ chixu nax cuma rü cumecümaxü̃chixü̃. Rü guxü̃gutáma duü̃xü̃gümaxã nüxü̃ chixu nax cuma rü aixcümacü quixĩxü̃.
2 Rü tá namaxã chanacaeane nax cuma rü guxü̃guma toxü̃ cungechaxü̃xü̃, rü ngẽma nax quixaixcümaxü̃ rü taguma naxüchicüxü ñoma daxũguxü̃ i naane taguma üchicüüxü̃rüxü̃.
3 Rü cuma rü gumá curü duü̃xü̃ ga cumatama cuyaxucü ga Dabímaxã icuxuneta rü ñacurügü nüxü̃:
4 —Rü tá cutaagümaxã chanaxuegu nax nümagü tá yixĩxü̃ i guxü̃gutáma cuchicüxü ãẽ̱xgacügü yixĩgüxü̃ i Iraétanüwa —ñacurügü nüxü̃.
5 Pa Tupanax, guxü̃ma i ngẽma dauxü̃wa ngẽxmagüxü̃ rü cuxü̃ nicua̱xüü̃gü naxca̱x i ngẽma taxü̃gü i mexü̃gü i curü poramaxã cuxüxü̃. Rü ngẽma curü orearü ngeruü̃gü i dauxü̃cüã̱x rü tá cuxü̃ nicua̱xüü̃gü erü aixcümacü quixĩ.
6 Rü nataxuma i ta̱xacü i woo i daxũguxü̃ i naanewa i cumaxã wüxiguxü̃, Pa Cori Pa Tupanax.
7 Erü cuma rü Tupana ya poracü rü ãũcümacü quixĩ. Rü curü orearü ngeruü̃gü i dauxü̃cüã̱x rü cuxü̃ ínachomaeguãchi.
8 Pa Cori Pa Tupana ya Guxãétüwa Ngẽxmacüx, rü guxü̃ma i pora rü guxü̃ma i ore i aixcüma ixĩxü̃ rü cuwa ne naxũ. Rü nataxuma i ta̱xacü i cumaxã wüxiguxü̃.
9 Rü cuma rü namaxã icucua̱x i ngẽma már i ãũcümaxü̃ rü ícuyachaxãchixẽxẽ i norü yuape ya taxüchicü.
10 Rü cuma rü cunanguxẽxẽ ga Equítuane ñoma wüxi i churara i poraxü̃ i daigu yuxü̃rüxü̃. Rü cuchacüxü ya poraxüchinemaxã cunawoone i ngẽma cumaxã rüxuanügüxü̃.
11 Rü ngẽma daxũguxü̃ i naane rü ñoma i naane rü cuxrügü nixĩ erü cumatama nixĩ i cunaxüxü̃ rü cunango̱xẽẽxü̃ namaxã i guxü̃ma i ngẽma nawa ngẽxmagüxü̃.
12 Rü cuma nixĩ i cunango̱xẽẽxü̃ i nórte rü súr. Rü yima ma̱xpǘnegü ya Tabóx rü Ermóü̃ rü ngẽma cuéga taãẽãcü nagu nicagüxü̃.
13 Rü yima cuchacüxü rü naporaxüchi. Rü yima curü tügünechacüxü rü napora rü yimamaxã nüxü̃ curüporamae i ngẽma cumaxã rüxuanügüxü̃.
14 Rü ngẽxguma curü tochicaxü̃wa curütoxgux nax cunangugüxü̃ca̱x i wüxichigü i duü̃xü̃arü maxü̃, rü guxü̃ma wüxiguraxü̃ãcüma cunangugü rü aixcüma nawe̱xgu i ngẽma namaxã cuxueguxü̃ i wüxichigü. Rü cuma rü aixcüma ngechaü̃wa̱xecü rü ixaixcümacü quixĩ.
15 Pa Corix, nataãẽgü i ngẽma duü̃xü̃gü i nüxü̃ cuáxü̃ nax taãẽãcü cuxü̃ yacua̱xüü̃güxü̃ rü aixcüma curü oregu namaxẽxü̃ nax ngẽmaãcü curü ngóonexü̃wa nangẽxmagüxü̃.
