Salmos 9:1-20
9 Pa Cori Pa Tupanax, guxü̃ ya chorü maxü̃nemaxã tá cuxü̃ chicua̱xüxü̃. Rü tá nüxü̃ chixuchiga i guxü̃ma i ngẽma mexü̃gü i curü poramaxã cuxüxü̃.
2 Pa Cori ya Tupana ya Guxãétüwa Ngẽxmacüx, rü chorü taãẽmaxã tá poraãcü cuxü̃ chicua̱xüxü̃. Rü chorü wiyaemaxã tá cuxü̃ chatachigaxẽxẽ.
3 Rü ngẽma chorü uanügü rü cupe̱xewa nibuxmü rü nayayi rü inarütauxe.
4 Cuma rü ãẽ̱xgacü ya ixaixcümacü quixĩ. Rü curü tochicaxü̃wa choxü̃ cungugü rü chauétüwa cuchogü.
5 Rü cunamuü̃xẽxẽ i ngẽma togü i nachixü̃anecüã̱xgü i tama cuxü̃́ yaxõgüxü̃, rü cunadai i ngẽma chixexü̃gu maxẽxü̃. Rü noxtacüma icuyanaxoxẽxẽ i naégagü nax taguma texé nüxna cua̱xãchiexü̃ca̱x.
6 Rü ngẽma chorü uanügü rü marü inayarüxo, rü yima norü ĩanegü rü nagu cupogü. Rü ngẽmaãcü i ñu̱xma rü taxúema nüxna tacua̱xãchi.
7 Natürü nüma ya Cori ya Tupana rü guxü̃gutáma ãẽ̱xgacü nixĩ. Rü nüma rü norü tochicaxü̃wa mea nanangugü i wüxichigü i duü̃xü̃güarü maxü̃.
8 Rü nüma rü mea tá guxü̃ i duü̃xü̃güarü maxü̃ nangugü. Rü mea tá guxü̃ i nachixü̃anegüarü duü̃xü̃güxü̃ nangugü.
9 Rü nüma ya Cori ya Tupana rü tüxü̃ ínapoxü̃ ya yíxema togü chixri tümamaxã icuáxe. Rü ngẽxguma ngúxü̃ tingexgu rü tüxü̃ narüngü̃xẽxẽ.
10 Pa Corix, yíxema cuxü̃ cua̱xgüxe rü cuxü̃́ tayaxõgü. Rü taguma tüxü̃ icuyarüngüma ya yíxema cuxca̱x daugüxe.
11 ¡Rü naxca̱x pewiyaegü ya Cori ya Tupana ya Chióü̃wa ãẽ̱xgacü ixĩcü! ¡Rü guxü̃ i nachixü̃anegüwa nüxü̃ pixu i ngẽma mexü̃gü i naxüxü̃!
12 Rü nüma ya Tupana rü tümaca̱x nanu ya yíxema togü chixri tümamaxã icua̱xgüxe. Rü tama nüxü̃ inarüngüma i ngẽma tümaarü axu ya yíxema ngúxü̃ ingegüxe.
13 Pa Corix, ¡cuxü̃́ changechaü̃tümüxü̃! ¡Rü dücax, nüxü̃ nadau i ñuxãcü chanaxĩ̱xãchiãẽxü̃ erü choxü̃ nima̱xgüchaü̃ i ngẽma chauxchi aiexü̃! ¡Rü nawa choxü̃ ínanguxuchixẽxẽ i ngẽma yu!
14 Rü ngẽxguma choxü̃ ícunguxuchixẽẽgu rü choma rü tá Yerucharéü̃arü ĩã̱xgüwa cuxü̃ chixuchiga rü cuxü̃ chicua̱xüxü̃ nape̱xewa i guxü̃ma i duü̃xü̃gü. Rü namaxã tá nüxü̃ chixu nax chataãẽxü̃ erü ngẽma yuwa choxü̃ ícunguxuchixẽxẽ.
15 Rü ngẽma tama cuxü̃ cua̱xgüxü̃, rü nüma tátama nagu nayi i ngẽma norü yütagü i ãxmaxü̃ i toguxeca̱x namagu naxügüxü̃. Rü nüma tátama nagu ínanue i ngẽma pücha i toguxeca̱x bexma ngẽxma naxǘgüxü̃.
16 Rü nüma ya Cori ya Tupana rü nügü inawe̱x nax ãẽ̱xgacü ya aixcümacü yaxĩxü̃ rü tümaétüwa naxǘ ya yíxema mexü̃ üxe. Natürü nanangexrü i ngẽma chixexü̃ üxü̃ rü ngẽmaca̱x nagu tá nangu ya yima yüta ya nümatama naxüxü̃ne.
17 Rü ngẽma chixexü̃gu maxẽxü̃, rü guxü̃ma i ngẽma tama Tupanaxü̃ cua̱xgüchaü̃xü̃ rü tá nayue rü naxmaxü̃wa tá naxĩ.
18 Natürü Tupana rü taxũtáma tüxü̃ inarüngüma ya yíxema ngearü diẽruã̱xgüxe. Rü aixcüma tá tüxna nanaxã i ngẽma ngü̃xẽxẽ i ítananguxẽẽgüxü̃.
19 ¡Inachi, Pa Cori Pa Tupanax! ¡Rü taxṹ i cunaxüchicaxü̃ i ngẽma nügü icua̱xüü̃güxü̃ i cuétüwa nügü ügüxẽxẽchaü̃xü̃! ¡Rü ngẽma togü i nachixü̃anecüã̱xgü i tama cuxü̃ cua̱xgüxü̃ rü cugüpe̱xewa nagagü nax cuma nüxna cucagüxü̃ca̱x i norü pecaduchiga!
20 Pa Corix ¡namuü̃exẽxẽ i ngẽma tama cuxü̃ cua̱xgüxü̃! ¡Rü nüxü̃ nüxü̃ nacua̱xẽxẽ nax nümagü rü duü̃xü̃gümare yixĩgüxü̃!
