Salmos 90:1-17
90 Pa Cori Pa Tupanax, cuma rü woetama torü poxü̃ruxü̃ quixĩ rü guxü̃guma toma rü torü o̱xigüarü o̱xigü rü cuxme̱xwa tangexmagü.
2 Rü nũxcümaxü̃chima naxü̃pa nax cunaxüxü̃ ga ñoma ga naane rü norü ma̱xpǘnegü rü woetama marü Tupana quixĩ. Rü cuma rü guxü̃gutáma cungexmaecha.
3 Rü cuma rü cuxü̃́ natauxcha nax wena waixü̃müxü̃ cuyaxĩxẽxẽ ya duü̃xü̃ i ngẽxguma tomaxã cunaxuegu̱xgu nax tayuexü̃ rü ñacuxgu: —¡Pa Duü̃xü̃güx, wena waixü̃müxü̃ pixĩgü! —ñacuxgu.
4 Rü 1,000 ya taunecü rü cuxca̱x rü ñoma wüxitama i ngunexü̃ i ngupetüxü̃rüxü̃ nixĩ, rü ñuxre i ora i chütaxü̃rüxü̃ nixĩ.
5 Rü cuma rü wüxi i paxaãchica̱xmare toxna cunaxã i maxü̃ rü paxãma tixüpetü ñoma wüxi i pexãchi üpetürüxü̃.
6 Rü toma rü ñoma maxẽ i pa̱xmama ya̱u̱xatüxü̃ natürü yáuanecü rüñẽ̱xẽxü̃ rü yuxü̃rüxü̃ tixĩgü.
7 Rü aixcüma i ngẽma curü nu rü toxü̃ nadai rü toxü̃ namuü̃exẽxẽ.
8 Rü torü pecadugü rü torü chixexü̃gü i cúãcü taxüxü̃ rü cupe̱xewa nango̱xoma.
9 Rü ngẽmagagu i curü nu rü toétü nangu rü torü maxü̃ rü paxãma nagu̱x. Rü ñoma wüxi i ngü̃ãcüürüxü̃ paxãma naxüpetü ya torü taunecügü.
10 Rü 70 ya taunecü nixĩ ya woetama nagu imaxẽcü. Rü yíxema rüporamaegüxe rü 80 ya taunecüwa tangugü. Natürü yíxema máxarü maxü̃ã̱güxe rü tümaca̱x ínangu i ngúxü̃gü rü guxchaxü̃gü. Rü yimá torü taunecügü rü torüxü̃ paxãma nangupetü.
11 Pa Tupanax ¿texé nüxü̃ tacua̱x nax poraãcü naxãũcümaxü̃ i curü nu? ¿Rü texé nüxü̃ tacua̱x i ngẽma curü nu nax naxca̱x tamuü̃xü̃?
12 Pa Tupanax ¡toxü̃ nüxü̃ nacua̱xẽxẽ nax nanoxrexü̃ ya torü ngunexü̃gü nax ngẽmaãcü nüxü̃ tacuáxü̃ca̱x nax mea cuxca̱x tamaxẽxü̃ nagu ya yimá taunecügü ya toxna cuxãcü!
13 Pa Corix ¡toxca̱x nataegu! ¡Rü taxṹ i cuyamáchigüxẽxẽxü̃ nax toxca̱x cutaeguxü̃! Rü toma nax curü duü̃xü̃gü tixĩgüxü̃ rü ¡cuxü̃́ tangechaxü̃tümüxü̃gü!
14 ¡Rü guxü̃guma i noxri yangunegu rü toxna naxã i curü ngechaü̃! Rü ngẽxguma i toma rü guxü̃gutáma taãẽãcüma cuxca̱x tawiyaegü.
15 Rü gumá taunecügü ga ngúxü̃ nagu tingegücüe̱xpü̱x ¡rü toxna naxã ya taunecügü ya nagu tataãẽgücü!
16 ¡Rü toxü̃ nüxü̃ nadauxẽxẽ i curü üüne rü wenaxarü toxca̱x naxü ga yema taxü̃gü ga mexü̃gü ga nũxcüma curü poramaxã cuxüxü̃ nax ngẽmaãcü i toma rü totaagü nüxü̃ daugüxü̃ca̱x!
17 Pa Cori Pa Torü Tupanax, tanaxwa̱xe i tomaxã cumecüma rü toxü̃ cungechaü̃. ¡Rü ẽcü toxü̃ rüngü̃xẽxẽ nax mea ínanguxuchixü̃ca̱x i ngẽma puracü i taxüxü̃! Rü tanaxwa̱xe i aixcüma ngẽmaãcü mea ínanguxuchi.