16 Rü nataãẽgü i ngẽma curü duü̃xü̃gü i guxü̃guma cumaxã taãẽgüxü̃ rü naxca̱x daugüxü̃ nax cucümagu naxĩxü̃.
17 Rü aixcüma nixĩ i curü duü̃xü̃güarü poraxẽẽruxü̃ quixĩxü̃ rü cuma nixĩ i nüxü̃ curüngü̃xẽẽxü̃ nax cucümagu naxĩxü̃ca̱x. Rü ngẽma yexeraãcü nax tiporaetanüxü̃ rü curü ngúchaü̃gagu nixĩ.
18 Rü nüma ya Cori rü tórü poxü̃ruxü̃ nixĩ. Rü nüma nixĩ i tórü ãẽ̱xgacü ya üünecü i yixema i Iraétanüxü̃ nax ixĩgüxü̃.
19 Rü nũxcüma rü curü duü̃xü̃güxü̃ nüxü̃ cudauxẽxẽ i ẽxü̃guxü̃ rü yemaacü namaxã quidexa, rü ñacurügü nüxü̃: —Choma rü nüxü̃ chaxuneta i wüxi i chorü duü̃xü̃ i poraxü̃ rü guxãétüwa chanangexmaxẽxẽ rü poraãcü nüxü̃ charüngü̃xẽxẽxü̃.
20 Rü nüma nixĩ ya yimá chorü duü̃ ya Dabí. Rü yexguma chorü chíxü̃ i üünexü̃maxã chanabaerugu, rü nüxü̃ chaxuneta nax chorü duü̃xü̃güarü ãẽ̱xgacü yixĩxü̃ca̱x.
21 Rü choma rü guxü̃gutáma nüxü̃ charüngü̃xẽxẽxü̃ rü chorü poramaxã tá chanaporaxẽxẽ.
22 Rü ngẽma namaxã rüxuanüã̱xgüxü̃ rü taxũtáma naxca̱x ínayaxüãchi. Rü ngẽma chixri maxẽxü̃ rü taxũtáma nüxü̃ narüporamaegü.
23 Rü ngẽma namaxã rüxuanüã̱xgüxü̃ rü choma rü tá nagu chayanaxoxẽxẽ rü tá nüxna chayaxĩgachixẽxẽ. Rü tá chanadai i ngẽma naxchi aiexü̃.
24 Rü choma rü poraãcü tá nüxü̃ changechaü̃, rü namaxã tá chixaixcüma. Rü tá yexeraãcü chayaporaxẽxẽchigü.
25 Rü choma rü tá aixcüma nüxna chanaxã i pora nax namaxã inacuáxü̃ca̱x i ngẽma naane i Már i Mediteráneuwa ixügüxü̃ rü ñu̱xmata natü i Eufrátewa nguxü̃.
26 Rü nüma rü tá ñanagürü choxü̃: “Cuma nixĩ i chaunatü quixĩxü̃ rü chorü Tupana ya choxü̃ ípoxü̃cü rü choxna daucü quixĩxü̃”, ñanagürü tá.
27 Rü choma rü ñoma chaune ya yacürüxü̃ tá namaxã chixĩ. Rü guxü̃ma i nachixü̃anegüarü ãẽ̱xgacügüétüwa tá chanangexmaxẽxẽ.
28 Rü ngẽma chorü ngechaü̃ rü guxü̃gutáma naxü̃tawa nangẽxma. Rü yema chorü uneta ga namaxã nüxü̃ chixuxü̃ rü tagutáma inayarüxo.
29 Rü ngẽma nataagü rü nachicüxü guxü̃gutáma nüxí Iraéanecüã̱xgüarü ãẽ̱xgacügü nixĩgü ñu̱xmatáta nagu i naane.
30 89:30-31 Natürü ngẽxguma chi nüxna yaxĩgachigu i ngẽma chorü ngu̱xẽẽtae rü tama nagu namaxẽgu i ngẽma chorü mugü rü chixri naga naxĩnüegu i chorü ore rü tama yanguxẽẽgüãgu i ngẽma namaxã nüxü̃ chixuxü̃,
31 Nüü̃ nadau 89:30
32 rü aixcüma tá chanapoxcue nagagu nax tama chauga naxĩnüexü̃ rü poraãcü tá nüxna chanacuaixca.
33 Natürü taxũtáma nüxü̃ charüxo nax nüxü̃ changechaü̃xü̃ ya Dabí rü aixcümaxü̃chi tá chayanguxẽxẽ i ngẽma namaxã nüxü̃ chixuxü̃.
34 Rü taxũtáma chanangexrü i ngẽma chorü uneta ga namaxã nüxü̃ chixuxü̃ rü aixcüma tá chayanguxẽxẽ i guxü̃ma i ngẽma chorü ore.
35 Rü noxtacüma chorü üüneégagu ichaxuneta rü tagutáma chanawomüxẽxẽ.
36 Rü ngẽma nataagü rü nüxí nachicüxü guxü̃gutáma Iraéanecüã̱xgüarü ãẽ̱xgacügü nixĩgü ñoma üa̱xcü ibáixechaxü̃rüxü̃.
37 Rü ñoma tauemacü guxü̃guma ngóxü̃rüxü̃ rü ngẽxgumarüxü̃ guxü̃gutáma Iraéanecüã̱xgüarü ãẽ̱xgacügü nixĩgü ñoma daxũguxü̃ i naane ngẽxmaechaxü̃rüxü̃ —ñacurügü.
38 Natürü i ñu̱xma rü nüxü̃ cuxo rü tama nüxü̃ cucuáxchaü̃ ya yimá ãẽ̱xgacü ya cumatama nüxü̃ cuxunetacü. Rü namaxã cunu.
39 Rü ngẽma curü uneta ga curü duü̃xü̃maxã nüxü̃ quixuxü̃ rü marü cuyanaxoxẽxẽ rü nüxna cunayaxu nax ãẽ̱xgacü yixĩxü̃.
40 Rü ngẽma norü ĩanearü poxeguxü̃ rü cuyangóxnaxẽxẽ rü yima norü ĩgü rü cuyawa̱xgüxẽxẽ.
41 Rü guxü̃ma i ngẽma togü i duü̃xü̃gü i ngéma chopetüxü̃ rü naxca̱x nangĩ̱x i ta̱xacü i nüma nanaxwa̱xexü̃. Rü ngẽma nachixü̃anegü i nüxna ngaicamagüxü̃ rü nüxü̃ nacugüe ya yima ĩane.
42 Rü cuma rü cunangexrü i ngẽma namaxã rüxuanüã̱xgüxü̃ nax taãẽãcüma curü duü̃xü̃güxü̃ nada̱i̱xü̃ rü nüxü̃ naporamaegüxü̃.
43 Rü ngẽma curü duü̃xü̃güarü tara rü cuyatécaxẽxẽ, rü tama nüxü̃ curüngü̃xẽxẽ i ngẽxguma norü uanügümaxã nügü nadaixgux.
44 Rü ngẽma norü pora rü cunanguxẽxẽ, rü ícunata̱xüchi ya yimá norü ãẽ̱xgacü.
45 Rü marü cunanuxẽxẽ i norü maxü̃, rü poraãcü cunaxãneexẽxẽ.
46 Pa Corix ¿rü ñuxguxüratáta i nüxü̃ curüchauxü̃ nax iquicúxü̃? ¿Ẽ̱xna guxü̃gutáma wüxi ya üxü ya naiechanerüxü̃ yixĩxü̃ i curü nu?
47 Pa Corix ¡nüxna nacua̱xãchi rü ngẽma chorü maxü̃ rü nax nanuxũxü̃! Rü yimá duü̃ ya cuma cuxücü rü tama nama̱x i norü maxü̃.
48 Rü taxúema texé tamaxecha rü taguma tayu. Rü taxúema texé nawa ítanguxuchi i yuarü pora.
49 Pa Corix ¿ngexü̃ ga yema curü ngechaü̃ ga noxri Dabímaxã nüxü̃ quixuxü̃ ga yexguma icuxunetagu nax aixcüma guxü̃gutáma nüxü̃ cungechaxü̃xü̃?
50 Pa Corix ¡dücax i toma nax curü duü̃xü̃gü tixĩgüxü̃, rü togu nidauxcüraxü̃gü i muxü̃ma i duü̃xü̃gü! Rü ngẽma rü poraãcü chorü maxü̃newa nangu̱x.
51 Pa Corix, ngẽmaãcü nixĩ i ngúxü̃ toxü̃ ningexẽxẽ rü chixexü̃ tomaxã yaxugüexü̃ i ngẽma curü uanügü. Rü ngẽmaãcü ngextá ínaxũxü̃wa rü chixri nachiga nidexagü ya yimá cumatama nüxü̃ cuxunetacü nax curü duü̃xü̃ yixĩxü̃.
52 Rü guxü̃guma namexẽchi ya Cori ya Tupana. Rü ngẽmaãcü yixĩ. Rü ngẽmaãcü yixĩ.
